သျှမ်းပြည်မြောက်ပိုင်း မုံးကိုးမြို့နယ် ကျေးရွာများတွင် ကိုးကန့်တပ်ဖွဲ့ ( MNDAA) နှင့် တအာင်း (ပလောင်) TNLA တပ်ဖွဲ့ တို့မှ တပ်သားသစ် ကောက်ယူစုဆောင်းမှုကြောင့် ဒေသခံများက ထွက်ပြေးတိမ်းရှောင် နေရကြောင်း သတင်းသိရသည်။

မုံးကိုးမြို့နယ် ပန်ဆေတိုင်း ကျေးရွာအတွင်းတွင် အသက် ၁၀ နှစ်စွန်းစွန်း ကလေးသူငယ်များအပါအဝင် ရွာသူ/ရွာ သားများကို MNDAA နှင့် TNLA တို့က အပြိုင်အဆိုင် စစ်သားကောက်နေကြောင်း ထွက်ပြေးတိမ်းရှောင်လာသူ ပန်ဆေတိုင်း ကျေးရွာမှ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျနော်တို့ရွာမှာ ပလောင်လူမျိုးအများစု နေထိုင်ကြတာ၊ အဲ့ဒီတော့ TNLA က စစ်သားလာကောက်တယ်၊ ပြီးတော့ ရွာထဲမှာ MNDAA တို့ကလည်း ရှိနေလို့ သူတို့လည်း စစ်သားကောက်နေတယ်၊ ကလေးငယ်ရော အမျိုးသား အမျိုးသမီးရော ယူကြတာ၊ အဲ့ကြောင့် ကျနော်တို့ တစ်ရွာလုံးနီးပါး ထွက်ပြေးလာရတယ်” ဟု အထက်ပါအမျိုးသားက သျှမ်းသံတော်ဆင့်ကို ပြောသည်။

ပန်ဆေတိုင်းကျေးရွာအပြင် ဖာငပ်ရွာ၊ လွယ်ဝိန်းရွာ၊ မာန်ကောင်းရွာ၊ ဖန်ဖာရွာ၊ ရှောက်ရွှေစင်းရွာ၊ မန်ခါး နှင့် နောင်ဝရွာ စသည့် ကျေးရွာများတွင်လည်း နှစ်ဖက်တပ်ဖွဲ့တို့၏ အပြိုင်အဆိုင် စစ်သားကောက်ယူမှုများလည်း ရှိနေကြောင်း ဒေသခံများက ပြောသည်။

“တချို့ကျေးရွာတွေက မြို့နဲ့အရမ်းဝေးပြီး နယ်မြေမငြိမ်းချမ်းလို့ လမ်းတွေပိတ်ထားရတဲ့ နောင်ဝကျေးရွာဆိုရင် ရှောင်လို့ မရလို့ နှစ်ဖွဲ့လုံးဆီကို ရွာသားတော်တော်များများ ပေးလိုက်ရတယ်၊ ရှောင်လို့ရတဲ့သူတွေတော့ မြို့ပေါ် ကို ရှောင်လာကြတယ်၊ အသက် ၁၂ အရွယ် ကောင်လေး နဲ့ ၁၅ နှစ်အရွယ် ကောင်မလေးလည်း ပါသွားတယ်” ဟု ရှောင်ရွှေစင်းရွာမှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် မုံးကိုးမြို့နယ်အတွင်းတွင် ကိုးကန့်တပ်ဖွဲ့ နှင့် စစ်ကောင်စီတပ်ဖွဲ့တို့၏ တိုက်ပွဲများလည်း နေ့စဥ်နီးပါးရှိနေပြီး စစ်ကောင်စီဘက်မှ ပစ်လိုက်သည့် လက်နက်ကြီးများက ကျေးရွာအတွင်းသို့ မကြာခဏကျလေ့ရှိကြောင်း ဒေသခံများက ပြောသည်။

“ကိုးကန့်တပ်ဖွဲ့က ကျနော်တို့ရွာထဲမှာ စခန်းချတော့ စစ်ကောင်စီတွေက လက်နက်ကြီး၊ လက်နက်ငယ်နဲ့ လှမ်းပစ် တယ်၊ အဲ့ဒီလက်နက်ကြီးတွေ ကျည်ဆန်တွေက ပြည်သူအိမ်တွေ ဘုန်းကြီးကျောင်းတွေ ထိမှန်ပြီး အများကြီး ပျက်စီးရတယ်၊ အဲ့ကြောင့် ဘုန်းကြီးကျောင်းက သံဃာတွေလည်း အကုန်ထွက်ပြေးရတယ်” ဟု ကျေးရွာအတွင်း လက်နက်ကြီးကျခဲ့သည့်အကြောင်းကို ပန်ဆေတိုင်းကျေးရွာဒေသခံက သျှမ်းသံတော်ဆင့်ကို ပြောသည်။

ပြီးခဲ့သည့် ၂၀၂၁ ခုနှစ် ဇူလိုင်လအတွင်းမှ လက်ရှိအချိန်ထိ မုံးကိုးမြို့နယ်အတွင်းတွင် MNDAA တပ်ဖွဲ့နှင့် စစ်ကောင်စီတို့က ပြင်းထန်စွာတိုက်ပွဲဖြစ်ပွားခဲ့ပြီး လက်ရှိတွင် မုံးကိုးမြို့ပေါ်ရှိသည့် စစ်ဘေးရှောင် ဦးရေ ၈၀၀ ကျော်တို့သည် စားနပ်ရိက္ခာအရေးပေါ်လိုအပ်နေကြောင်း သတင်းသိရသည်။