အာဏာသိမ်း စစ်ကောင်စီ လက်ထက် ဒုတိယအကြိမ်မြောက် သင်္ကြန်ကာလမှာ တော်လှန်သင်္ကြန်တွေ ပြုလုပ်ကြဖို့ လူငယ်တွေတိုက်တွန်းနေချိန် စစ်ကောင်စီကတော့ သူတို့လက်ထက်မှာ ပြည်သူတွေ ပျော်ပျော် ရွှင်ရွှင်နဲ့ သင်္ကြန်ကို ဆင်နွဲနေတယ်ဆိုတာကို ချပြနိုင်ဖို့ နည်းမျိုးစုံနဲ့ စည်းရုံး လှုံ့ဆော်တဲ့အပြင် ဖိအားပေးတာ တွေလဲရှိပါတယ်။

ဒီရိုးရာသင်္ကြန်ဟာ သျှမ်းပြည်မှာ နှစ်စဉ်နှစ်တိုင်း ပြုလုပ်နေတဲ့ ရိုးရာပွဲတော်တစ်ခု ဖြစ်တဲ့အတွက် အာဏာသိမ်းတာ မသိမ်းတာနဲ့ မသက်ဆိုင်ဘူးလို့ သီပေါ ဒေသခံ နန်းမွန်းမွန်းပေါင်း က သူ့ရဲ့အမြင်ကို ပြောပါတယ်။

“ကျမတို့ တိုင်းရင်းသားဒေသမှာက ရိုးရာမပျက် ထုံးတမ်းစဉ်လာအတိုင်း လုပ်နေကြ၊ တိုင်းရင်းသားတွေရဲ့ ဓလေ့အရ အရင်ကတည်းက ချစ်မြတ်နိုးစရာ နှစ်တိုင်း လုပ်ခဲ့တာတွေ ရှိတယ်။ ဖက်ထုပ်လေးတွေ လုပ်မယ်၊ ပြီးရင် ဘုရားရေသပ္ပါယ်တာရှိမယ်၊ ဘုရားကို အပြင်ကို ပင့်ပြီး ရေပန်းတွေနဲ့ ရေသပ္ပါယ်တာပေါ့၊ ဒါတွေက အရင်ကတည်းက ရှိနေကြပဲ၊ ပန်းလေးတွေ ယူလာပြီး နှစ်သစ်ကို ကြိုတာ၊ သင်္ကြန်အကြိုနေ့မှာ ကြိုဆိုကြတာ၊ ဒါက ထုံးစံပဲလေ၊ ယဉ်ကျေးမှုက ယဉ်ကျေးမှုပဲ၊ အာဏာသိမ်းတာ မသိမ်းတာနဲ့ မဆိုင်ဘူးလို့တော့ ကျမ မြင်တယ်” 

လူထုအာဏာကို သိမ်းထားတဲ့ စစ်ကောင်စီကလဲ သင်္ကြန်ကာလ အခွင့်အရေးကို ယူပြီး တိုင်းပြည်ကို ထိန်းသိမ်းနိုင်ပြီဆိုတာ ပြဖို့ တောင်ကြီးမြို့မှာ သင်္ကြန်ပွဲကို စည်စည်ကားကား ကျင်းပဖို့ ပြင်ဆင်ထားပါတယ်။

တောင်ကြီးမြို့ရဲ့ ဗဟိုမဏ္ဍပ် အခမ်းအနားအတွက် မြို့ပေါ်ရပ်ကွက်အလိုက် နယ်မြေတစ်ခုမှ ၂၅ ဦးစီ တက်ရောက်ဖို့ စစ်ကောင်စီ ညွှန်ကြားခဲ့တယ်လို့ အငြိမ်းစားအရာရှိတစ်ဦးကလည်း ဆိုပါတယ်။

“သူတို့လုပ်တဲ့ သင်္ကြန်ပွဲ စည်တယ်ဆိုတာကို ပြချင်တာ၊ အခုလည်း ရပ်ကွက်အုပ်ချုပ်ရေးမှူးကတစ်ဆင့် နယ်မြေတစ်ခုကို ၂၅ ဦး တက်ဖို့ ပြောလာတယ်၊ ကျနော်တို့အသိုင်းအဝိုင်းကတော့ သွားမှာမဟုတ်ပါဘူး”

တဖက်မှာလည်း သျှမ်းပြည်အပါအဝင် ပြည်ထောင်စု တဝှမ်းလုံးက မငြိမ်းချမ်းသေးတဲ့ အချိန်ကာလမို့လို့ တော်လှန်သင်္ကြန် ပြုလုပ်ပြီး စစ်ကောင်စီကို ဆန့်ကျင်ကြဖို့ တိုက်တွန်းနိုးဆော်ထားတာတွေ တွေ့မြင်နေရပါတယ်။

တောင်ကြီးခရိုင်က လူထုကာကွယ်ရေးတပ်မှာ ပါဝင်တဲ့ လူငယ်တဉီးကတော့ သူ့ရဲ့ ရင်တွင်းစကားကို အခုလို ပြောပါတယ်။

ဒီနှစ်သင်္ကြန်က ပျော်စရာ သင်္ကြန်မဟုတ်ဘူး၊ တော်လှန်သင်္ကြန်ဖြစ်တယ်။ သူတို့ လုပ်ချင်တာကလည်း နိုင်ငံတကာမှာ လူစည်းကားတယ်ဆိုတာပြချင်တယ်။ ကျနော်ပြောချင်တာက ဘယ်သူ့ကိုမှ အားမနာချင်နေ သူတို့လုပ်တာကို မပါဝင်ဘဲ ကိုယ့်ဟာကို အိမ်မှာဘဲ ဓလေ့ထုံးစံနဲ့ အကြို၊ အကျ၊ အကြပ်၊ အတက် ကိုယ့်ဟာကို အိမ်မှာဘဲ နေပြီး ဖြတ်သန်းပေးကြပါ။ သင်္ကြန်မဏ္ဍပ်သွားမှဘဲ သင်္ကြန်မဟုတ်ဘူး။

အာဏာသိမ်း စစ်ကောင်စီ ကို ဆန့်ကျင်တဲ့လူငယ်အများစုတော့  စစ်ကောင်စီဟာ လူစည်ကားရာ သင်္ကြန်မဏ္ဍပ်တွေမှာ၊ ရေပက်ခံနေရာတွေမှာ မိုင်းထောင်တာတွေ၊ ဖေါက်ခွဲရေးလုပ်တာတွေ၊ စနိုက်ဘာနဲ့ ပစ်တာတွေ ပြုလုပ်ပြီး လူထုကာကွယ်ရေးတွေကို အပစ်ပုံချဖို့ လုပ်လေ့လုပ်ထရှိလို့ သင်္ကြန်ပွဲ မသွားဖို့ တိုက်တွန်း နေကြတာဖြစ်ပါတယ်။