China Eastern လေကြောင်းလိုင်းပျက်ကျသည့်ထဲတွင် သျှမ်းလူငယ်အမျိုးသမီး (၄)ဦး ပါ၀င်ကြောင်း စုံစမ်းသိရသည်။
မတ် (၂၁)ရက်တွင် ခရီးသည် (၁၃၂)ဦးတင်ဆောင်လာသည့် China Eastern လေကြောင်းလိုင်းသည် တရုတ်နိုင်ငံ တောင်ပိုင်း တွင်ပျက်ကျခဲ့ရာ ထိုထဲတွင် သျှမ်းလူငယ်အမျိုးသမီး (၄)ဦးပါ၀င်ခဲ့ကြောင်း တရုတ်နိုင်ငံ ရွှေလီမြို့နေ သျှမ်းလူငယ်အမျိုးသားတစ်ဦး က သျှမ်းသံတော်ဆင့်ကို ပြောသည်။
အဆိုပါ လေယာဥ်ပျက်ကျသည့်ထဲတွင် ပါသွားသောအမျိုးသမီး (၄)ဦးသည် တရုတ်နိုင်ငံ ရွှေလီခရိုင် တယ်ဟုန့် ကိုယ်ပိုင်အုပ်ချုပ်ခွင့်ရ (သျှမ်းကိုယ်ပိုင်အုပ်ချုပ်ခွင့်) ဝမ်းတိန်ကျေးရွာအုပ်စု မွမ်းခွန်ပန်ရွာက ဒေသခံ အမျိုးသမီးများဖြစ်ကြောင်း သိရှိရသည်။
“သျှမ်းလူငယ်တွေက အလုပ်သွားလုပ်ဖို့အတွက် ကွာလတင်း (၂) ပတ်ဝင်ထားပြီး တခြားပြည်နယ်ကို သွားကြတာ။ ရွှေလီဘက်မှာနေရင် lockdown တွေရှိပြီး ကိုဗစ်-၁၉ နေ့တိုင်းစစ်နေရတယ်။ အဲ့တော့ လူငယ်တွေက တခြားပြည်နယ်ကိုသွားပြီး အလုပ်သွားလုပ်ကြတာ” ဟု ၎င်းက ပြောသည်။
တရုတ်နယ်စပ်ဖြစ်သည် ရွှေလီခရိုင်သည် ကိုဗစ်-၁၉ ရောဂါကြောင့် lockdown ပြုလုပ်ထားခြင်း၊ ကိုဗစ်-၁၉ ရောဂါ တစ်ပတ်တစ်ကြိမ် အာခေါင် (နှာခေါင်း ) စစ်ဆေးခြင်းများပြုလုပ်သည့်အတွက် ဒေသခံလူငယ်များ တခြား ပြည်နယ်သို့ အလုပ်ထွက်လုပ်ကိုင်ကြကြောင်း ရွှေလီဒေသခံများကပြောဆိုကြသည်။
“အပြင်ထွက် အလုပ်မလုပ်ရပဲ နေ့တိုင်း ကိုဗစ်စစ်နေတော့ အဆင်မပြေဘူး။ ရွှေလီခရိုင်ကိုကျော်သွားရင် Lockdown တွေ လည်းမရှိဘူး။ ကိုဗစ် စစ်တာတွေလည်းမရှိဘူး။ လူငယ်တွေက တခြားပြည်နယ်ကိုသွားပြီး အလုပ်သွားလုပ်ကြတာ။ အဲ့ဒါတွေလည်းပါမယ်” ဟု ဝမ်းတိန်ကျေးရွာက ဒေသခံ တစ်ဦးကပြောသည်။
လေယာဉ်ပေါ်လိုက်ပါစီးနင်းမည့် သူများ စာရင်းအရ (၁၃၃) ဦးရှိထားသော်လည်း ခရီးသည်တစ်ဦးမှာ ခရီးမထွက်ဖြစ်ကြောင်း သိရှိရသည်။
“စာရင်းရှိ (၁၃၃) ဦးမှာ အမျိုးသား တစ်ဦးတော့ လေယာဉ်လက်မှတ်ဝယ်ထားပြီး ခရီးမထွက်ဖြစ်ဘူး” ဟု ရွှေလီမြို့နေ ဒေသခံတစ်ဦး ကပြောသည်။
ထိုလေယာဉ်ပေါ်မှာ ခရီးသည် (၁၃၂) ဦးလိုက်ပါသွားပြီး boeing (737) ပြည်တွင်းခရီးစဉ်တစ်ခုဖြစ်သည့် ကူမင်း မှ ကွမ်ကျိုးသို့ အသွား ကွမ်ရှီးကိုယ်ပိုင်အုပ်ချုပ်ခွင့်ရဒေသအတွင်းရှိ တောင်ပေါ်မှာ ပျက်ကျသွားကြောင်း သိရှိရသည်။
