သျှမ်းပြည်မြောက်ပိုင်း ကျောက်မဲမြို့ပေါ် အမှတ် (၁) ရပ်ကွက် အုတ်ကျင်းရှိ နေအိမ်တစ်အိမ်တွင် စစ်ကောင်စီမှ လူငယ် (၂) ဦးကို ဝင်ရောက်ဖမ်းဆီးသွားကြောင်း စုံစမ်းသိရှိရသည်။
ယမန်နေ့ ဧပြီ (၂၇) ရက် မနက် (၂) နာရီခန့်တွင် ၎င်းရပ်ကွက်ရှိ နေအိမ်တစ်အိမ်မှာ ပြည်သူ့ကာကွယ်ရေးတပ်ဖွဲ့ (PDF) ကို ထောက်ပံ့ပေးသည့်သူများဟု စွပ်စွဲပြီး လူငယ် အမျိုးသား (၂) ဦးကို ဖမ်းဆီးခေါ်ဆောင်သွားပြီး လက်ရှိချိန်ထိ အဆက်အသွယ် မရရှိသေးကြောင်း ကျောက်မဲဒေသခံ အမျိုးသမီးတစ်ဦးက သျှမ်းသံတော်ဆင့် ကိုပြောသည်။
“မနက်ပိုင်းချိန်မှာ ဝင်ရောက်ရှာဖွေပြီးတော့ အဲ့အိမ်က လူငယ်တွေ PDF ကို ထောက်ပံ့ပေးတယ်ဆိုပြီးတော့ စစ်ကောင်စီက စွပ်စွဲပြောဆိုပြီး ဖမ်းသွားတယ်။ အမျိုးသား (၂) ယောက်ကို ဘယ်မှာ ဖမ်းဆီးခေါ်ဆောင် သွားလဲတော့ မသိရသေးဘူး”ဟု ကျောက်မဲဒေသခံ အမျိုးသမီး တစ်ဦးကပြောသည်။
ပြီးခဲ့သည့် ဧပြီ (၂၆) ရက်တွင်လည်း စစ်ကောင်စီသည် ကျောက်မဲမြို့ရှိ အရက်ဆိုင်တစ်ဆိုင်မှာ ဝင်ရောက်စစ်ဆေးပြီး ဆိုင်တွင်းရှိ ပြည်သူတစ်ချို့ကို ရိုက်နှက်ခဲ့ကြောင်း သိရသည်။
“ခုရက်ပိုင်း မြို့ထဲကို မကြာခဏ သူတို့ လှည့်ပတ်တာတွေ ပြုလုပ်ကြတယ်။ သံသယ ရှိတဲ့သူတွေကို ရိုက်နှက်တာ တွေရှိတယ်။ လမ်းမကြီးတွေမှာ လမ်းကြိုလမ်းကြားတွေမှာ သူတို့ သွားလာလှုပ်ရှားတာတွေရှိတယ်။ လုံခြုံမှုတွေ မရှိတော့လို့ ကျနော်တို့ ညမိုးချုပ်လာရင် အပြင်မထွက်ရဲကြတော့ဘူး” ဟု ကျောက်မဲဒေသခံ တစ်ဦးကပြောသည်။
ကျောက်မဲမြို့မှာ မြို့နယ် စည်ပင်သာယာရေးရုံး ဗုံးပေါက်ကွဲမှု ဖြစ်ပွားပြီးနောက် ပုံဝိုးကျေးရွာမှ မြို့တွင်းသို့ လာသည့် အမျိုသား တစ်ဦးအား ရိုက်နှက်စစ်ဆေးမှုကြောင့် သေဆုံးခဲ့ရသည်။စစ်ကောင်စီသည် ပြည်သူများကို ဖမ်းဆီးပြီး မိသားစုများထံ ငွေကြေးနှင့် ပြန်လည်ရွေးရသည့် ဖြစ်စဉ်များလည်း ရှိခဲ့သည်။
