သျှမ်းပြည်မြောက်ပိုင်း မူဆယ်မြို့ သိန်းသန်းချီ ကားကြီးကွင်းအနီး ပြည်သူ့စစ်သင်တန်းနေရာ ဗုံးပေါက်ကွဲမှု ၂ ကြိမ်ဆက်တိုက် ဖြစ်ပွားခဲ့ကြောင်း စုံစမ်းသိရှိရသည်။
ယနေ့ ဧပြီ (၇)ရက် နေ့လည် ၁၂ နာရီဝန်းကျင်တွင် သိန်းသန်းချီ ကားကြီးကွင်းအနီး ပြည်သူ့စစ် သင်တန်းရှိရာ နေရာတွင် ပေါက်ကွဲသွားကြောင်း သိန်းသန်းချီ ကားကြီးကွင်းအနီး နေထိုင်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ပွဲတော်ထမင်းဆိုင်နောက်မှာ လောင်းကစားရှိတယ်။ အဲ့ကြားမှာ ပြည်သူ့စစ်သင်တန်း ရှိတဲ့နေရာဖြစ်တယ်။ ဘယ်အဖွဲ့က လာပစ်သွားတာလဲတော့ မသိရှိရသေးဘူး” ဟု ၎င်းက ဆက်ပြောသည်။
အဆိုပါ ပြည်သူ့စစ်သည် မည်သည့်အဖွဲ့အစည်းက ပြည်သူ့စစ်ဖြစ်သည်ကို သျှမ်းသံတော်ဆင့် မှ အတည်ပြု မရသေးပေ။
“ဘယ်အဖွဲ့က ပြည်သူ့စစ်လဲ မသိရှိရသေးဘူး။ လူထိခိုက်ဒဏ်ရာရတာ ရှိ မရှိလဲ မသိရသေးဘူး။ အသေးစိတ် အချက်အလက်ကို ကျနော်တို့လဲ မသိရဘူး” ဟု အထက်ပါ လူငယ်က ထပ်လောင်းပြောသည်။
ပြီးခဲ့သည့် မတ်လ (၈)ရက်နေ့တွင်လည်း မူဆယ်မြို့ မြောက်ရပ်ကွက် နာရေးပြုလုပ်နေသည့် နေအိမ်ကို အမည်မသိလက်နက်ကိုင်တပ်ဖွဲ့မှ လာရောက်ပစ်ခတ်ရာ (၂)ဦး သေဆုံးသွားပြီး (၂)ဦး ထိခိုက်ဒဏ်ရာ ရရှိခဲ့သည်။
မူဆယ်မြို့သည် တိုင်းရင်းသားလက်နက်ကိုင်များ နှင့် စစ်ကောင်စီလက်အောက်ခံ ပြည်သူ့စစ်တပ်ဖွဲ့များ သွားလာလှုပ်ရှားသည့် နေရာဖြစ်သည့်အပြင် သတ်ဖြတ်လုယက်မှုများလည်း မကြာခဏ ဖြစ်ပွားသည့် နယ်စပ်မြို့တစ်မြို့ ဖြစ်သည်။
Leave a Comments