သျှမ်းပြည်တောင်ပိုင်း ဆီဆိုင်မြို့နယ် နောင်ထော်ကျေးရွာအတွင်း ရောက်ရှိနေသည့်ကရင်နီစစ်ရှောင်များ အတွက် ဟင်းရွက်များလိုအပ်နေကြောင်း သတင်းသိရသည်။

နောင်ထော်ကျေးရွာအတွင်း ကျန်ရှိနေသည့် ကရင်နီပြည်နှင့် မိုးဗြဲ၊ ဖယ်ခုံဘက်မှ စစ်ဘေးရှောင် ၃၀၀ ကျော်ခန့် သည် ချက်ပြုတ်စားသောက်ရန်အတွက် ဟင်းသီးဟင်းရွက်များ၊ ကုန်စိမ်းများ လိုအပ်နေကြကြောင်း စစ်ရှောင် များကို ကူညီနေသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“အရင်တုန်းကတော့ လူဦးရေများတာပေါ့၊ အခုတော့ တချို့ကလည်း ပြန်သွားကြလို့ လူဦးရေ ၃၀၀ ကျော်ကျန် နေသေးတယ်၊ သူတို့အတွက် ဟင်းသီးဟင်းရွက်တွေ၊ ခရမ်းချည်သီးတွေ၊ကြက်သွန်တွေက လိုအပ်နေတယ်၊ ဆန်၊ဆီ၊ဆား ကတော့ အလှူရှင်တွေ လာလှူပေးထားတာနဲ့ အခုထိသုံးလို့လောက်ပါသေးတယ်” ဟု အထက်ပါ အမျိုးသမီးက သျှမ်းသံတော်ဆင့်ကို ပြောသည်။

လက်ရှိ နောင်ထော်ကျေးရွာအတွင်းမှ စစ်ရှောင် ၃၀၀ ကျော်များအနက် တချို့က ဟင်းသီးဟင်းရွက်များရရှိရေး အတွက် မြို့ထဲသို့သွားပြီး အလှူခံထွက်နေရကြောင်းလည်း သိရသည်။

“တချို့ကလည်း စုပြီးမြို့ထဲကို သွားအလှူခံတာပေါ့၊ ဟင်းသီးဟင်းရွက်တွေကို တောင်းတယ်၊ ကျမတို့ကိုယ်တိုင် ကလည်း အလှူခံထွက်တယ်၊ ဈေးနေ့ဆိုလည်းဈေးထဲသွားပြီး အလှူခံတာပေါ့၊ အခုနောက်ပိုင်း အလှူရှင်တွေက နည်းလာသလို စစ်ရှောင်တွေအတွက် ကုန်စိမ်းတွေလည်း နည်းလာတယ်” ဟု နောင်ထော်မှ စစ်ရှောင်များ၏ စားရေးသောက်ရေး စီမံကြီးကြပ်ပေးသူ အမျိုးသမီးက သျှမ်းသံတော်ဆင့်ကို ပြောသည်။

နောင်ထော်ကျေးရွာအတွင်းမှ စစ်ရှောင်များတွင် ကလေးမိခင်များ၊ ကိုယ်ဝန်သည်များ၊ သက်ကြီးဖိုးဖွားများနှင့် ကလေးများ၊ လူလတ်ပိုင်းအချို့များ ကျန်ရှိနေကြောင်း၊ အချို့စစ်ရှောင်များမှာ အိမ်မီးရှို့ဖျက်ဆီးခံရသဖြင့် အိမ်ပြန်ရန်အဆင်မပြေသည့်သူများလည်းရှိကြောင်းသိရသည်။

စစ်ရှောင်များကို ကူညီလှူဒါန်းလိုပါက စစ်ရှောင်များ၏ စားသောက်ရေးနှင့် နေရာထိုင်ခင်းတို့ကို ကူညီဆောင် ရွက်ပေးနေသည့် တာဝန်ရှိသူ ဖုန်းနံပါတ် ၀၉ – ၄၂၈၃၂၅၁၀၂ သို့ ဆက်သွယ်လှူဒါန်းနိုင်ကြောင်းလည်း သတင်း သိရသည်။