သျှမ်းပြည် တောင်ပိုင်း ဖယ်ခုံမြို့နယ် အတွင်းတွင် အာဏာသိမ်းစစ်ကောင်စီတပ်ဖွဲ့နှင့် ဒေသခံပြည်သူ့ကာကွယ်ရေးတပ်ဖွဲ့တို့ တိုက်ပွဲဆက်လက်ဖြစ်ပွားနေကြောင်း သတင်းသိရသည်။
ယနေ့ (မတ် ၁၆)ရက် မနက် ၁၀ နာရီဝန်းကျင်မှ စတင်ပြီး ဖယ်ခုံမြို့ နှင့် လွိုင်ကော်မြို့ နယ်အစပ်တွင် စစ်ကောင်စီ နှင့် ဒေသခံ PDF ပူးပေါင်းတပ်ဖွဲ့ တိုက်ပွဲများ ပြင်းထန်နေကြောင်း PDF တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
“ဒီကနေ့ တိုက်ပွဲက ဖယ်ခုံမြို့နယ် အင်းအရှေ့ဘက်ကမ်း ဆောင်ကန်းဘက်တိုက်ပွဲက ပြင်းထန်နေပါတယ်၊ ပြီးခဲ့ တဲ့ရက်တွေတုန်းက ဖြစ်သွားတဲ့ တိုက်ပွဲမှာ ကျနော်တို့ မဟာမိတ် ရဲဘော်တချို့ ထိခိုက်ဒဏ်ရာရထားတာရှိတယ်၊ သူတို့အတွက် ဆေးကုသမှု ဆေး စားရိတ်တော့ လိုအပ်နေတယ်” ဟု ဖယ်ခုံ PDF မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
ဖယ်ခုံမြို့နယ်နှင့် မိုးဗြဲမြို့နယ် အတွင်းရှိ ပြည်သူ့ကာကွယ်ရေးတပ်ဖွဲ့များသည် အာဏာသိမ်း စစ်ကောင်စီတပ်ဖွဲ့ နှင့် တိုက်ပွဲရင်ဆိုင်နေရသည်မှာ တစ်လကျော်ရှိနေပြီး လက်ရှိတွင် KNDF တပ်ရင်း ၇ တပ်ခွဲ ၄ မှ ဖောက်ခွဲရေး တာဝန်ခံအပါအဝင် ရဲဘော်နှစ်ယောက် အရေးပေါ် ဆေးကုသ စားရိတ် လိုအပ်နေကြောင်း သတင်းသိရသည်။
“သူတို့က ရှေ့တန်းကနေ ဒဏ်ရာရလာတာပါ၊ မစ်ရှင်လုပ်ရင်းနဲ့ ထိသွားတာပေ့ါ၊ အခု ဆေးကုသမှုရော ဆေးစရိတ် ရော အရေးကြီး လိုအပ်နေပါတယ်၊ ပြီးတော့ လက်နက်ခဲယမ်း၊ ကျနော်တို့က သူ့နယ်ကိုယ့်နယ်ဆိုပြီး ခွဲတိုက်နေတာမျိုးမဟုတ်တော့ အချင်းချင်းကူညီတိုက်ခိုက်ကြပါတယ်၊ လက်နက်ရော ဆေးစားရိတ်ရော ကူညီ ပေးဖို့ တောင်းဆိုချင်ပါတယ်” ဟု KNDF တပ်ရင်း ၇ တပ်ခွဲ ၄ မှ အဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
ဒီကနေ့ တိုက်ပွဲအခြေအနေများကြောင့် မိုးဗြဲ – လွိုင်ကော် လမ်းမအား ခရီးသွားလာခြင်းများ မပြုကြသေးရန် ပြည်သူများအား KNDF က အသိပေး ထုတ်ပြန်ထားသည်။
စစ်ကောင်စီတပ်ဖွဲ့သည် လေကြောင်းတိုက်ခိုက်မှုဖြင့် ဖယ်ခုံ၊ မိုးဗြဲ နှင့် ကရင်နီပြည် ဒီးမော့ဆိုမြို့နယ် အတွင်းသို့ ဗုံးကြဲတိုက်ခိုက်မှု နေ့စဥ်လုပ်ဆောင်နေပြီး Fuel-Air Bomb ဟု အမည်ရှိသည့် လူခန္ဓာအရွယ်ရှိ ဗုံးများဖြင့်လည်း တိုက်ခိုက်ခဲ့ပါသည်
