သျှမ်းပြည်တောင်ပိုင်း ပင်လောင်းမြို့နယ်က စစ်ရှောင်များ သောက်သုံးရေ ခက်ခဲနေကြောင်း စုံစမ်းသိရှိရသည်။

အဆိုပါ သောက်သုံးရေ ခက်ခဲနေသည့် စစ်ရှောင်များသည် စစ်ရှောင်ကာလ ကြာလာသည်နှင့်အမျှ အလှူရှင်များ လျော့ပါးလာကြောင်း စစ်ရှောင်များကို ကူညီပေးသူ အသက် (၃၀)ဝန်းကျင် အမျိုးသမီးတစ်ဦးက ပြောသည်။

“တချို့နေရာတွေလည်း အလှူရှင်ရှိတယ်။ တချို့နေရာ အလှူရှင်မရှိတော့ ခက်ခဲတယ်။တချို့လဲ ဝယ်သုံးရတယ်။ တချို့လည်း ရေချောင်းတွေမှာ သွားလျှော်ဖွတ်ကြတယ်” ဟု စစ်ရှောင်များကို ကူညီပေးသည့် အမျိုးသမီးက ပြောသည်။

ကိုဗစ် -၁၉ ပြန့်ပွားသည့်အချိန်ဖြစ်သည့်အတွက် စစ်ရှောင်များ စုပေါင်းပြီး နေထိုင်ရသည့်အတွက် စစ်ရှောင်များ၏ ကျန်းမာရေးအတွက်လည်း စိုးရိမ်ရကြောင်း ကူညီသူများက ပြောသည်။

“ကျမတို့ဘက်ကတော့ ဆေးဝါး ပစ္စည်းတွေ လိုအပ်တယ်။ ဒီချိန်မှာ စစ်ရှောင်တွေ များလာတော့ နေမကောင်းတဲ့သူတွေလည်း များတယ်။ နှာစေး၊ ချောင်းဆိုးတွေလိုပေါ့” ဟု စစ်ရှောင်များကို ကူညီပေးနေသည့် အမျိုးသမီး က ဆိုသည်။

လက်ရှိ ပင်လောင်းမြို့နယ်ရှိ စစ်ရှောင်များသည် စားသောက်ရေးပိုင်းသော်လည်းကောင်း၊ ဆေးဝါးသော်လည်းကောင်း အလှူရှင်လျော့နည်းလာပြီး ကျေးရွာမှာ လာရောက်နေထိုင်သည့် စစ်ရှောင်တချို့လည်း နေ့စားလိုက်ပြီး အလုပ်လုပ်နေရသည်။

ထွက်ပြေးတိမ်းရှောင်လာသည့် စစ်ရှောင်များသည် ဒီးမော့ဆိုမြို့နယ်က ဒေသခံပြည်သူများ၊ နမ့်မယ်ခုံကျေးရွာ အနီးပတ်ဝန်းကျင်က ကျေးရွာများမှ ဖြစ်ကြပြီး ၎င်းတို့သည် ပင်လောင်းမြို့နယ်ရှိ အသိမိတ်ဆွေများနေအိမ်၊ ဘုန်းကြီးကျောင်းတချို့တွင် လာရောက်ခိုလှုံကြကြောင်း သိရသည်။

ကရင်နီပြည်တွင် စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့တို့ တိုက်ပွဲဖြစ်ပွားမှုကြောင့် တိမ်းရှောင်လာသူ (၅၀၀၀) ကျော် ရှိခဲ့ပြီး တိုက်ပွဲငြိမ်သွားသည့် မြို့နယ်တချို့မှ ပြည်သူများ နေရပ်သို့ ပြန်သွားသည့်သူများ ရှိသော်လည်း ထွက်ပြေးလာသည့် သူများလည်းရှိကြောင်း သိရသည်။