သျှမ်းပြည်တောင်ပိုင်း တောင်ကြီးမြို့ပေါ်တွင် တိုက်ပွဲ နှင့် တိုက်ခိုက်ရေးများ ဆင်နွှဲရန် အဆင်သင့် ဖြစ်နေသဖြင့် ပြည်သူများ သတိထားသွားလာကြန်ရန် SYFDA Rangers သတိပေး ထုတ်ပြန်ထားသည်။
ယနေ့ (မေလ ၁၁) ရက်တွင် SYFDA Rangers လူမှုကွန်ယက် Facebook Page စာမျက်နှာမှ တစ်ဆင့် စစ်ကောင်စီ နှင့် ဆက်စပ်ပတ်သက်သည့် အဖွဲ့အစည်းများကို ၎င်းတို့ တပ်ဖွဲ့မှ အချိန်မရွေး နေရာမရွေး ဖောက်ခွဲတိုက်ခိုက်မှုများ ဖြစ်ပွားနိုင်ကြောင်း သတိပေး ထုတ်ပြန်ထားသည်။
“SYFDA အဖွဲ့သားတွေက အာဏာသိမ်း စစ်ကောင်စီကို လက်နက်ကိုင်တော်လှန်ရန် အတွက် EAOs နယ်မြေမှာ စစ်သင်တန်းကို Commando အဆင့်ထိ အားလုံးပြီးမြှောက်အောင်သင်ကြားလာခဲ့ပီး တိုက်ပွဲ တွေ ကိုယ်တိုင်ဆင်နွှဲရန် အဆင်သင့်ဖြစ်နေကြောင်း ၊ အချိန်မရွေးနေရာမရွေး ဖောက်ခွဲတိုက်ခိုက်မှု ဖြစ်ပွား နိုင်ကြောင်း ပြည်သူများအသွားအလာများ ဆင်ခြင်ကြပါရန် အသိပေးအပ်ပါသည်”ဟု ရေးသားထုတ်ပြန်ခဲ့ပါသည်။
ထို့အပြင် ပြည်သူများ အနေဖြင့် ဖောက်ခွဲရေး ပစ္စည်းများထောင်ထားသော နေရာများတွင် မစပ်စုသင့်ဘဲ မိုင်းများသည် Upgrade မိုင်းများ ဖြစ်သဖြင့် ပြင်းအားများသောကြောင့် မသင်္ကာသော အရာများ တွေ့ရှိ ပါက ဝေးဝေးက အမြန်ဆုံး ရှောင်ပေးရန် အသိပေးထားသည်။
Shan Youth’s Federal Democratic Army (SYFDA Rangers) ကို ၂၀၂၁ ခုနှစ်၊ ဖေဖော်ဝါရီလ ၁၇ ရက်တွင် စတင် ဖွဲ့စည်းခဲ့ခြင်းဖြစ်ပြီး လက်ရှိတွင်လည်း Play House club အား ပိတ်ထားရန် နှင့် မပိတ် ပါက ပစ်ခတ် ဖောက်ခွဲမည်ဟုလည်း SYFDA Rangers က ထုတ်ပြန်ထားသည်။
