သျှမ်းပြည်မြောက်ပိုင်း မူဆယ်မြို့နယ် နမ့်အွမ်ကျေးရွာအုပ်စုတွင် ကချင်လွတ်မြောက်ရေးတပ်မတော် (KIA)မှ ဆက်ကြေးကောက်ခံသဖြင့် ကြံစိုက်တောင်သူများ အခက်အခဲ ကြုံတွေ့နေရကြောင်း စုံစမ်းသိရှိရသည်။
ယနေ့ မတ် (၂၈)ရက် မနက် (၁၀)နာရီခန့်က (KIA) စစ်တပ်ဘက်မှ လူအင်အား (၁၀)ဦးရှိပြီး ဖြတ်သွားသည့် (၁၂)ဘီးကား တစ်စီးလျှင် နှစ်သိန်းငါးသောင်း၊ (၁၀)ဘီးကား တစ်စီးလျှင် နှစ်သိန်း ပေးဆောင်ရပြီး (၆)ဘီးကားမှာ တစ်သိန်းခွဲ ပေးဆောင်ရကြောင်း အမည်မဖော်လိုသူ ကားသမား တစ်ဦးက ပြောသည်။
“ကြံစိုက်တောင်သူတွေတော့ အခက်ခဲဖြစ်နေကြတယ်။ ဆက်ကြေးကောက်တာက ကားသမားတွေဆီက ကောက်တယ်။ ကားသမားတွေကလည်း ဆီစျေးတက်တော့ သူတို့မကိုက်ရင် ကြံစိုက်တောင်သူတွေဆီ စျေးလာတက်တယ်” ဟု ကြံစိုက်တောင်သူ တစ်ဦးက ပြောသည်။
ယခုနှစ်တွင် တရုတ်ဘက်က ကြံများမဝယ်သဖြင့် ကြံစိုက်တောင်သူများသည် ကြံများကို မိုင်းရယ်မြို့နယ်သို့ တင်ပို့ရောင်းချနေရပြီး အမြတ်ငွေ မရရှိခြင်း၊ ယခင် တရုတ်ဘက်သို့ ကြံကားတစ်စီးလျှင် တရုတ်ယွမ်ငွေ ၂ သောင်း (မြန်မာငွေ သိန်း ၆၀ ခန့်) အမြတ်ငွေရရှိခဲ့ကြောင်း တောင်သူများက ပြောဆိုကြသည်။
“ဘယ်လိုမှ မတတ်နိုင်လို့ ကြံတွေ ခုတ်ပြီးတော့ တင်ပို့ရောင်းချနေရတာပဲ။ ဘာအမြတ်မှ မရှိဘူး။ ခုက ၃ သိန်း ၄ သိန်းလောက်ကျန်ရင်လည်း ခက်ခဲတယ်။ အဘက်ဘက်က စျေးကြီးလာတယ်။ ကားခလဲ စျေးကြီးတယ်။ ခါတိုင်းဆို သူတို့ ဆက်ကြေးကောက်တာ (၅)သောင်းလောက်ပဲကောက်တယ်။ ခုက အရမ်းများတယ်” ဟု ကြံစိုက်တောင်သူ တစ်ဦးက ပြောသည်။
မူဆယ်မြို့နယ်သည် စစ်ကောင်စီတပ်အပြင် ကချင်လွတ်မြောက်ရေးတပ်မတော် (KIA) ၊ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ၊ ကိုးကန့်တပ်မတော် (MNDAA) ၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) နှင့် ဌာနေပြည်သူ့စစ်များ လှုပ်ရှားရာ နယ်မြေတစ်ခုဖြစ်သည်။
သျှမ်းပြည်မြောက်ပိုင်း မူဆယ်မြို့နယ် မိုင်းပေါကျေးရွာအုပ်စုအတွင်း စစ်ကောင်စီ နှင့် KIA တို့ကြား ယနေ့ မတ် (၂၈)ရက်တွင် တိုက်ပွဲဖြစ်ပွားလျက်ရှိသည်။
Leave a Comments