သျှမ်းပြည်တောင်ပိုင်း တောင်ကြီးမြို့ ပြည်တော်သာရပ် စံပယ်လမ်းတွင် တိုက်အိမ် မီးလောင်မှုဖြစ်ပွားပြီး အမျိုးသမီး (၃) ဦး အောက်စီပျက်ကာ သေဆုံးသွားကြောင်း စုံစမ်းသိရှိရသည်။
မတ်လ (၂၀) ရက် ည (၁၂) နာရီကျော်တွင် ဝါယာရှော့ကြောင့် မီးလောင်မှု ဖြစ်ပွားပြီး နေအိမ်အတွင်း အမျိုးသမီး (၃) ဦး အောက်စီဂျင်ပျက်ကာ ဆေးရုံအရောက်တွင် သေဆုံးသွားကြောင်း မိသားစု နှင့် နီးစပ်သူ တစ်ဦးကပြောသည်။
“ကလေး မိဘက ခရီးထွက်နေတာ။ အိမ်က ကျွန်းသစ်တွေဖြစ်တော့ မီးကူးတာ လွယ်တယ်လေ။ အိမ်ထဲ ထွက်ပေါက်ရှာမရပဲ အောက်စီဂျင်ပျက်သွားတာ။ သူများ သူတို့ကို သွားကယ်ထုတ်တော့ ၃ ယောက်စလုံးက လှေကားမှာ စုပြီး သတိမေ့နေကြတာ” ဟု မိသားစု နှင့် နီးစပ်သူ အမျိုးသမီး တစ်ဦး က သျှမ်းသံတော်ဆင့် ကိုပြောသည်။
သေဆုံးသူ အမျိုးသမီး (၃) ဦးမှာ အိမ်ရှင်သမီး (၂) ဦးပါဝင်ပြီး တူမ (၁) ဦးပါဝင်ကြောင်း သိရှိရသည်။
“သူတို့မှာ ကလေး (၃) ယောက်ရှိတယ်။ ဆုံးသွားတဲ့ သမီးလေး (၂) ယောက်က ရွာကနေ တောင်ကြီးအိမ်ကို ပြန်ရောက်တာ တစ်ပတ်တောင်မရှိသေးဘူး။ ခုတော့ သူတို့ မိဘက သား တစ်ယောက်ပဲ ကျန်တော့တယ်” ဟု မိသားစုဝင် နှင့် နီးစပ်သူ အမျိုးသမီး တစ်ဦးကပြောသည်။
မီးလောင်သည့်ထဲတွင် ပါသွားသည့် အိမ်ရှင်သမီး (၂) ဦးသည် တက္ကသိုလ်ဝင်တန်းအောင်ပြီး အသက် (၁၉) နှစ် သမီးကြီးဖြစ်ပြီး၊ အသက် (၁၀) နှစ်အရွယ် သမီးငယ်လေး နှင့် တူမဖြစ်သူ အသက် ( ၁၄) နှစ်သာ ဖြစ်ကြောင်း သိရသည်။
အဆိုပါ မီးလောင်မှုသည် (၂) ထပ်အိမ်ဖြစ်ပြီး တစ်အိမ်လုံး မီးလောင်ပျက်စီးသွားမှုကြောင့် ဆုံးရှုံးမှု တန်ဖိုး မသိရှိရသေးပေ။
စစ်တပ်မှ နိုင်ငံတော် အာဏာသိမ်းပြီးနောက်ပိုင်း သျှမ်းပြည်အပါအဝင် နိုင်ငံတဝှမ်းလုံး လျှပ်စစ်မီး ပုံမှန်ပျက်နေသည့်အတွက် နေအိမ်မှာ ဘုရားမီးပူဇော်ရာမှာ မီးလောင်မှုဖြစ်ပွားခြင်း၊ လျှပ်စစ်မီး မကြာခဏ ပျက်နေသည့်အတွက် ဝါယာရှော့ ဖြစ်ပွားကာ မီးလောင်မှုများ ဖြစ်ပွားခဲ့သည်။
Leave a Comments