သျှမ်းပြည်မြောက်ပိုင်း နောင်ချိုမြို့နယ် အုမ္မသီးကျေးရွာရှိ ဒေသခံတစ်ဦး ဖုန်းဘေလ် ဝင်ဝယ်နေချိန်တွင် မူးယစ်ဆေးဝါးသုံးစွဲသည့် လူငယ် (၃) ဦးက ဆိုင်ကယ် ဝင်ရောက်ခိုးယူသွားကြောင်း စုံစမ်းသိရှိရသည်။
ဆိုင်ကယ်ခိုးယူသွားသည့် လူငယ် (၃) ဦးသည် လူငယ်များဖြစ်ပြီး ယမန်နေ့ (မေလ ၂) ရက် နေ့လည်တွင် ဒေသခံ တစ်ဦးက ဖုန်းဘေလ်ဝင်ဝယ်ချိန်တွင် ဝင်ရောက်ခိုးယူသွားကြောင်းသိရသည်။
“ ဟုတ်တယ်။ ခိုးယူသွားတဲ့သူကလည်း လူငယ်တွေပဲဖြစ်တာ။ လူငယ် (၃) ယောက်တဲ့။ အဲလူငယ်တွေလည်း မူးယစ်ဆေးဝါးသုံးကြတဲ့သူတွေဖြစ်တယ်။ ဆေးဖိုးလိုလို့ ပဲ ဝင်ရောက်ခိုးသွားတာထင်တယ်” ဟု နောင်ချိုမြို့ က ပရဟိတအသင်းတစ်ခုမှ အမျိုးသားတစ်ဦးက ပြောသည်။
အာဏာသိမ်းပြီးနောက်ပိုင်း အုမ္မသီးကျေးရွာမှ နောင်ချိုမြို့နယ် သွားလမ်းတွင် ဓားပြတိုက်မှုများ မကြာခဏ ဖြစ်ပွားလျက်ရှိကြောင်းသိရသည်။
“ အဲ့နေရာမှာက ဓားပြမှုက မကြာခဏ ဖြစ်နေတယ်။ ပြီးတော့ ဓားပြတိုက်သူတွေကလည်း လူငယ်တွေပဲဖြစ်တယ် လို့ပြောတယ်။ သွားလာတာကတော့ စိုးရိမ်ရတယ်။ ကြောက်ရတယ်ပေါ့။ သိပ်ပြီးတော့မသွားရဲတော့ဘူး အဲလမ်းကို” ဟု ဒေသခံ အမျိုးသားတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်အတွင်း မြို့နယ်အများစုသည် ဓားပြတိုက်မှု၊ ပစ်သတ်ခံရမှု၊ ခိုးယူလုယက်မှု၊ မကြာခဏ ဖြစ်ပွားလျက်ရှိပြီး မူးယစ်ဆေးဝါးသုံးစွဲသူများလည်း ပိုများပြားလာကြောင်းသိရသည်။
Leave a Comments