သျှမ်းပြည်တောင်ပိုင်း ပင်လုံမြို့အတွင်း မှတ်ပုံတင်လုပ်သူများ တစ်ဦးလျှင် ငွေကျပ် ၂ သောင်း ပေးဆောင်ရကြောင်း စုံစမ်းသိရှိရသည်။

ယခု မတ်လအတွင်း ပင်လုံမြို့တွင်း ကွင်းဆင်းပြီး မှတ်ပုံတင်လုပ်ပေးရာတွင် ရန်ပုံငွေဟု အကြောင်းပြပြီး မှတ်ပုံတင်လာလုပ်သူ တစ်ဦးကို ၁ သောင်းခွဲ မှ ၂ သောင်းကျပ်ထိ ပေးဆောင်ရကြောင်း ပင်လုံမြို့ဒေသခံများက ပြောသည်။

“သူတို့ ရုံးမှာသွားလုပ်ရင်တော့ ၁ သောင်းခွဲ ပေးရတယ်။ အခုက ကွင်းဆင်းပြီးတော့ လိုက်လုပ်ပေးနေတော့ ကျမတို့လည်း ငွေမကုန်ဘူးလို့ထင်တာ။ ကွင်းဆင်းတဲ့နေရာမှာသွားလိုက်လုပ်တော့ ၂ သောင်းပေးရတယ်” ဟု ပင်လုံမြို့ ဒေသခံ ကိုယ်တိုင်ကြုံခဲ့သည့် အမျိုးသမီးတစ်ဦးက ပြောသည်။

ထို့အပြင် မှတ်ပုံတင်ကို အလျင်မြန်လိုချင်သူများက ငွေ ၅ သောင်းကျပ်ပေးဆောင်ရပြီး၊ တရက်လျှင် လူဦးရေ ၃၀ နီးပါး လုပ်ပေးနေကြောင်း သိရသည်။

“ ၂ သောင်းပေးရင် ၁ ပတ်လောက်တော့ စောင့်ရတယ်လေ။ အမြန်လိုချင်တယ်။ ဒီနေ့ လုပ် ဒီနေ့လိုချင်တယ်ဆိုရင် ၅ သောင်း ပေးရတယ်တဲ့။ များများပေးရင်တော့ မြန်မြန်ရတာပေါ့။ ပြီးတော့ မှတ်ပုံတင်သွားလှဲရင်လည်း ၁ သောင်းခွဲ ပေးရတယ်။ တောင်ပေါ်ကနေဆင်းလာတာတော့ ၃၀ နီးပါးရှိတယ် ” ဟု အထက်ပါ ဒေသခံ အမျိုးသမီးက ပြောသည်။

လက်ရှိမြန်မာနိုင်ငံရေး၏ နိုင်ငံရေးအခြေနေနှင့် ကိုဗစ် ၁၉ ကပ်ရောဂါကြောင့် ပြည်သူများ စားဝတ်နေရေး ခက်ခဲနေချိန်ဖြစ်ပြီး ယခုကဲ့သို့ ငွေပေးဆောင်ရသောကြောင့် ပြည်သူများက ပိုခက်ခဲလာကြောင်း သိရသည်။

ထို့အပြင် စစ်ကောင်စီကလည်း လာမည့် ဧပြီလ ကစပြီး အသက် (၁၆)နှစ် ပြည့်သူတိုင်း မှတ်ပုံတင်ကိုင်ဆောင်ထားရမည် ဟု ထုတ်ပြန်ထားသည်။

“ရှင်းရှင်းပြောရင်တော့ များတာပေါ့။ ကျနော်တို့က တစ်ရက်လုပ် တစ်ရက်စားတဲ့သူတွေဆိုတော့ အဆင်မပြေဘူးလေ။ တစ်ခြားနေရာမှာဆိုရင် ၅ ထောင်ဘဲပေးရတယ်လို့ကြားတယ်။ ပြီးတော့ နောက်လက စပြီး မှတ်ပုံတင်တွေ ရှိထားရမယ်ဆိုတော့ သွားလုပ်ကြရတာပေါ့” ဟု ပင်လုံမြို့ ဒေသခံ အမျိုးသားတစ်ဦးက ပြောသည်။

မြန်မာပြည်သူများအနေဖြင့် လာမည့် ဧပြီလ ၁ ရက်နေ့က စပြီး ခရီးသွားပါက နိုင်ငံသားကတ်(မှတ်ပုံတင်) တရားဝင်ထုတ်ထားသည့် မှတ်ပုံတင်ဖြင့်သာ အသုံးပြုရန် စစ်ကောင်စီ လက်အောက်ခံ လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာနက ထုတ်ပြန်ထားသည်။