သျှမ်းပြည်အတွင်း စစ်ကောင်စီ လက်အောက်ခံ အထွေထွေအုပ်ချုပ်ရေးမှူးရုံးနှင့် ရပ်ကွက် အုပ်ချုပ်ရေးတို့ ပူးပေါင်းပြီး အိမ်ထောင်စု စာရင်းများကို လိုက်လံကောက် စစ်ဆေးနေလျက်ရှိကြောင်း စုံစမ်းသိရှိရသည်။
စစ်ကောင်စီက ပြုလုပ်မည့် ရွေးကောက်ပွဲအတွက် အကြောင်းပြပြီး စစ်ကောင်စီလက်အောက်ခံ အုပ်ချုပ်ရေးမှူးတို့က ယခု မတ်လအတွင်း အိမ်ထောင်စုတွင်းရှိ လူစာရင်းများကို လိုက်လံ ကောက်ယူနေကြောင်း နမ့်လန်မြို့ ဒေသခံ အမျိုးသားတစ်ဦးက သျှမ်းသံတော်ဆင့် ကို ပြောသည်။
“ရွေးကောက်ပွဲအတွက်လို့ပြောပြီးတော့ အိမ်ထောင်စုကို လိုက်ကောက်နေတာ။ ရပ်ကွက် အုပ်ချုပ်ရေးမှူးရုံးမှာ စာရင်းသွားပေးရတာ။ ဒီလ စ လိုက်ကောက်စစ်ဆေးနေတာ။ နေအိမ်မှာ ဘယ်သူရှိလဲ။ အိမ်ထောင်စုစာရင်းထဲရှိတဲ့သူတွေ အကုန်လုံး ဒီအိမ်မှာရှိနေလားလို့ မေးပြီးလာကောက်သွားတာ” ဟု ၎င်းက ဆိုသည်။
အိမ်ထောင်စုစာရင်းများကို လိုက်လံကောက်ယူနေသော်လည်း ပြည်သူတစ်ချို့က စစ်ကောင်စီက ပြုလုပ်မည့် ရွေးကောက်ပွဲကြောင့် နာမည်စာရင်းသွားရောက်ပေးသွင်းခြင်းမရှိကြောင်း သိရသည်။
“ကျနော်တို့တော့ သွားမပေးဘူး။ မိတ္တူကူးဖို့ စာရွက်ဖိုးဈေးကြီးတယ်။ ဒီတိုင်းပဲ ထားလိုက်တယ်။ မပေးရင် ဘာလုပ်မယ် ညာလုပ်မယ်ပြောတာတော့ မကြားဘူး” ဟု အထက်ပါ နမ့်လန်ဒေသခံ အမျိုးသားက ပြောသည်။
ထိုနည်းတူ သျှမ်းပြည်အရှေ့ပိုင်း မိုင်းဆတ်၊ ကျိုင်းတုံဘက်တွင်လည်း စစ်ကောင်စီလက်အောက်ခံ ထွေအုပ်တို့က ယူနီဖောင်းမပါဘဲ တစ်အိမ်တက် တစ်အိမ်ဆင်း အိမ်ထောင်စုစာရင်း လိုက်လံစစ်ဆေးနေကြောင်း သိရသည်။
“သူတို့က တစ်အိမ်တက် တစ်အိမ်ဆင်း လိုက်စစ်ဆေး မေးတာ။ လာစစ်တဲ့သူတွေက ထွေအုပ်လို့ပြောတာပဲ။ ဒါပေမဲ့ ယူနီဖောင်းတွေဝတ်ပြီး လာစစ်ဆေးတာမျိုးတော့မရှိဘူး။ အိမ်မှာ ဘယ်သူတွေရှိလဲ ၊ လူဦးရေဘယ်လောက်ရှိလဲ လာစစ်ဆေးသွားတာ” ဟု သျှမ်းပြည်အရှေ့ပိုင်း ကျိုင်းတုံမြို့ ဒေသခံ အသက် ၃၅ နှစ် အရွယ်ရှိ အမျိုးသားတစ်ဦးက ပြောသည်။
ထို့အပြင် သျှမ်းပြည်အရှေ့ပိုင်းက လာရောက်စစ်ဆေးသည့် ထွေအုပ်များသည် အထက်က အမိန့်အတိုင်း လာရောက်စစ်ဆေးကောက်ယူသွားပြီး မည်သည့် ကိစ္စကြောင့်လာရောက်စစ်ဆေးသည်ကို မသိရှိကြောင်း ဒေသခံများပြောပြချက်အရ သိရသည်။
“သူတို့ကို မေးတာ၊ ဘာကြောင့် လာစစ်ဆေးတာလည်း မေးတော့ သူတို့ မသိဘူး။ မဖြေနိုင်ကြဘူး။ ဒီတိုင်းဘဲ အထက်က အမိန့်အရ လာစစ်ကြတာထင်တယ်။ ဘာကြောင့် ဘာလုပ်ဖို့ လာစစ်ဆေးတယ်ဆိုတာ သူတို့ မသိဘူး” ဟု မိုင်းဆတ်မြို့ ဒေသခံအမျိုးသားတစ်ဦးက ပြောသည်။
စစ်ကောင်စီပြုလုပ်မည့် ရွေးကောက်ပွဲအတွက် လွန်ခဲ့သည့် ၂၀၂၀ ခုနှစ်ကတည်းက ပန်းခင်း စီမံချက်ဖြင့် ကွင်းဆင်းပြီး ပြည်သူများကို မှတ်ပုံတင်လိုက်လံလုပ်ပေးခဲ့ကြောင်း သိရသည်။
ထိုစီမံချက်ထဲတွင် အသက် (၁၆)နှစ်ပြည့်သူတိုင်း တရားဝင်မှတ်ပုံတင်ဖြင့် ခရီးသွားလာရန်အတွက် အကြောင်းပြပြီး ပြုလုပ်ပေးခဲ့ကြောင်း သိရသည်။2:26 PM
Leave a Comments