သျှမ်းပြည်မြောက်ပိုင်း မူဆယ်ခရိုင်ရှိ သံဃာတော်များ ဆွမ်းဆန်စိမ်းလောင်းလှူရန်အတွက် မူဆယ်မြို့တွင်းရှိ ပရဟိတအဖွဲ့အစည်းများ၊ ရပ်ကွက်များအလိုက် အလှူငွေ (၁၀)သိန်းအထက် ထည့်လှူရကြောင်း စုံစမ်းသိရှိရသည်။
စစ်ကောင်စီလက်အောက်ခံ မူဆယ်ခရိုင်အုပ်ချုပ်ရေးမှူးမှ ဦးဆောင်ကျင်းပသည့် ဆွမ်းဆန်စိမ်းလောင်းလှူပွဲအတွက် မူဆယ်မြို့နယ်ရှိ ရပ်ကွက်များ၊ ပရဟိတ အဖွဲ့အစည်းများ၊ ကုမ္ပဏီများ၊ ပြည်သူ့စစ်များ၊ ကျေးရွာအုပ်စုများနှင့် အစိုးရဌာနများသည် ကော်မတီရန်ပုံငွေအဖြစ် ငွေကျပ် (၁၀)သိန်းအထက် ထည့်လှူနေရကြောင်း မူဆယ်ဒေသခံတစ်ဦး က ပြောသည်။
“ဆွမ်းဆန်စိမ်းလောင်းလှူပွဲဖြစ်လာဖို့အတွက် ခရိုင်ကနေတဆင့် ညွှန်ကြားလာတာကတော့ ရပ်ကွက်အလိုက် ငွေ (၁၀)သိန်း အထက် မဖြစ်မနေ ထည့်ရတယ်။ မူဆယ်မြို့နယ်ထဲတော့ အကုန်ကောက်တယ်။ တစ်ခြားမြို့နယ်တွေတော့ ကျနော်တို့လဲ မသိရဘူး” ဟု မူဆယ်ဒေသခံတစ်ဦးက ပြောသည်။
စစ်ကောင်စီမှ ကျင်းပပြုလုပ်သည့် သံဃာတော်ဆွမ်းဆန်စိမ်းလောင်းလှူပွဲသည် စစ်ကောင်စီ၏ ယတြာချေသည့် အလှူသာ ဖြစ်ကြောင်း မူဆယ်ဒေသခံများက သုံးသပ်ပြောဆိုကြသည်။
“ဒေသတွင်း ရိုးရာ ဆွမ်းဆန်စိမ်းလောင်းတဲ့ရာသီက ဒီရာသီမဟုတ်သေးဘူး။ နိုင်ငံရေးရှုပ်ထွေးနေချိန်မှာ သူတို့လုပ်တာ သူတို့အတွက် ယတြာချေဖို့ သပ်သပ်ပဲ လို့ ကျနော်တို့ မြင်တယ်” ဟု မူဆယ်ဒေသခံ တစ်ဦးက ပြောသည်။
စစ်ကောင်စီလက်အောက်ခံ မူဆယ်ခရိုင်အုပ်ချုပ်ရေးမှူးမှ ဦးဆောင်ကျင်းပသည့် သံဃာတော် ဆွမ်းဆန်စိမ်း လောင်းလှူပွဲသည် ဧပြီ (၉)ရက်နေ့က မူဆယ်လေယာဉ်ကွင်းဟောင်းတွင် ကျင်းပပြုလုပ်ခဲ့ကြောင်း သိရသည်။
ထိုဆွမ်းဆန်စိမ်းလောင်းလှူပွဲတွင် ဘုန်းကြီးကျောင်း (၁၀၂)ကျောင်း ပင့်ဆောင်ပြီး သံဃာတော်နှင့် သီလရှင် စုစုပေါင်း (၁၀၀၀)ကျော် လာရောက်ဆွမ်းခံခဲ့ကြောင်း စုံစမ်းသိရှိရသည်။
ထို လာရောက် ဆွမ်းခံသည့် ကျောင်းများသည် မူဆယ်ခရိုင်အတွင်း မူဆယ်၊ နမ့်ခမ်း၊ ကွက်ခိုင်၊ မုံးကိုး၊ မန့်ဟျှိုး(မန့်ဟီးရိုး)၊ ပန်ဆိုင်း၊ မုံးပေါ် စသည့် ကျောင်းများမှ ပင့်ဆောင်ခဲ့ကြောင်း သိရှိရသည်။
Leave a Comments