မြန်မာပြည်သူများအနေဖြင့် လာမည့် ဧပြီလ ၁ ရက်နေ့က စပြီး ခရီးသွားပါက နိုင်ငံသားကတ်(မှတ်ပုံတင်) တရားဝင်ထုတ်ထားသည့် မှတ်ပုံတင်ဖြင့်သာ အသုံးပြုရန် လူဝင်မှု ကြီးကြပ်ရေး နှင့် ပြည်သူ့အင်အားဝန်ကြီးဌာနက ထုတ်ပြန်လိုက်သည်။
အသက် (၁၆)နှစ် နှင့် အထက် အကျုံးဝင်သူများအား ဥပဒေအရ ကိုင်ဆောင်သင့်သည့် ကတ်တမျိုးမျိုး ထုတ်ပေးရေး အတွက် ပန်းခင်း စီမံချက်ဖြင့် ကွင်းဆင်းပြီး လုပ်ဆောင်ပေးနေကြောင်း၊ လိုအပ်သည့်နေရာများတွင် တအိမ်တက်ဆင်း ကာ ဆောင်ရွက်ပေးနေကြောင်းလည်း မတ် ၅ရက်နေ့တွင် ထုတ်ပြန်ခဲ့သည်။
ထုတ်ပြန်ချက်တွင် ခရီးသွားလာမှုတွင်လည်းကောင်း ၊ တည်းခိုနေထိုင်ရာတွင် နိုင်ငံသားကတ် (မှတ်ပုံတင်)ကို ပြသနိုင်ရမည်ဖြစ်ပြီး၊ ထောက်ခံစာများအား ပြသပြီး ခရီးသွားလာခြင်း၊ အစစ်ဆေးခံခြင်းကို ခွင့်ပြုသွားမည် မဟုတ်တော့ကြောင်း ရေးသားဖော်ပြထားသည်။
ထို့ကြောင့် လက်ရှိမှာလည်း စစ်ကောင်စီလက်အောက်ခံ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက မှတ်ပုံတင် လိုက်လံလုပ်ဆောင်ပေးနေကြောင်း သိရသည်။
“ အခုမြန်မာနိုင်ငံထဲမှာ တော်လှန်ပုန်ကန်မှုတွေက များလာတယ်။ စစ်ကောင်စီက မှတ်ပုံတင်တွေ လိုက်လုပ်ပေးနေတာက သူတို့ဆန့်ကျင်တဲ့သူတွေကို ဖမ်းဆီးရလွယ်ကူအောင်လို့ လုပ်တာလို့ ကျနော်တို့တော့ မြင်တယ်။ အခုက သူတို့ လိုက်စစ်ဆေးပြီး တော်လှန်နေတဲ့သူကို ဖမ်းဆီးရလွယ်ကူအောင်လုပ်နေတာပဲ” ဟု လားရှိုးမြို့ဒေသခံ အမျိုသားတစ်ဦးက ပြောသည်။
ထိုသို့ ထုတ်ပြန်ချက် နှင့် စစ်ကောင်စီတို့၏ လုပ်ရပ်များသည် ပြည်သူများခရီသွားလာမှု ခက်ခဲလာအောင်ပြုလုပ်နေခြင်း ဖြစ်ကြောင်း သိရသည်။
“ အခုက လဝက ကနေ ဒီလိုလုပ်လာတာဆိုတော့ ပြည်သူတွေကို ကြောက်အောင်လို့ အရင်ခြိမ်းခြောက်နေတဲ့ သဘောဖြစ်တယ်။ မှတ်ပုံတင်သာသွားလုပ်ကြပြီး ဘယ်မှ မသွားရဲကြတော့တာလည်းရှိတယ်။ သူတို့ ဆန်ကျင်နေတဲ့သူအတွက် လည်း ခက်ခဲလာအောင်လုပ်တာပေါ့” ဟု အထက်ပါ လားရှိုးမြို့ ဒေသခံက ပြောသည်။
စစ်ကောင်စီက အာဏာသိမ်းပြီးနောက်ပိုင်းတွင် ခရီးသွားလာသူများအပေါ်ကို စစ်ဆေးမှု ယခင်ကထက်ကြမ်းလာသောကြောင့် ခရီးထွက်သူများ နည်းပါးလာပြီး ကားသမားများအတွက်လည်း စားဝတ်နေရေးခက်ခဲလာကြောင်း သိရသည်။
“ ခရီးသွားတဲ့သူကတော့နည်းလာတယ်။ လမ်းမှာလည်း စစ်ကောင်စီက မှတ်ပုံတင်တွေ ဘာတွေကိုတောင်းစစ်တယ်လေ။ ပိုက်ဆံတွေလည်းတောင်းတာရှိတယ်။ သူတို့စစ်တဲ့နေရာ ဆိုရင် ပထမဆုံး မှတ်ပုံတင်တောင်းကြည့်တာ။ အခုတလော ခရီးသွားတဲ့သူတွေက အရမ်းနည်းလာတယ်။ ကျန်းမာရေးအရ သွားလာတဲ့သူတွေဘဲ များတယ်” ဟု မူဆယ် – မန္တလေးလမ်းပြေးဆွဲသည့် ကားသမား အမျိုးသားတစ်ဦးက ပြောသည်။
ထို့အပြင် စစ်ကောင်စီက မှတ်ပုံတင်ကို အတင်းအကြပ်လုပ်ပေးနေခြင်းသည် စစ်ကောင်စီ၏ လာမည့်ရွေးကောက်ပွဲ အပေါ်တွင် လည်း သက်ဆိုင်နေကြောင်း နိုင်ငံရေးလေ့လာသုံးသပ်သူတချို့က သျှမ်းသံတော်ဆင့်ကို ပြောဆိုဖူးသည်။
နိုင်ငံသားကတ်ပြား မှတ်ပုံတင်ကို အသက် ၁၆ နှစ်အထက်ရှိသူများက လုပ်ဆောင်ထားရမည်ဖြစ်ပြီး၊ မှတ်ပုံတင်အတု ကိုင်ဆောင်ထားသူများ နှင့် အပိုရှိထားသူများကို တည်းဆဲဥပဒေဖြင့် အရေးယူသွားမည်ဟု ထုတ်ပြန်ထားသည်။
