သျှမ်းပြည်တောင်ပိုင်း တောင်ကြီးမြို့တွင် နေထိုင်ပြီး စစ်ရှောင်များကို ကူညီထောက်ပံ့ပေးနေသည့် လူငယ်တစ်ဦးကို စစ်ကောင်စီမှ ယနေ့ (ဧပြီ ၂၂)ရက်တွင် ထောင်ဒဏ် (၁၀) နှစ်ချလိုက်ကြောင်း သတင်းရရှိသည်။
တောင်ကြီးမြို့တွင်နေထိုင်သည့် အသက် ၃၂ နှစ်အရွယ်ရှိ အောင်မင်းသူကို ယနေ့ (ဧပြီ ၂၂)ရက်တွင် တောင်ကြီးခရိုင် တရားရုံးတွင် အကြမ်းဖက်မှုတိုက်ဖျက်ရေးဥပဒေ ပုဒ်မ ၅၀ (ည) ဖြင့် ထောင် (၁၀) နှစ် ချလိုက်ကြောင်း နီးစပ်သူ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
အောင်မင်းသူကို ယခုနှစ် လဆန်းပိုင်းတွင် စစ်ကောင်စီက ၎င်း၏ နေအိမ်တွင် ၀င်ရောက်ဖမ်းဆီးချိန် မတွေ့ရှိသဖြင့် မိခင်ဖြစ်သူကို ဓားစားခံအဖြစ်ဖမ်းဆီးရန် ကြိုးစားခဲ့သေးကြောင်းသိရသည်။
မိခင်ဖြစ်သူကို ဖမ်းဆီးသွားမည်ကို စိုးရိမ်မှုကြောင့် အောင်မင်းသူသည် လာရောက်အဖမ်းခံခဲ့သည်။
” သူ့(အောင်မင်းသူ) ကို အိမ်မှာဝင်ဖမ်းတော့မရှိတာနဲ့ အမေကို ဓားစားခံဖမ်းဖို့ လုပ်တယ်။ အဲ့ဒါနဲ့သူပြန်လာပြီးအဖမ်းခံတာ။ သူက သာမာန်ပြည်သူပါပဲ” ဟု ၎င်းနှင့်နီးစပ်သူ အမျိုးသမီးတစ်ဦးက ပြောသည်။
စစ်ကောင်စီ အုပ်စုသည် ယခုနောက်ပိုင်း စစ်ရှောင်ကူညီပေးနေသည့် လူငယ်များကို PDF တပ်ဖွဲ့ကို ထောက်ပံ့နေသူဟု စွပ်စွဲကာ လိုက်လံဖမ်းဆီးနေကြောင်း၊ Kpay မှ တဆင့် နောက်ယောင်ခံလိုက်ကာ တောင်ကြီးလူငယ်များကို ဖမ်းဆီးနေသည် ဟု သိရသည်။
Leave a Comments