သျှမ်းပြည်တောင်ပိုင်း တောင်ကြီးမြို့တွင် ပြုလုပ်သော ဗဟိုမဏ္ဍပ်အခမ်းအနားအတွက် မြို့ပေါ် ရပ်ကွက်များအလိုက် နယ်မြေတစ်ခုလျှင် ၂၅ ဦး တက်ရောက်ရန် စစ်ကောင်စီက ညွှန်ကြားကြောင်း သတင်း သိရသည်။
မကြာမီကျရောက်တော့မည့် သင်္ကြန်ပွဲတော် စည်ကားစေရန် အာဏာသိမ်း စစ်ကောင်စီဘက်က ကြိုးစားနေသည်ဟု တောင်ကြီးမြို့ပေါ် ရပ်ကွက်နေ အငြိမ်းစားအရာရှိတစ်ဦးက သျှမ်းသံတော်ဆင့်ကို ပြောသည်။
“သူတို့လုပ်တဲ့ သင်္ကြန်ပွဲ စည်တယ်ဆိုတာကို ပြချင်တာ၊ အခုလည်း ရပ်ကွက်အုပ်ချုပ်ရေးမှူးကတစ်ဆင့် နယ်မြေတစ်ခုကို ၂၅ ဦး တက်ဖို့ ပြောလာတယ်၊ ကျနော်တို့အသိုင်းဝန်းကတော့ သွားမှာမဟုတ်ပါဘူး” ဟု အထက်ပါ အငြိမ်းစား ပုဂ္ဂိုလ်က ပြောသည်။
တောင်ကြီးမြို့ပေါ်တွင် မြို့ပေါ်ရပ်ကွက်ပေါင်း ၂၂ ရပ်ကွက်ရှိနေပြီး ရပ်ကွက်တစ်ခုလျှင် နယ်မြေပေါင်း ၂၀ ဝန်းကျင်ခန့်ရှိနေကြောင်းလည်း သိရသည်။
သင်္ကြန်ရေကစားရန်အတွက် ဗဟိုမဏ္ဍပ်ကို စစ်ကောင်စီတို့က တောင်ကြီးမြို့ သစ်တောရပ်ကွက်ရှိ သျှမ်းပြည်လွှတ်တော်ရုံး နှင့် အစိုးရရုံးကြားတွင်တည်ဆောက်ထားခြင်းဖြစ်ပြီး လုံခြုံရေးလည်း များစွာ ချထားကြောင်း ကံကြီးရပ်ကွက်နေ အမျိုးသမီးတစ်ဦးကလည်း သျှမ်းသံတော်ဆင့်ကို ပြောသည်။
“ပွဲတောင်မဖြစ်သေးဘူး၊ လုံခြုံရေးအင်အားကတော့ အရမ်းကို များနေတာ၊ အိမ်တော်ထောင့်နားမှာ မျှော်စင်ကြီးနဲ့ ရဲကင်းလည်းထားမယ်တဲ့၊ ဒါကတော့ ရဲဖြစ်တဲ့ မိတ်ဆွေတစ်ယောက်က ပြောပြတာ” ဟု အထက်ပါ ကံကြီးရပ်ကွက်မှ အမျိုးသမီးက ပြောသည်။
စစ်ကောင်စီတို့သည် ရပ်ကွက်နေပြည်သူများကို မဏ္ဍပ်သို့ တက်ရောက်ရန် ဖိအားပေး စေခိုင်းမှုများ ရှိနေသည့်အပြင် ကုမ္ပဏီများနှင့် စီးပွားရေးလုပ်ငန်းရှင်များကို မဏ္ဍပ်ထွက်ရှိရန် ဖိအားပေး ညွှန်ကြားမှုများ ရှိနေကြောင်း သိရသည်။
စစ်တပ်အာဏာသိမ်းမှုကို လက်မခံသည့်ပြည်သူများနှင့် လက်နက်ကိုင်ဆန့်ကျင်တော်လှန်ရေး တပ်သားများက စစ်ကောင်စီမှ ပြုလုပ်နေသည့် သင်္ကြန်ပွဲတော်များတွင် ပြည်သူများ ပါဝင်ဆင်နွဲခြင်းမပြုဘဲ သပိတ်မှောက်ကြရန် ပြောဆိုလှုံ့ဆော်မှုများ ရှိနေသည်။
