ယခု ဧပြီလအတွင်း သျှမ်းပြည်အတွင်းရှိ မြို့နယ်အများစုက ရိုးရာဓလေ့ ရှင်လောင်းပွဲများကို ပြုလုပ်နေကြပြီး ကိုဗစ် – ၁၉ စည်းကမ်းလိုက်နာမှု အားနည်းလာကြောင်း စုံစမ်းသိရှိရသည်။
အဆိုပါ ရှင်လောင်းပွဲသည် ရက်ရှည်ကြာပြီး လူစည်ကားလျက်ရှိကာ တစ်ချို့ ပြည်သူများက Mask ( နှာခေါင်းစည်း) တပ်ထားခြင်း မရှိတော့ကြောင်း သိရသည်။
“ လူတော့ တော်တော်လည်းစည်ပါတယ်။ ပွဲက ရက်ဆက်တိုက်ပဲ ရှိတယ်။ ဒီတစ်လလုံး ပွဲကရှိနေတာ။ ပွဲထဲမှာဆိုလည်း Mask တပ်တဲ့သူတွေ မရှိတော့ဘူး။ Mask တပ်တဲ့သူဆို မရှိသလောက်ပဲ။ ကျနော်တို့ အဖွဲ့ပဲ ရှိတာ Mask တပ်ထားတာလဲ။ လူကြားတိုးတော့ ကိုယ် Mask ကို ပြန်ချွတ်လိုက်ရတယ်” ဟု လင်းခေးမြို့နယ် ဒေသခံ အမျိုးသားတစ်ဦးက ပြောသည်။
အဆိုပါ Mask (နှာခေါင်းစည်း) မတပ်ပဲ ပွဲတွင်းသွားလာနေမှုကို ကိုဗစ်- ၁၉ ထပ်မံပြန့်ပွားမှာကို ဒေသခံတစ်ချို့က စိုးရိမ်နေကြသည်။
“ စိုးရိမ်စိတ်တော့ ရှိနေသေးတယ်။ ဒါပေမယ့် ကျနော်တို့က ကိုဗစ် ကာကွယ်ဆေးတွေထိုးပြီး ကြပြီဆိုတော့ သိပ်တော့မကြောက်ကြတော့ဘူး။ ကိုဗစ်- ၁၉ ကာကွယ်ဆေးမထိုးရသေးတဲ့ သူတွေအတွက် ပိုစိုးရိမ်ရတယ်။ သူတို့က ခံနိုင်ရည်သိပ်မရှိထားဘူးလေ။ ပြီးတော့ ကာကွယ်ဆေးထိုးပြီးသား သူတွေကလည်း သိပ်မကြောက်ကြဘူး” ဟု သူက ပြောသည်။
အလားတူ ပင်လုံမြို့၊ လဲချားမြို့၊ သီပေါမြို့၊ မိုင်းပန်မြို့၊ နမ့်လန်မြို့၊ စသည့် မြို့နယ်များတွင်လည်း ရှင်လောင်းပွဲ ပြုလုပ်နေကြပြီး ကိုဗစ်-၁၉ စည်းကမ်းလိုက်နာမှု အားနည်းလာကြောင်းသိရသည်။
“ ပွဲလည်းစည်တာပဲ။ လုပ်နေကြတာ။ ကိုဗစ် မရှိသလိုပဲ။ ကြောက်လည်း မကြောက်ကြတော့ဘူး။ Mask (နှာခေါင်းစည်း) လည်း မတပ်ကြတော့ဘူး။ အေးဆေးသွားလာပျော်ပါးနေတာပါ” ဟု လဲချားမြို့ ဒေသခံ အမျိုးသမီးတစ်ဦးက ပြောသည်။
သျှမ်းပြည်အတွင်းတွင် ကိုဗစ်- ၁၉ ကူးစက်သူများလည်းရှိနေပြီး အများစုက မိမိနေအိမ်တွင် ကိုယ်တိုင်ကုသ လျက်ရှိနေကြာင်း သိရသည်။
Leave a Comments