သျှမ်းပြည်မြောက်ပိုင်း မူဆယ်မြို့နယ် မိုင်းယု (၁၀၅) မိုင်တွင် ယနေ့ (မတ် ၁၇)ရက် မနက် ၁ နာရီခွဲဝန်းကျင်၌ အချင်းချင်း စကားများရာမှ ဓားခုတ်မှု ဖြစ်ပွားခဲ့ပြီး အမျိုးသားတစ်ဦး ဒဏ်ရာပြင်းထန်ရရှိခဲ့ကြောင်း စုံစမ်းသိရှိသည်။
ယနေ့ မတ်လ ၁၇ မနက် ၁ နာရီခွဲဝန်းကျင်တွင် မိုင်ယု (၁၀၅)မိုင် နယ်မြေ (၃)တွင် အချင်းချင်း စကားများပြီး အသက် (၃၀) အရွယ်ရှိ အမျိုးသားတစ်ဦးက ဓားခုတ်ခံရပြီး ညာဘက်ပါးနှင့် လက်ခလယ် ထိခိုက်ဒဏ်ရာရရှိခဲ့ကြောင်း မိုင်းယု (၁၀၅)မိုင် ပါရမီ လူမှုကူညီရေးအသင်းမှ တာဝန်ရှိသူ တစ်ဦးက ပြောသည်။
“ ဘာကြောင့် စကားများကြတာလဲတော့မသိဘူး။ အချင်းချင်းစကားများကြတာတဲ့။ ညအချိန်ကြီး ဆုံကြတယ်ဆိုတော့ ဂိမ်းဆိုင်တွေ သွားတာလားမသိဘူးလေ။ တစ်ယောက်တော့ ညားဘက်ပါး နဲ့ လက်ခလယ်မှာ ဒဏ်ရာရသွားတာ။ အခုတော့ ဆေးရုံပို့ထားပေးလိုက်ပြီ” ဟု ၎င်းက ဆိုသည်။
အဆိုပါ ဓားထိုးခံရသည့် အမျိုးသားသည် မိုင်းယု (၁၀၅)မိုင် နယ်မြေ (၄)တွင် နေထိုင်သူဖြစ်သည်။
မူဆယ်မြို့နယ် မိုင်းယု (၁၀၅)မိုင်တွင် ၂၀၂၂ ခုနှစ်အတွင်း အဆိုပါ ဓားခုတ်လုယက်မှုသည် (၃)ကြိမ်ခန့် ဖြစ်ပွားခဲ့ပြီးဖြစ်ကြောင်း ပါရမီ လူမှုကူညီရေးအသင်း ပြောပြချက်အရ သိရသည်။
