သျှမ်းပြည်တောင်ပိုင်း ဆီဆိုင်မြို့နယ်ရောက် ကရင်နီပြည် (ကယား)မှ စစ်ရှောင်များ စားနပ်ရိက္ခာ ခက်ခဲကြုံတွေ့နေကြောင်း သတင်းသိရသည်။

လက်ရှိ စစ်ရှောင်တချို့ နေရပ်ပြန်သွားသော်လည်း စစ်ရှောင်စခန်းများတွင် ခိုလှုံနေသည့်သူ များစွာကျန်ရှိနေသေးကြောင်း၊ အလှူရှင်များ နည်းပါးသွားသည့်အတွက် အစားအသောက်များခက်ခဲလာခြင်းဖြစ်ကြောင်း စစ်ရှောင်ကူညီသူများက သျှမ်းသံတော်ဆင့်ကို ပြောသည်။

“ကျနော်တို့ ဖွင့်ထားတဲ့ စခန်းတွေမှာ တစ်ပတ်စာလောက်ပဲ ကျန်တယ်၊ တချို့နေရာက ကုန်သလောက်တောင် ဖြစ်နေပြီ၊ ခုချိန်က သီးနှံပေါ်ချိန်လည်း မဟုတ်ဘူး၊ ဒေသခံတွေလည်း အလုပ် ပါးတဲ့အချိန်ဆိုတော့ အခက်ခဲတွေဖြစ်နေတော့တာ၊ အလှူရှင်တွေလည်း အရမ်းနည်းသွားပြီ” ဟု ဆီဆိုင်မြို့နယ် ဆိုက်ခေါင်စံပြကျေးရွာမှ စစ်ရှောင်ကူညီသူ အမျိုးသားတစ်ဦးက ပြောသည်။

ဆိုက်ခေါင်စံပြကျေးရွာရှိ စစ်ရှောင်စခန်း (၇)နေရာတွင် စစ်ရှောင် (၅၀၀)ဝန်းကျင် ရှိနေပြီး ဆွေမျိုးအိမ်များတွင် နေထိုင်သည့် စစ်ရှောင် ၃၀၀ ဝန်းကျင်ရှိနေကြောင်း သိရသည်။

ဆီဆိုင်မြို့ရောက် စစ်ဘေးရှောင်တချို့ နေရပ်ပြန်သွားကြပြီး အများစုမှာ ကရင်နီပြည် လွိုင်ကော်မြို့နယ်အတွင်း နေထိုင်ကြသူများ ဖြစ်ကြောင်း၊ သို့သော် ပြီးခဲ့သည့် လအတွင်းက မိုးဗြဲနှင့် ဖယ်ခုံ နယ်တွင် စစ်ကောင်စီနှင့် ပြည်သူ့ကာကွယ်ရေးတပ်တို့ တိုက်ပွဲပြင်းထန်ခဲ့သည့်အတွက် ဒေသခံထောင်ချီ ဆီဆိုင်မြို့နယ်အတွင်းသို့ ထပ်မံထွက်ပြေးတိမ်းရှောင်ခဲ့ရကြောင်း သိရသည်။

“ပြန်သွားတာလည်း ရှိတယ်၊ အရင်လကုန်ပိုင်းက ပြန်ရောက်လာတာလည်း များတယ်၊ ပြန်ရောက်လာတာက မိုးဗြဲနဲ့ ဖယ်ခုံ နယ်ထဲကပါ၊ သူတို့က စစ်ရှောင်စခန်းမှာ တစ်နေရာကို ၂၀၊ ၃၀ ယောက် အဲ့လို ခွဲပြီး နေကြတာ၊ အားလုံးကို လက်ခံလို့ အဆင်မပြေလို့ တချို့ ရွာတွေမှာ ဆွေမျိုးအိမ်တွေမှာ သွားနေကြတယ်၊ သူတို့တွေလည်း အကူညီ လိုအပ်နေတယ်” ဟု ဆီဆိုင်မြို့မှ စစ်ရှောင်ကူညီပေးနေသည့် ဦးဇင်းတစ်ပါးက မိန့်သည်။

လက်ရှိ ဆီဆိုင်မြို့နယ်အတွင်း ရောက်ရှိခိုလှုံနေသည့် စစ်ရှောင်များမှာ သျှမ်းပြည် တောင်ပိုင်းနှင့် ကရင်နီပြည် နယ်စပ် ဖယ်ခုံ၊ မိုးဗြဲနယ်တို့မှ အများဆုံး ဖြစ်ပြီး လွိုင်ကော်၊ ဒီးမော့ဆို၊ ဖရူဆိုနှင့် အခြားမြို့နယ်တို့မှ ပြည်သူများလည်း ရောက်ရှိခိုလှုံနေကြောင်း သိရသည်။

ထို့အပြင် ဆီဆိုင်မြို့နယ်အတွင်း ကိုဗစ်ကူးစက်မှုးများ ပြန်လည် မြင့်တက်လာသည့်အတွက် စစ်ရှောင်များအတွက်ပါ စိုးရိမ်နေရကြောင်း ပရဟိတလုပ်ငန်း ဆောင်ရွက်နေသူများက ပြောသည်။