သျှမ်းပြည် မြောက်ပိုင်း ကျောက်မဲမြို့တွင် ယမန်နေ့ (မတ် ၁၅)ရက်က အမျိုးသားတစ်ဦး မိုင်းနင်းမိဒဏ်ရာ ရရှိခဲ့ကြောင်း သတင်းသိရသည်။

ယမန်နေ့ (မတ် ၁၅)ရက် နေ့လည် ၃ နာရီဝန်းကျင်တွင် ကျောက်မဲမြို့ ကျောက်မဲကြီးကျေးရွာအုပ်စု မန်အော်ကျေးရွာမှ အသက် (၅၀)ကျော် အမျိုးသားတစ်ဦး ဝါးသွားခုတ်စဉ် မိုင်းနင်းမိဒဏ်ရာရရှိခဲ့ကြောင်း မိုင်းထိလူနာကို သွားရောက်ကူညီပေးသည့် အမျိုးသားတစ်ဦးက ပြောသည်။

“ သူ ဝါးသွားခုတ်တာလို့ ပြောတယ်၊ မန်အော်ရွာကနေ နမ့်မန်းရွာဘက်ကို သွားတဲ့ လူသွားလမ်းမှာ ဖြစ်သွားတာ၊ အဲ့လမ်းက သွားလာတာနည်းတယ်၊ သိပ်ပြီး မသွားကြဘူး၊ အဲ့နားတဝိုက် မိုင်းကွဲသံက အရင်ကလည်း ကြားဖူးတယ်။ တိရိစ္ဆာန်တွေ ထိတာများတယ် ” ဟု ၎င်းက ပြောသည်။

မိုင်းပေါက်ကွဲမှုကြောင့် ညာဘက် လက်မောင်းနှင့် တင်ပါးတွင် ပြင်းထန်ဒဏ်ရာ ရရှိခဲ့ပြီး ကျောက်မဲ ကြက်ခြေနီသူနာပြုတပ်ဖွဲ့ မှ သွားရောက်ကူညီခဲ့ကာ ကျောက်မဲ ဆေးရုံမှတစ်ဆင့် လားရှိုးပြည်သူ့ဆေးရုံသို့ ပို့ဆောင်ထားကြောင်း သိရသည်။

အဆိုပါ မိုင်းထိလူနာတွင် သားသမီး (၆)ဦးရှိပြီး မိသားစုစားဝတ်နေရေးကို အဓိက ရှာကျွေးနေရသူ ဖြစ်သည့်အတွက် ၄င်းမိသားစု စားဝတ်နေရေးနှင့် ဆေးကုသစရိတ် ခက်ခဲနေကြောင်း လိုက်ပါကူညီသူထံမှ သိရသည်။

“အခက်ခဲကတော့ ရှိတယ်၊ သူ့သားသမီးတွေကို အဓိက ရှာကျွေးနေတာ၊ သူ့အမျိုးသမီးကလည်း ဆုံးသွားတာ ၂လလောက်ရှိပြီ၊ မနေ့က မေးကြည့်တာ သူ့လက်ထဲ ပိုက်ဆံ ၂သောင်းပဲရှိတယ်တဲ့၊ ဆေးကုဖို့ရော အခက်ခဲတွေ ရှိနေတယ်” ဟု လိုက်ပါကူညီသည့် လူငယ် အမျိုးသားတစ်ဦးက ပြောသည်။

ကျောက်မဲမြို့နယ်တွင် ယခုလ ပထမပတ်ကလည်း မိုင်းပေါက်ကွဲမှုကြောင့် လူငယ် တစ်ဦး သေဆုံးပြီး တစ်ဦး ပြင်းထန်ဒဏ်ရာ ရရှိခဲ့ကြောင်း သိရသည်။