သျှမ်းပြည်အရှေ့ပိုင်း မိုင်းလားမြို့တွင် ကိုဗစ် – ၁၉ ကပ်ရောဂါ ကူးစက်ပျံ့ပွားမှုကို တားမြစ်နိုင်ရန် အလို့ငှာ တစ်မြို့လုံး၌ အာခေါင်တို့ဖတ် ဓါတ်ခွဲနမူနာစစ်ဆေးပြီးနောက် Lockdown ကိုလည်း ဖြေလျှော့လိုက်ကြောင်း သတင်းသိရသည်။

ဧပြီလ ၆ ရက် နှင့် ၇ ရက်နေ့ကို မိုင်းလားမြို့ တစ်မြို့လုံး၌ အာခေါ်တို့ဖတ် စစ်ဆေးမှု ဆောင်ရွက်ခဲ့ပြီး ကိုဗစ် – ၁၉ ရောဂါ ကာကွယ်ထိန်းချုပ်ရေးဦးစီးအဖွဲ့၏ ဆုံးဖြတ်ချက်အရ ဧပြီလ ၇ ရက်နေ့မှ စတင်ကာ မိုင်းလားမြို့ကို Lockdown မှ ဖြေလျှော့လိုက်သည်။

ပြည်သူများအနေဖြင့် စီးပွားရေးလုပ်ငန်းများကို လုပ်ဆောင်နိုင်ခဲ့ပြီးဖြစ်ကြောင်း သျှမ်းပြည်အရှေ့ပိုင်း အထူးဒေသ ၄ မှ ကိုဗစ် – ၁၉ ရောဂါ ကာကွယ်ထိန်းချုပ်ရေးဦးစီးအဖွဲ့က ထုတ်ပြန်ကြေညာထားသည်။

ထို့အပြင် မိုင်းလားတစ်မြို့လုံး၌ အာခေါင်တို့ဖတ် ဓါတ်ခွဲနှမူနာကို နှစ်ကြိမ်တိုင် စစ်ဆေးခဲ့ပြီး ဒေသအတွင်းမှ ကပ်ရောဂါ ထိန်းချုပ်မှုအခြေအနေသည် တည်ငြိမ်နေလျက်ရှိကြောင်းနှင့် မိုင်းလားမှ နမ့်ပန်သို့လည်း ပုံမှန်အတိုင်း သွားလာနိုင်ပြီဖြစ်ကြောင်း အဆိုပါ ထုတ်ပြန်ချက်တွင် ပါရှိသည်။

မိုင်းလားဒေသကို ပြီးခဲ့သည့် မတ်လ ၂၅ ရက်နေ့မှ စတင်ကာ Lockdown ချထားခြင်းဖြစ်ပြီး ယမန်နေ့ ဧပြီလ ၇ ရက်နေ့မှာ ပြန်လည်ဖြေလျော့ခြင်းဖြစ်သည်။