သျှမ်းပြည်မြောက်ပိုင်း ကွတ်ခိုင်မြို့နယ် အတွင်းတွင် တိုက်ပွဲဖြစ်ပွားခဲ့ပြီးနောက် ယနေ့ အထိ ယာဥ်များက ရပ်တန့်ထားနေရကြောင်း သတင်းသိရသည်။
ယမန်နေ့ ဧပြီလ ၄ ရက်နေ့ နေ့လည်ပိုင်း ၁၂ နာရီဝန်းကျင်အချိန်အတွင် ကွတ်ခိုင်မြို့နယ်အလွန် နမ့်ကွတ်ကျေးရွာ အနီး တိုက်ပွဲဖြစ်ပွားခဲ့ပြီး ယနေ့ (ဧပြီ ၅)ရက်ထိ ယာဥ်တန်းများ ရှေ့မဆက်နိုင်ဘဲ ရပ်တန့်ထားနေရကြောင်း ဒေသခံအမျိုးသမီး တစ်ဦးက သျှမ်းသံတော်ဆင့်ကို ပြောသည်။
“မနေ့က နေ့လည်ပိုင်း ၁၂ နာရီဝန်းကျင်လောက်မှာ ပစ်ခတ်သံတွေ ကြားရပါတယ်၊ ကွတ်ခိုင်မြို့အကျော် နမ့်ကွတ်အနီးမှာ တိုက်ပွဲဖြစ်ပွားခဲ့တာပေါ့၊ စစ်ကောင်စီနဲ့ TNLA တွေ တိုက်ပွဲဖြစ်တယ်လို့ သိရပါတယ်” ဟု ဒေသခံအမျိုးသမီးတစ်ကီးက သျှမ်းသံတော်ဆင့်ကို ပြောသည်။
ထို့အပြင် ယမန်နေ့ ဧပြီလ ၅ ရက်နေ့ မနက်အစောပိုင်း တိုက်ပွဲမဖြစ်ပွားခင်တွင် ကွတ်ခိုင်မြို့ နမ့်ခိုက်အနီးတွင် လက်နက်ကိုင် TNLA စစ်သားတစ်စုက လမ်းသွားလမ်းလာပြည်သူများကို ပိုက်ဆံတောင်းနေသလို ကွတ်ခိုင် – မူဆယ် လမ်းမကြီးရှိ မိုင်းစီးလမ်းခွဲမှာလည်း စစ်ကောင်စီတပ်သားနှင့် ရဲသားတို့က ပိုက်ဆံတောင်း နေကြောင်းလည်း ဒေသခံများက ပြောသည်။
“နမ့်ခိုက်နားမှာ TNLA စစ်သားတွေက ကားသမားတွေ လမ်းသွားလမ်းလာတွေကို ပိုက်ဆံတောင်းနေတာ၊ ကားကြီးဆို ၃ သိန်း၊ ကားငယ်ဆို ၁ သိန်းတောင်းတယ်၊ အဲ့လိုပဲ မိုင်းစီး လမ်းခွဲနားမှာလည်း စစ်သားနဲ့ ရဲတွေက စောင့်ပြီး ပိုက်ဆံထပ်တောင်းပြန်တယ်၊ ပြီးတော့ ရှေ့မှာစောင့် TNLA စစ်သားတွေကိုလည်း ပေးခဲ့လား ဘယ်လောက်ပေးခဲ့ရလဲ ဆိုပြီး အဲ့အတိုင်းတောင်းတယ်” ဟု ကွတ်ခိုင်မြို့မှ အသက် ၂၅နှစ်အရွယ် ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယင်းနောက် နေ့ခင်းပိုင်း ၁၂ နာရီဝန်းကျင်တွင် ပစ်ခတ်သံများ ထွက်ပေါ်လာပြီးနောက် အဆိုပါ လမ်းမကြီးပေါ်ရှိ ယာဥ်များက လမ်းဘေးသို့ရပ်နားထားရကြောင်း သတင်းသိရသည်။
“မနေ့က တိုက်ပွဲဖြစ်တော့ ကားတွေက လမ်းမဘေးမှာ ရပ်ထားလိုက်ရပါတယ်၊ ဒီနေ့မနက်ဖွင့်သေးလားတော့ မသေချာဘူး၊ အခုထိတော့ ကားတွေ ပိတ်ထားတုန်းပဲ” ဟု လည်း ကြုံတွေ့ရသည့် ကားသမားတစ်ဦးက ပြောသည်။
ကွတ်ခိုင်မြို့နယ်အတွင်း ပြည်ထောင်စုလမ်းမ အပါအဝင် တောစပ်ကြား နေရာများတွင် အာဏာသိမ်း စစ်ကောင်စီတပ်များနှင့် KIA, TNLA, MNDAA မြောက်ပိုင်းမဟာမိတ်တပ်ဖွဲ့များ မကြာခဏ တိုက်ပွဲဖြစ်ပွားလေ့ရှိကြောင်းသိရသည်။
