သျှမ်းပြည်မြောက်ပိုင်း ကျောက်မဲမြို့တွင် ပြီးခဲ့သည့် ဧပြီ ၄ ရက် မနက်အစောပိုင်းက လက်နက်ကိုင်ထားသည့် လူတစ်စုမှ နေအိမ်အတွင်း ဝင်ရောက်မွှေနှောက်ပြီး ငွေများ ယူဆောင်သွားခဲ့ကြောင်း သတင်းသိရသည်။ 

ဧပြီ ၄ ရက် မနက် ၃ နာရီဝန်းကျင် ကျောက်မဲမြို့ ရပ်ကွက် ၈ အင်ကြင်းတောင်ရှိ နေအိမ် ၃ အိမ်အား လက်နက်ကိုင်ဆောင်ထားသည့် လူတစ်စုမှ ဝင်ရောက် မွှေနှောက်ကာ ငွေ ၂ သိန်းကျော် ယူဆောင်သွားသည်ဟု ဒေသခံ အမျိုးသားတစ်ဦးက ပြောသည်။ 

“လက်နက်တွေ ကိုင်ထားတယ်လို့ ပြောတယ်၊ မိန်းကလေးလည်းပါတယ်၊ တစ်အိမ်ကိုတော့ ဒီတိုင်း ဘာမှ မပြောပဲ တံခါးကို ကန်ပြီး ဝင်လာတာ၊ အဲ့အိမ်က ပိုက်ဆံ ၂ သိန်းပါသွားတယ်၊ နောက်တစ်အိမ်က အိမ်ရှင်ကို ခေါ်ပြီးမှ ဝင်လာတာ၊ အိမ်ရှင်အမျိုးသားကို မျက်နာအုပ်၊ လက်နောက်ပြန်ချည်ထားပြီး စောင့်နေခိုင်းတယ်၊ ဖောက်ဝင်တာက ၃ အိမ်ပါ၊ တစ်အိမ်ကတော့ အိမ်ရှင်မရှိဘူး၊ စကားပြောသံကတော့ ဗမာ အသံပဲ၊ ဘိန်းရောင်းတယ် လို့ သတင်းရလို့ လာစစ်တာ ဆိုပြီး ပြောတာတဲ့၊ အိမ်ထဲ အကုန် မွှေနှောက်သွားတာ” ဟု ကျောက်မဲ ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။ 

ဝင်ရောက်မွှေနှောက်ခံရသည့် နေအိမ် ၃အိမ်ရှိပြီး အိမ်ရှင် မရှိသည့် နေအိမ် တစ်အိမ်နှင့် အိမ်ငှားနေထိုင်သည့် နေအိမ် ၂ အိမ်ဖြစ်ကြောင်း၊ လက်နက်ကိုင်ထားသူ အင်အား ၁၃ ယောက်ဝန်းကျင် ရှိပြီး ကား ၃ စီး၊ ဆိုင်ကယ် ၁ စီးဖြင့် ရောက်လာတာဖြစ်ကြောင်း သိရသည်။ 

ကျောက်မဲမြို့နယ်တွင် ယခုလို ည အချိန်မတော် နေအိမ်အတွင်း ဝင်ရောက်မွှေနှောက်ခံရသည့် အတွက် လုံခြုံရေး စိုးရိမ်ထိတ်လန့်နေရတယ်လို့ ဒေသခံများက ပြောသည်။ 

“ကျောက်မဲက အရင်က ဒီလို မဖြစ်ဖူးဘူး၊ ခုဖြစ်သွားတာကလည်း နယ်မြေမှူးတွေ၊ အုပ်ချုပ်ရေးမှူးတွေ ပါလား မပါလား မသိဘူး၊ ခုက နိုင်ငံရေးလည်း မကောင်းဘူး၊ ကြားနေရတာပဲ၊ ပေါ်တာဆွဲတာတွေ၊ လူသစ်စုဆောင်းတာတွေရော ဆိုတော့ ညဆိုလည်း စောစောအိပ်ရတယ်၊ တံခါးတွေပိတ်၊ မီးတွေ ပိတ်ပြီး ကြောက်ကြောက်လန့်လန့်နဲ့ အိပ်နေရတာ၊ ကျနော်တို့ ပြည်သူတွေအတွက် ပိုပြီးတော့ မလုံခြုံတော့ဘူးလို့ ခံစားမိတာပေါ့” ဟု အထက်ပါ ဒေသခံအမျိုးသားက ပြောသည်။ 

အဆိုပါ ရပ်ကွက် ၈ သည် မြို့တွင်းရပ်ကွက်ဖြစ်သော်လည်း လက်နက်ကိုင်ဆောင်သူများမှ ဝင်ရောက်မှုတွေ ရှိလာသည့်အတွက် ပိုစိုးရိမ်နေရကြောင်း ဒေသခံများက ပြောသည်။ 

ကျောက်မဲမြို့တွင် ပြီးခဲ့သည့် ရက်ပိုင်းက မြို့နယ်စည်ပင်သာယာရေးရုံးအနီး ဗုံးပေါက်ကွဲမှု ဖြစ်ပွားပြီးသည့်နောက် လမ်းသွားလမ်းလာ ပြည်သူများအား စစ်ကောင်စီတို့မှ ပိုမိုစစ်ဆေး တင်းကြပ်နေသည်။ 

ထို့အပြင် ယမန်နေ့ ညပိုင်းတွင်လည်း လက်နက်ကြီးပစ်ခတ်သံများ ကြားခဲ့ရကြောင်း သိရသည်။