လက်ရှိတွင် သျှမ်းပြည်မြောက်ပိုင်း၌ ဌာနေပြည်သူ့စစ်များ၏ တပ်သားသစ်စုဆောင်းနေမှုများကြောင့် ဒေသခံပြည် သူလူထုမှာ အခက်အခဲနှင့်ကြုံတွေ့နေရပါသည်။

သျှမ်းပြည်မြောက်ပိုင်း တန့်ယန််းမြို့နယ် နှင့် မိုင်းရယ်မြို့နယ်ကြား နမ့်ပေါင်ကျေးရွာအုပ်စုအပါအဝင် အဆိုပါဒေသကျေးရွာအုပ်စုများဘက်တွင် လှုပ်ရှားနေသည့် ဗိုလ်မွန်းဦးဆောင်သည့် မန်ပန်ဌာနေပြည် သူ့စစ်တပ်ဖွဲ့မှာ တဖန်ပြန်ပြီး တပ်သားသစ်တွေ ကောက်ယူစုဆောင်း နေသဖြင့် ဒေသခံများ အခက် တွေ့နေပါသည်။

အထက်မှညွန်ကြားချက်အရဟုဆိုကာ မန်ပန်ဌာနေပြည်သူ့စစ်၏ နိုင်ငံရေးရုံးခွဲအရာရှိများက ရုံးခွဲတခုမှာ တပ်သားသစ် ၃၀ ကနေ ၄၀ အထိ တောင်းလာတယ်လို့ဆိုပါတယ်။ အခုလိုတောင်းခံခြင်းခံရတဲ့ ရွာတွေက တော့ နမ့်ပေါင်အုပ်စု ပိန်းညောင်အုပ်စု ၊ နားနန်းအုပ်စု၊ မုံးပိုင်အုပ်စု၊ ဟိုနား၊ ကုန်းဆာ၊ နားနန်း၊ပန်ဟုန်း အစရှိ အုပ်စုများဖြစ် ပါတယ်။

တအုပ်စုစီအတွက် ပါလာတဲ့အမည်စာရင်းတွေထဲမှာ သင်္ကန်းဝတ်နေဆဲ ကိုယ်တော်တွေအမည် တွေ၊ နိုင်ငံခြားသွားအလုပ်လုပ်နေသူတွေ၊ အသက် ၅၀ ကျော် ၆၀ ကျော်သူတွေရဲ့ အမည်တွေပါ ပါရှိပြီး အမည်စာရင်းပါသူအားလုံးမလာမနေရ ပို့ပေးရမယ်လို့ ဆိုပါတယ်။

ပန်ဟုန်းအုပ်စုမှာ လူသစ်အရေအတွက် ၃၀ ပြည့်အောင်ကောက်ဖို့ တာဝန်ကျတဲ့ အရာရှိကတော့ ပိန်းခန်တပ်စခန်းက ဗိုလ်ကြီး အိုက်လွန်း။ မုံးပိုင်၊ တွန်းနေ၊ နားနန်း၊ ဟိုနား-ကုန်းဆာ မှာတပ်သားသစ် ၄၀ ပြည့်အောင်ကောက်ဖို့တာဝန်ကျသူကတော့ ၀မ့်နောင်တပ်စခန်းက ဗိုလ်ကြီးစိုင်းညွန့်ဖြစ်ပါသည်။ မေလ ၂၀ ရက်မှာ စာရင်းအရ လူအပြည့် ပို့ပေးဖို့ ဌာနချုပ်က မှာကြားထားကြောင်းလည်း ပြောဆိုလာပါသည်။

ဒေသခံများအနေဖြင့် စိုးရိမ်မိတာတခုက – ယခင်၄င်းတို့လုပ်နေကျထုံးစံအတိုင်း တပ်သားသစ်ကောက်ပြီး ရင် အစိုးရ တပ်မတော်ထံ ပို့ဆောင်မည်ဆိုသည့်သတင်းက ပျံ့နေသည့်အတွက် အရမ်းကို စိုးရိမ်နေရ ပါသည်။ ကျနော်တို့ဒေသခံပြည်သူလူထုမှာ မကြာသေးခင်ကဘဲ သူတို့အဖွဲ့ ရံပုံငွေလာကောက်လို့ တအုပ်စု ကျပ်သိန်း သိန်းပေါင်းများစွာ ပို့ပေးခဲ့ရသေးသည်။ စီးပွါးရေးကျပ်တည်းသော ယနေ့ခေတ်အဖို့ ထိုအတွက်ပင်လျှင် ကျနော်တို့အတွက်ကြီးမားသောဝန်ထုပ်ဝန်ပိုးတခုဖြစ်နေပါပြီ။ အခုပိုက်ဆံ၊ ဆန် သာမက လူကိုပါ ထပ်တောင်းလာတော့ ကျနော်တို့ရွာသားတွေအတွက် ဘာမှအကျိုးမရှိသော အဆိုပါအဖွဲ့ထံ တပ်သားသွား မလုပ်လိုပါ။ ထို့ကြောင့် ကျနော်တို့ ဒေသခံရွာသားတွေကို မည်သူ ကယ်တင်နိုင်မည်နည်း။

မွေးရပ်မြေကိုချစ်တဲ့
မြောက်ပိုင်းသား
စိုင်းအိုက်လျဲန်း