သျှမ်းပြည်မြောက်ပိုင်း လားရှိုးမြို့နယ် ဆုံကွယ်ကျေးရွာအုပ်စုအတွင်း နှင့် အနီးပတ်ဝန်းကျင်မှ တပ်သိမ်းမြေ (၈၀၀) ဧကတွင် ပြန်လုပ်ကိုင်စားသောက်ရန်အတွက် ပြည်သူများက တောင်းဆိုနေကြောင်း သတင်းသိရသည်။

ပြီးခဲ့သည့် ၂၀၀၀ ခုနှစ်ကတည်းက အရှေ့မြောက်ပိုင်းတိုင်းစစ်ဌာနချုပ် (ရမခ) မှ တပ်ပိုင်မြေအဖြစ် သိမ်းယူလိုက်သည့် ဆုံကွယ်ကျေးရွာအုပ်စုနှင့် အနီးပတ်ဝန်းကျင်ရှိ ကျေးရွာ ၆ ရွာမှ မြေနေရာများအပါအဝင် မြေဧကစုစုပေါင်း ၈၀၀ နီးပါးကို ဒေသခံပြည်သူများ လုပ်ကိုင်စားသောက်ခွင့်ရနိုင်ရန်အတွက် ပြန်လည်ပေးအပ်ရန် အလိုရှိကြောင်း ဒေသခံများက သျှမ်းသံတော်ဆင့်ကို ပြောသည်။

“သမိုင်းကြောင်းအရတော့ ဒီမြေတွေက ပြီးခဲ့တဲ့ ၂၀၀၀ ကတည်းက တပ်ပိုင်မြေဖြစ်ခဲ့ဖူးပေမဲ့ စစ်တပ်က ဘာမှ လာမလုပ်ဘူး၊ ပြည်သူတွေလည်း အဲ့မြေနေရာတွေမှာ လုပ်ကိုင်စားသောက် လို့ရနေခဲ့တယ်၊ အခု စစ်အာဏာသိမ်းလိုက်မှ မြေနေရာကို ကုမ္မဏီတွေဆီငှားပေးတာနဲ့၊ တခြားလုပ်ငန်းတွေလာလုပ်တာနဲ့ ပြည်သူတွေ မလုပ်ရတာ” ဟု ဆုံကွယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ဆုံကွယ်ကျေးရွာအုပ်စုနှင့် အနီးပတ်ဝန်းကျင်မှ ကျေးရွာပြည်သူများသည် လယ်ယာစိုက်ပျိုးရေး အဓိက လုပ်ကိုင်စားသောက်ကြရာ စစ်တပ်က ယခုလို လုပ်ဆောင်လာခြင်းကြောင့် များစွာ အခက်အခဲရှိကြောင်း ဒေသခံများက ပြောသည်။

ထို့အပြင် ရမခ စစ်တပ်မှ သိမ်းယူသွားသည့် မြေနေရာများတွင် ဒေသခံရွာသားတို့ လုပ်ကိုင်စားသောက်ခွင့်မရသော်လည်း တခြားပြင်ပမှ ကုမ္ပဏီများကို မြေနေရာငှားရမ်းပေးနေကြောင်းလည်း သိရသည်။

“အရင်က ကျနော်တို့ရွာသူကြီးနဲ့ ရပ်မိရပ်ဖတွေပေါင်းပြီး ဒီ ရမခ တပ်က သိမ်းထားတဲ့မြေနေရာအားလုံး မဟုတ်ရင်တောင် တချို့တဝက်ပြန်ပေးဖို့ နေပြည်တော်အထိ လူရောစာရာ သုံးကြိမ်သွားရောက်တောင်းဆိုခဲ့ဖူးတယ်၊ လုပ်ပေးမယ်ပြောပြီး ဘာမှထူးမလာဘူး၊ ကျနော်တို့ဒေသခံတွေက လုပ်ကိုင်စားသောက်ဖို့ မြေနေရာရှားလာ တော့ ခက်ခဲကုန်တာပေါ့” ဟုလည်း အထက်ပါ အမျိုးသားက သျှမ်းသံတော်ဆင့်ကို ပြောသည်။

ထို့ကြောင့် ရမခ စစ်တပ်မှ သိမ်းထားသည့် မြေနေရာများအား ဒေသခံများလုပ်ကိုင်စားသောက်နိုင်ရန်နှင့် ပြန်လည်ပေးအပ်ရန် အတွက် ကျေးရွာနေပြည်သူများက မျှော်လင့်နေကြသည်။