သျှမ်းပြည်အရှေ့ပိုင်း မိုင်းပျဉ်းမြို့တွင် ရှင်လောင်းပွဲ ပြုလုပ်သည့်ကျောင်းအတွင်း၌ လောင်းကစားဝိုင်းများ ထည့်သွင်း ဖွင့်လှစ်ထားကြောင်း စုံစမ်းသိရသည်။
မိုင်းပျဉ်းမြို့ ထေရဝါဒ ဗုဒ္ဓသာသနာပြု “ဗဟို” ကျောင်းတွင် ဧပြီ ၂ ရက်မှစပြီး ၁၁ ရက်အထိ ရှင်လောင်းအပါး (၁၀၀)ဖြင့် ၁၀ ရက်ကြာ ရှင်လောင်းပွဲကို စည်ကားစွာ ကျင်းပသွားမည်ဖြစ်ပြီး ထိုရှင်လောင်းပွဲအတွင်းတွင်လည်း လောင်းကစားဝိုင်း များစွာ ရှိထားကြောင်း သိရသည်။
“ပွဲကိုတော့ ၁၀ ရက်တိုင် စည်စည်ကားကားပြုလုပ်သွားမယ်။ တကယ်လည်းစည်ကားပါတယ်။ ညဆိုရင် လူပိုများတယ်။ လောင်းကစားဝိုင်းတွေကလည်း အများကြီးပဲ။ ဂုန်းကင်း၊ ဖဲဝိုင်း၊ လေးကောင်ဂျင်တွေ စုံနေတာပဲ။ လောင်းကစားဝိုင်းဆိုရင် စားသောက်ဆိုင်ထက်တောင်များတယ်” ဟု မိုင်းပျဉ်းမြို့ ဒေသခံ အမျိုသမီး တစ်ဦးက ပြောသည်။
အဆိုပါ လောင်းကစားဝိုင်းအတွင်းတွင် ပြည်သူ့စစ်တွေက လက်နက်အပြည့်ဖြင့် လုံခြုံရေး ယူပေးထားလျက်ရှိပြီး ထိုဘုန်းကြီးကျောင်းသည် စစ်တပ် အဓိကထား ကိုးကွယ်ကြသည့် ဘုန်းကြီးကျောင်းလည်း ဖြစ်ကြောင်း သိရသည်။
“အဲ့ကျောင်းက စစ်တပ်တွေ အဓိကထားပြီး ကိုးကွယ်ကြတဲ့ကျောင်းဖြစ်တယ်။ ညညဆိုရင်လည်း လောင်းကစားဝိုင်း အထဲမှာ ပြည်သူစစ်တွေ လုံခြုံရေးလာယူထားပေးကြတယ်။ သေနတ်တွေလည်းပါတယ်။ လူလည်း အများကြီးပဲ။ လောင်းကစားလာဆော့တဲ့သူ တိုးပြီးတော့တောင်ဝင်ရတယ်” ဟု မျက်မြင်ကိုယ်တိုင်တွေ့ခဲ့သည့် အမျိုးသမီးက ပြောသည်။
မိုင်းပျဉ်းမြို့သည် ယခုရက်ပိုင်း ပွဲများဆက်တိုက်ရှိနေပြီး ပွဲတိုင်းနီးပါး လောင်းကစားဝိုင်းများ ပါရှိနေကြောင်း သိရသည်။
ယခင် NLD အစိုးရလက်ထက်က ပွဲလမ်းသဘင်များတွင် လောင်းကစားဝိုင်းများ ဖွင့်ခွင့်မရှိပဲ ယခု စစ်ကောင်စီ လက်ထက်တွင် ပွဲတိုင်းနီးပါး လောင်းကစားဝိုင်းများပါရှိပြီး သျှမ်းပြည်တစ်ဝှမ်းရှိ မြို့နယ်တိုင်း လောင်းကစားဝိုင်းများ ယခင်ထက် ပိုမို များပြားစွာရှိလာကြောင်း သိရသည်။
