သျှမ်းပြည်မြောက်ပိုင်း သီပေါမြို့နယ် ပုတိမ်တောင်ရပ်ကွက်တွင်ရှိသည့် ဖုန်းဆိုင်တစ်ဆိုင် ဖောက်ထွင်းခိုးယူခံရကြောင်း စုံစမ်းသိရှိရသည်။
ယနေ့ (မတ်လ ၂၃ ရက်) မနက် ၁ နာရီဝန်းကျင် လျှပ်စစ်မီး ပြတ်တောက်နေသည့်အချိန်တွင် လူတစ်စုမှ ဖုန်းဆိုင်၏ သော့ကို မီးရှို့ဖျက်ဆီးကာ ဆိုင်တွင်းရှိ ဖုန်းများအားလုံးကို ယူဆောင်သွားကြောင်း သိရသည်။
“လူဘယ်နှစ်ယောက် လာဖောက်သွားလဲတော့မသိဘူး။ ညအချိန်ဘဲဖြစ်မှာပေါ့။ ဆိုင်ထဲမှာရှိတဲ့ ဖုန်းအသစ်တွေ အကုန်ယူသွားတာပဲ။ အလုံး ၂၀ ကျော်လောက်ယူသွားတယ်။ ဖုန်းပြင်ဖို့ ပစ္စည်းကိရိယာတွေလည်း ယူသွားတယ်။ ဖုန်းအဟောင်းတွေကောယူသွားတာ။ အကုန်ပါပဲ” ဟု ဖုန်းဆိုင်ဖောက်ထွင်းခံရသည့် ဆိုင်ရှင် အမျိုးသားက ပြောသည်။
အဆိုပါဖောက်ထွင်းမှုကြောင့် စုစုပေါင်း ကျပ်ငွေ သိန်း (၂၀)နီးပါး ဆုံးရှုံးသွားကြောင်း သိရသည်။
စစ်တပ်က အာဏာသိမ်းပြီးနောက်ပိုင်း ပြည်သူများ ရှာဖွေစားသောက်ရာတွင် ခက်ခဲလာသောကြောင့် ယခုလို ခိုးယူဖောက်ထွင်းမှု ပိုမိုများပြားလာကြောင်း ဒေသခံများက ပြောသည်။
အဆိုပါ ဖောက်ထွင်းမှုများပြားလာပြီး တာဝန်ရှိသူရဲများက ဖြေရှင်းပေးတာမရှိသောကြောင့် ပြည်သူများက အသွားအလာ စိုးရိမ်နေကြရကြောင်း သိရသည်။
“အခုက ရှာစားရတာလည်း ခက်တယ်လေ။ ဒီတော့ ခိုးယူမှုတွေကလည်း များလာတယ်။ ဒီလိုမျိုး ဖောက်ထွင်းတာတွေလည်း ပိုများလာတယ်။ ကုန်ဈေးနှုန်းတွေကလည်းတက်တော့ တစ်နေ့ရတဲ့ငွေနဲ့ မလောက်တော့ ခိုးယူကြတာပဲ။ အခြေခံလူတန်းစားအတွက်ဆိုရင်လည်း ပိုခက်ခဲတယ်။ ပြီးတော့ တစ်နေ့လုပ်တစ်နေ့စားတွေကလည်း ပိုများလာတယ်” ဟု သီပေါမြို့ ဒေသခံ အမျိုးသားတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်း သီပေါမြို့တွင် မကြာခဏ ခိုးယူလုယက်မှုများရှိလာပြီး အကြီးမားဆုံး ခိုးယူ ဖောက်ထွင်းမှု ၃ ကြိမ်ထိရှိခဲ့ပြီးဖြစ်ကြောင်း သိရသည်။
Leave a Comments