သျှမ်းပြည်တောင်ပိုင်း မိုင်းပန်မြို့အတွင်း စစ်ကောင်စီ လက်အောက်ခံ ရဲစခန်းဝန်းအတွင်း လောင်းကစားဖွင့်ပေးပြီး ရန်ပုံငွေရှာယူနေကြောင်း စုံစမ်းသိရှိရသည်။

မိုင်းပန်မြို့ ရဲစခန်းတွင်းရှိ မိုင်းစံစေတီပြုပြင်မွမ်းမံ ထီးတင်ပွဲ အကြောင်းပြပြီး မတ်လ ၁၅ ရက်နေ့မှ စပြီး ယနေ့ထိတိုင် လောင်းကစားဝိုင်း ဖွင့်လှစ်ထားကြောင်း မိုင်းပန်မြို့ မှ ဒေသခံများ ပြောပြချက်အရ သိရသည်။

“ ရဲစခန်းထဲမှာရှိတဲ့ စေတီကို ထီးတင်ပွဲ အကြောင်းပြပြီး လောင်းကစားဝိုင်းတွေဖွင့်နေတာ။ ရန်ပုံငွေရှာတယ်ဆိုပြီးတော့ ရဲတွေ ဦးဆောင်ပြီး ဖွင့်ပေးတာ။ သွားဆော့တဲ့သူတွေလည်း အများကြီးပဲ။ ရဲတွေလည်း အရပ်ဝတ်နဲ့ဝင်နေတယ်။ ယူနီဖောင်းနဲ့တော့ လာတာမတွေ့ဘူး” ဟု မိုင်းပန်မြို့ ဒေသခံ အမျိုးသား တစ်ဦးက ပြောသည်။

စစ်ကောင်စီက အာဏာသိမ်းပြီးနောက်ပိုင်း မိုင်းပန်မြို့တွင် လောင်းကစားကို ပထမဦးဆုံး ပေါ်ပေါ်ထင်ထင် ဖွင့်လှစ်ခြင်းဖြစ်ကြောင်း၊ လောင်းကစားများကို ဖွင့်လှစ်ပေးပါက ခိုးယူလုယက်မှုများ၊ ဓားပြတိုက်မှုများ ရှိလာမှာကို ဒေသခံများက စိုးရိမ်နေကြသည်။

ထို့အပြင် လက်ရှိအချိန်မှာ မိုင်းပန်မြို့တွင် ကိုဗစ် ၁၉ ပိုးတွေ့လူနာ ရှိနေသေးကြောင်း သိရသည်။

“ဒီလောင်းကစားပွဲက ထပ်ရှိလာမယ်ထင်တာပဲ။ နောက်ကျရင် ရှင်လောင်းပွဲရှိသေးတယ်။ အဲ့ပွဲကျရင် လောင်းကစားပွဲ ထပ်ရှိမယ်ထင်တယ်။ လောင်းကစားပွဲလုပ်ရင် လူတွေက ခိုးယူလုယက်တာတွေ၊ ဓားပြတိုက်တာတွေ ရှိလာမှာကို ကြောက်တာပေါ့။ သတင်းမှာကြည့်နေတာဆို လောင်းကစားက ကောင်းကျိုးပေးတာမှ မရှိတာ။ ပြီးတော့ ကျနော်တို့ မြို့မှာက ကိုဗစ် လူနာတွေကလည်း ရှိနေသေးတယ်” ဟု မိုင်းပန်မြို့ဒေသခံ အမျိုးသမီး တစ်ဦးက ပြောသည်။

အဆိုပါ လောင်းကစားပွဲကို မတ်လ ၁၅ ရက်နေ့မှ စပြီး မတ်လ ၂၀ ရက်နေ့အထိ ပြုလုပ်သွားမည်ဖြစ်ကြောင်း ဒေသခံ များ ပြောပြချက်အရ သိရသည်။

စစ်တပ်က အာဏာသိမ်းပြီး တစ်နှစ်အကြာ သျှမ်းပြည်အတွင်း လောင်းကစားဝိုင်းများ၊ မူးယစ်ဆေးဝါးသုံးစွဲသူများ၊ ခိုးယူလုယက်မှုများ၊ ဓားပြတိုက်မှုများ ယခင်ထက် ပိုမိုများပြားလာပြီး ပြည်သူများအနေဖြင့်လည်း လုံခြုံမှု မရှိတော့ကြောင်း သိရသည်။