ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ဥက္ကဋ္ဌဟောင်း ဦးခွန်ထွန်းဦး ယနေ့ ဧပြီ (၃၀) ရက် မနက်ပိုင်းမှာ ရန်ကုန်မြို့ရှိ နေအိမ်မှာ ကွယ်လွန်သွားကြောင်း စုံစမ်းသိရှိရပါတယ်။
“စစ်ကောင်စီအာဏာသိမ်းပြီးနောက်ပိုင်း သူ မကြာခဏ နေမကောင်းဖြစ်တယ်။ ဆေးရုံ (၂) ကြိမ်လောက်တက်ရတယ်။ ပြီးခဲ့ပတ်တုန်းက သိပ်နေမကောင်းဘူး။ ဒီပတ်က တစ်ပတ်လုံး နေကောင်းနေတယ်။ဒီမနက် အိပ်ရင်းနဲ့ ဆုံးသွားတယ်”ဟု ဦးခွန်ထွန်းဦး နဲ့နီးစပ်သူ တစ်ဦးက သျှမ်းသံတော်ဆင့် ကိုပြောပါတယ်။
ရှစ်လေးလုံး အရေးတော်ပုံ အပြီး ၁၉၈၈ခုနစ် မှာ SNLD ကိုစတင်ထူထောင်သူတွေထဲမှာ ဦးခွန်ထွန်းဦး ပါ၀င်ခဲ့ပြီး ၁၉၉၀ ရွေးကောက်ပွဲမှာ သျှမ်းပြည် မြောက်ပိုင်း သီပေါမြို့နယ်ကနေ လွှတ်တော် ကိုယ်စားလှယ်အဖြစ် ၀င်ရောက်ယှဥ်ပြိုင်ခဲ့ရာ အနိုင်ရရှိခဲ့သူဖြစ်ပါတယ်။
စစ်အစိုးရ လက်ထက်မှာ နိုင်ငံရေး လှုပ်ရှားမှုကြောင့် ထောင်ဒဏ် ၉၃နှစ် ချမှတ်ခံခဲ့ရသူဖြစ်ပြီး ပူတာအို ထောင်မှာ ၆နှစ် ကြာ အကျဥ်းကျခံပြီးနောက် ပြန်လည်လွတ်မြောက်လာခဲ့ပါတယ်။
ဦးခွန်ထွန်းဦးဟာ သီပေါစော်ဘွား စဝ်ကြာဆိုင် ရဲ့ မြေးဖြစ်ပြီး၊ ဦးခွန်ထွန်းဦး ကွယ်လွန်သွားချိန်မှာ အသက် (၇၉) နှစ်ရှိပြီး၊ ဇနီး နှင့် အတူ သား၊သမီး (၂)ယောက် နှင့် မြေး (၂)ယောက် ကျန်ရစ်ခဲ့ပါတယ်။
ဦးခွန်ထွန်းဦးသေဆုံးခြင်းဟာ ရှမ်းလူမျိုးထု တရပ်လုံးရဲ့ ဆုံးရှုံးမှုတရပ်ဖြစ်ပါတယ်။
Leave a Comments