သျှမ်းပြည်တောင်ပိုင်း ဖယ်ခုံမြို့နယ်အတွင်း CDM ပြုလုပ်သည့် ပညာရေးဝန်ထမ်းများသည် NUG အစိုးရမှ ပေးအပ်သည့် ထောက်ပံ့ကြေးငွေများ မရရှိသဖြင့် စားဝတ်နေရေးအတွက် ခက်ခဲမှုများရှိနေကြောင်း စုံစမ်းသိရှိရသည်။
ဖယ်ခုံမြို့နယ်အတွင်း ဧပြီ ၂၅ ရက်နေ့က CDM ပြုလုပ်သည့် စစ်တပ်၊ ရဲ၊ ပြည်သူ့ဝန်ထမ်း (၂၀၆) ဦးကို အမျိုးသားညီညွတ်ရေးအစိုးရ NUG က တစ်ဦးကို ၆ သောင်း ထောက်ပံ့ကြေးပေးအပ်ခဲ့ပြီး ထိုထဲတွင် CDM ပညာရေး၀န်ထမ်းများ မပါ၀င်ကြောင်း သိရသည်။
“ ကျမတို့ ပညာရေးဝန်ထမ်းထဲက ဘယ်သူမှ မရကြသေးဘူး။ ကျမတို့လည်းမရသေးဘူး။ ဖြစ်နိုင်ရင်တော့ ကျမတို့ကိုလည်း ထောက်ပံ့ပေးစေချင်တာပေါ့။ အခုက နိုင်ငံရေးမကောင်းတော့ ကျမတို့ CDM သမားတွေအတွက်လည်း ခက်ခဲတယ်လေ။ ကုန်ဈေးနှုန်းလည်းတက်တော့ စားဝတ်နေရေးအတွက်လည်း ခက်ခဲတယ်” ဟု ဖယ်ခုံမြို့နယ်အတွင်း CDM ပြုလုပ်သည့် ကျောင်းဆရာမ တစ်ဦးက ပြောသည်။
ဖယ်ခုံမြို့နယ်အတွင်းတွင် CDM ဝန်ထမ်းပြုလုပ်သူ (၂၀၆) ဦးထက်မကကြောင်း၊ နာမည်စာရင်းမပါသူလည်း အများအပြား ကျန်ရှိနေသေးကြောင်း သိရသည်။
“ ပညာရေးဝန်ထမ်းမပါဘူး။ အဲဒီထောက်ပံ့ကြေးက မရကြဘူး။ ပြီးတော့ ဖယ်ခုံမှာ CDM ဝန်ထမ်းပြုလုပ်တဲ့ သူတွေက အများကြီးကျန်သေးတယ်။ နာမည်စာရင်းမပါတဲ့ သူတွေလည်း အများကျန်ရှိနေသေးတယ်။ ကျန်တဲ့သူတွေကလည်း ထောက်ပံ့ကြေးမရရှိကြဘူး” ဟု ဖယ်ခုံမြို့ ဒေသခံ အမျိုးသားတစ်ဦးက ပြောသည်။
ဖယ်ခုံမြို့နယ်တွင် CDM ပြုလုပ်သည့် ပညာရေးဝန်ထမ်း (၇၀၀) ကျော်ကျန်ရှိနေသေးကြောင်း CDM ပြုလုပ်သည့် ဆရာများထံတွင် သိရသည်။
Leave a Comments