သျှမ်းပြည်တောင်ပိုင်း လဲချားမြို့နယ်အတွင်းရှိ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) ယာယီစခန်းအနီးတစ်ဝိုက်တွင် စစ်ကောင်စီတပ်ဖွဲ့မှ အင်အင်းတိုးချဲ့ကာ စခန်းလာချနေကြောင်း သတင်းသိရသည်။
စစ်ကောင်စီတပ်ဖွဲ့တို့သည် လဲချားမြို့နယ်နှင့် ထိစပ်နေသည့် နမ့်စန်မြို့နယ်မှ နောင်ဟီးကျေးရွာအုပ်စု နမ့်မိုကျေးရွာအတွင်းတွင် လာရောက်စခန်းချ တပ်စွဲထားကြောင်း ဒေသခံများက သျှမ်းသံတော်ဆင့်ကို ပြောသည်။
“စစ်ကောင်စီတပ်သားတွေက နမ့်မိုကျေးရွာမှာ တပ်စွဲထားပါတယ်၊ အဲ့ကျေးရွာကနေ လဲချားမြို့နယ်ဘက်ကို သွားလို့လည်း ရတယ်၊ ပြီးတော့ စစ်ကောင်စီတွေ နေရာယူထားတဲ့ နမ့်မိုကျေးရွာဟာ SSPP/SSA တပ် စခန်းရှိတဲ့ နေရာနဲ့လည်း မဝေးဘူး” ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်သားတို့သည် အင်အား ၈၀ မှ ၁၀၀ ဝန်းကျင်ခန့်ရှိနေပြီး စရောက်ကာစတွင် နမ့်မိုကျေးရွာမှ ဘုန်းကြီးကျောင်းဝန်းအတွင်းတည်းခိုပြီးနောက် ရွာသားများကို ကတုတ်ကျင်းတူးလုပ်အားပေးရန် ဆင့်ခေါ် ကြောင်းလည်း သတင်းသိရသည်။
“နမ့်မိုရွာထဲမှာ အရင်တုန်းက ဘယ်တပ်မှ စခန်းချဖူးတာ မရှိဖူးပါဘူး၊ ဒါပေမဲ့စစ်ကောင်စီတွေရောက်လာတော့ ရွာအရှေ့ဘက် (ရွာဦး) ဘက်မှာ သူတို့တပ်စခန်းအတွက် မြေကျင်းတူတာတွေကို လုပ်အားပေးခိုင်းတယ်” ဟု ဖြစ်စဥ်များကိုသိရသည့် ဒေသခံအမျိုးသားတစ်ဦးကသျှမ်းသံတော်ဆင့်ကို ပြောသည်။
နမ့်မိုကျေးရွာသည် နမ့်စနမြို့နယ် နောင်ဟီးကျေးရွာအုပ်စုအတွင်းတွင် တည်ရှိပြီး အိမ်ခြေ ၇၀ နီးပါးရှိသည့် ကျေးရွာတစ်ရွာဖြစ်ကြောင်းလည်း သိရသည်။
ထို့အပြင် နမ့်မိုကျေးရွာနှင် သိပ်မကွာဝေးသည့် လဲချားမြို့နယ်မှ ဟိုင်းဆိုင်ကျေးရွာဘက်တွင်လည်း SSPP/SSA တို့၏ ယာယီတပ်စခန်းလည်း ရှိနေကြောင်းလည်း သိရသည်။
ပြီးခဲ့သည့် မတ်လ ၃၁ ရက်နေ့တွင် SSPP/SSA တပ်ဖွဲ့နှင့် အာဏာသိမ်းစစ်တပ်ဖွဲ့တို့က နေပြည်တော်မှာ တွေ့ဆုံ ဆွေးနွေးရာ သျှမ်းတောင်ရှိ SSPP/SSA တပ်ချို့ကို အာဏာသိမ်းစစ်တပ်က တပ်ဆုတ်ခိုင်းသည့် ညှိနှိင်းမှု အဆင် မပြေ ခဲ့ရာမှ ယခုလို အင်အားတိုးချဲ့ စခန်းချမှုဖြစ်လာကြောင်းလည်း နမ့်စန်မြို့နယ်အတွင်း လှုပ်ရှားနေသည့် ပြည်သူ့စစ်တပ်ဖွဲ့မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“တိုက်ပွဲမဖြစ်စေချင်ရင် ဆုတ်ပေးဖို့ဆိုပြီး စစ်ကောင်စီက နေပြည်တော်မှာ ပြောခဲ့တယ်လေ၊ ဆုတ်တာ မဆုတ်တာ က သူတို့ (SSPP/SSA) အပိုင်းပေါ့၊ နေပြည်တော်မှာ ဆွေးနွေးညှိနှိုင်းမှုအဆင်မပြေလို့ နှစ်ဖက်က စစ်အင်အားတွေ တိုးချဲ့နေတယ်လို့ မြင်မိပါတယ်” ဟု နမ့်စန်မြို့ရှိ ပြည်သူ့စစ်တပ်ဖွဲ့မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ၂၀၂၁ ခုနှစ် ဇွန်လမှ စတင်ကာ SSPP/ SSA သည် မဟာမိတ်တပ်ဖွဲ့များနှင့် ပူးပေါင်းပြီး သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) တပ်များကို သျှမ်းပြည်တောင်ပိုင်း ရပ်စောက်မြို့အထိ ပြင်းထန်စွာ ထိုးစစ်ဆင် တိုက်ထုတ်ခဲ့သည့် နောက်ပိုင်းတွင် စစ်ကောင်စီတပ်ဖွဲ့က SSPP/SSA တပ်များအား သျှမ်းမြောက်ဘက်သို့ ပြန်ဆုတ်ရန် နေပြည်တော်သို့ ခေါ်ယူဆွေးနွေးခဲ့ခြင်း ဖြစ်သည်။
ယင်းဖြစ်စဥ်များနှင့် ပက်သက်ပြီး သျှမ်းပြည်တိုးတက်ရေးပါတီ၊ သျှမ်းပြည်တပ်မတော်၏ ပြောရေးဆိုခွင့်ရှိ သူများကို ဖုန်းဖြင့် အကြိမ်ကြိမ်ကြိုးစားဆက်သွယ်ခဲ့သော်လည်း ဆက်သွယ်မှု မရရှိနိုင်ခဲ့ပေ။
Leave a Comments