သျှမ်းပြည်တောင်ပိုင်း ဆီဆိုင်မြို့နယ်အတွင်းရောက်ရှိလာသည့် ကရင်နီပြည်နယ် စစ်ရှောင်များတစ်ချို့ ထမင်းနပ်မှန် မစားရသူများလည်းရှိနေကြောင်း စုံစမ်းသိရှိရသည်။
အဆိုပါ ထမင်းနပ်မှန်မစားရသည့် စစ်ရှောင်များသည် ကျန်းမာရေးမကောင်းသူများ၊ အသက်အရွယ်ကြီးသူများ ဖြစ်သည့်အတွက် စစ်ရှောင်စခန်းမနေနိုင်သဖြင့် နေအိမ် လိုက်လံငှားနေရသူများ ဖြစ်သည်။
“တစ်ချို့ စစ်ရှောင်တွေက ထမင်းနပ်မှန်မစားရတာလည်းရှိတယ်။ အစားအသောက်ခက်ခဲကြတာပေါ့။ ပြီးတော့ နေရပ်ကိုလည်း မပြန်နိုင်သေးဘူးလေ။ သူတို့တွေက နေအိမ်တွေမှာ လိုက်ငှားနေတဲ့သူတွေဖြစ်တယ်” ဟု ဆီဆိုင်မြို့နယ် စစ်ရှောင်များကို ကူညီပေးနေသည့် အမျိုးသားတစ်ဦးက ပြောသည်။
ထိုထမင်းနပ်မှန် မစားရသူများသည် လေဖြတ်သူများနှင့် မသန်စွမ်းတဲ့သူများဖြစ်သည့်အတွက် အများဖြင့်နေထိုင်ရန် ခက်ခဲကြောင်း သိရသည်။
“တစ်ချို့အိမ်ငှားနေတယ်ဆိုတာက အများနဲ့ နေဖို့အဆင်မပြေတာကြောင့်ဖြစ်တယ်။ ဥပမာ သူတို့မိသားစုကြီးပြီး ကလေးက အရမ်းဆိုးတာ။ သူများကို အားနာရတာကြောင့် ဘုန်းကြီးကျောင်းမှာ လာမနေတာရှိတယ်။ တစ်ချို့က ကျန်းမာရေးမကောင်းမွန်တာတွေရှိတယ်။ လေဖြတ်နေတဲ့သူတွေရှိတယ်။ မသန်စွမ်းတဲ့သူတွေရှိတယ်။ တစ်ချို့က တကယ်ပိုက်ဆံရှိလို့ အပြင်ငှားနေကြတယ်” ဟု အထက်ပါ အမျိုးသားက ပြောသည်။
ဆီဆိုင်မြို့နယ်တွင် ကရင်နီပြည်နယ် စစ်ရှောင် စုစုပေါင်း (၃၀၀၀) နီးပါးရှိကြောင်း သိရသည်။ ထိုစစ်ရှောင်များ၏ နေရပ်တွင် တိုက်ပွဲဆက်ဖြစ်နေသေးသောကြောင့် မပြန်နိုင်သေးကြောင်း သိရသည်။
လက်ရှိအချိန်ထိ ကရင်နီပြည်နယ် ဒီမော့ဆိုမြို့နယ်အတွင်း စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့ PDF တို့ တိုက်ပွဲ ဆက်ဖြစ်ကြောင်း သိရသည်။
Leave a Comments