သျှမ်းပြည်မြောက်ပိုင်း သီပေါမြို့နယ် ကြံခင်းကျေးရွာတွင် နေထိုင်သည့် အမျိုးသားတစ်ဦးသည် ယာခင်းထဲ မြေမြုပ်မိုင်းနင်းမိပြီး ဒဏ်ရာပြင်းထန်စွာ ရရှိကြောင်းသတင်းသိရသည်။
ယမန် (မတ်လ ၁၈) ရက် နေ့လည်ပိုင်း ၁၂ နာရီဝန်းကျင်တွင် သီပေါမြို့နယ် ကြံခင်းကျေးရွာမှ အသက် ၂၂ နှစ်အရွယ်အမျိုးသားတစ်ဦး ယာခင်းသို့သွားစဥ် မိုင်းနင်းမိပြီး ဒဏ်ရာရရှိခဲ့ကြောင်း ဖြစ်စဥ်များကို သိရှိရသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“သူ့ရဲ့ ယာခင်းကလည်း နည်းနည်းဝေးတယ်၊ ပရဟိတသမားတွေ ရောက်သွားချိန်မှာ ဒဏ်ရာကသွေးတွေလည်း အရမ်းထွက်နေပြီ ယင်ကောင်တောင်လာဝဲတဲ့အထိတဲ့၊ သူ့ရဲ့ညခြေထာက်ကို ထိထားတာ ဒဏ်ရာတော်တော်ပြင်းထန်တယ်” ဟု အထက်ပါပုဂ္ဂိုလ်က ပြောသည်။
မိုင်းထိလူနာသည် ကြံခင်းရွာသား အသက် ၂၂ အရွယ် စိုင်းအောင်ကျန် ဖြစ်ပြီး ဘော်ကြိုကြက်ခြေနီ ဘော်ကြို ပရဟိတ အဖွဲ့မှ သွားရောက်ကူညီသယ်ဆောင်ကာ သီပေါမြို့မဆေးရုံသို့ ပို့ဆောင်ပေးခဲ့သော်လည်း ဒဏ်ရာ ပြင်းထန်သဖြင့် လားရှိုးဆေးရုံကြီးသို့ လွှဲပြောင်းပေးရကြောင်း ၎င်းကဆက်ပြောသည်။
“အခုတော့ လားရှိုးဆေးရုံကြီးကို လွှဲပြောင်းပေးလိုက်ပြီ၊ ဒဏ်ရာအသေးစိတ်အခြေအနေတော့ မသိရသေးဘူး၊ ပြီးတော့နောက်တစ်ခု သူတို့ရဲ့ ဆေးကုသမှုစရိတ်ပေါ့၊ သူတို့ကလည်း တောင်သူတွေပဲဆိုတော့ ဆေးကုသမှု စရိတ်အတွက်က ခက်ခဲမှာအမှန်ပဲ” ဟု ၎င်းက ပြောသည်။
ထို့အပြင် မြေမြုပ်မိုင်းနှင့် မိုင်းများ ထောင်ထားသည့် လက်နက်ကိုင်တပ်ဖွဲ့များအနေဖြင့် မိမိတို့တပ်ဖွဲ့ ထောင် ထား သည့် မိုင်းများပြန်ဖြုတ်ပေးရန် နှင့် မိုင်းရှိသည့် နေရာများကိုလည်း အသိပေးရန် သို့မဟုတ် အမှတ်အသား များ ပြုလုပ်ပေးရန်တောင်းဆိုလိုကြောင်း ဒေသခံများက ပြောသည်။
“အရင်တုန်းက တိုက်ပွဲတွေဖြစ်နေလို့ မိုင်းတွေထောင်ထားတယ်ဆိုလည်း အခုက တိုက်ပွဲမရှိတော့ဘူးလေ၊ မိုင်းတွေ ပြန်လာဖြုတ်ပေးသင့်တယ်၊ ရွာသားတွေကို အသိပေးသင့်တယ်၊ အခုအတိုင်းဆိုပြည်သူတွေရဲ့နေရာကို မိုင်းထောင်တယ် ပြည်သူတွေ မိုင်းနင်းမိနေရတယ်၊ ဒါမဖြစ်သင့်ဘူး” ဟု သီပေါမြို့နယ်မှ စစ်ရှောင်များကို ကူညီနေသူ တစ်ဦးကလည်း သျှမ်းသံတော်ဆင့်ကို ပြောသည်။
သီပေါမြို့နယ်အပါအဝင် RCSS/SSA နှင့် မြောက်ပိုင်းမဟာမိတ်တို့ တိုက်ပွဲဖြစ်ပွားခဲ့သည့် နေရာတော်တော် များများတွင် မြေမြှုပ်မိုင်းများကို အသုံးပြုမှုရှိခဲ့ကြပြီး ပြန်ထွက်ခွာချိန်တွင် မိုင်းများကို ပြန်လည်ရုတ်သိမ်းပေးမှု မရှိသောကြောင့် ပြည်သူများက မြေစာပင်အဖြစ် မိုင်းနင်းမိ ထိခိုက်ဒဏ်ရာ သေဆုံးမှုများရှိနေကြသည်။
ထိုသို့ သေဆုံးမှုများရှိနေသော်လည်း လက်နက်ကိုင်အဖွဲ့အစည်းမှ တာဝန်ယူဖြေရှင်းပေးခြင်းလည်း မရှိကြောင်း သိရသည်။
Leave a Comments