Thursday, June 20, 2024

ရွာငံမြို့နယ် NLD ပါတီ လွှတ်တော်ကိုယ်စားလှယ် နှင့်အတူ မိသားစုဝင်များ ဖမ်းဆီးခံရ

Must read

သျှမ်းပြည်တောင်ပိုင်း ရွာငံမြို့နယ်မှ အမျိုးသားဒီမိုကရေစီအဖွဲ့ချုပ် (NLD) ပါတီ လွှတ်တော်ကိုယ်စားလှယ်တစ်ဦး နှင့်အတူ ၎င်း၏မိသားစုဝင်များကို စစ်ကောင်စီတို့က ဖမ်းဆီးခေါ်ဆာင်သွားကြောင်း သတင်းသိရသည်။

ရွာငံမြို့နယ် အလယ်ချောင်ရွာတွင်နေထိုင်သည့် NLD ပါတီမှ လွှတ်တော်ကိုယ်စားလှယ် ဦးစိုင်းဝဏ္ဏနှင့် ၎င်း၏ မိသားစုဝင်များကို ယနေ့ (မတ် ၇)ရက် အာရုဏ်ဦးအချိန်တွင် စစ်ကောင်စီဘက်မှ အင်အားအများအပြားတို့ဖြင့် လာရောက် ဖမ်းဆီးသွားကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဒီနေ့ မနက်မှာ လာဖမ်းသွားတာပါ၊ အာရုံဦးအချိန်လို့ ပြောရမှာပေါ့၊ နံနက် ၄ နာရီဝန်းကျင်လောက်၊ ကားနဲ့လာ ဖမ်းတာ၊ သူနဲ့ သူ့အမျိုးသမီးရော ကလေးရောပါသွားတယ်၊ အိမ်မှာ နေမကောင်းတဲ့ အမေအိုတစ်ဦးတည်း ကျန်နေခဲ့တာ” ဟု ၎င်းနှင့် နီးစပ်သည့် ဒေသခံအမျိုးသားတစ်ဦးက ဆိုသည်။

ဦးစိုင်းဝဏ္ဏသည် စစ်အာဏာသိမ်းပြီးနောက်ပိုင်း ဖမ်းဆီးမှုများ ပြုလုပ်လာချိန်တွင် တိမ်းရှောင်ခဲ့ပြီး စစ်ကောင်စီတို့ မျက်ခြေပျက်သွားသော်လည် လက်ရှိတွင် ရွာထဲ ကျန်နေသည့် အမေအို နေမကောင်းသည့် အတွက် ပြန်လာစဥ် ဒလန်သတင်းပေးမှုဖြင့် ဖမ်းဆီးခံရကြောင်း သတင်းသိရသည်။

“ဒလန်သတင်းပေးလို့ပေါ့၊ သူပြန်ရောက်တာ ဘယ်လောက်မှ မကြာသေးဘူး၊ သူ့အမေ နေမကောင်းလို့ ပြန်လာတာ၊ အခုတော့ စစ်ကောင်စီတွေက သူနဲ့ သူ့မိသားစုကိုပါ ဖမ်းသွားပြီ၊ ဘယ်နေရာကို ဘာကြောင့် ဖမ်းရလဲ မသိရဘူး” ဟု ၎င်းက ပြောသည်။

ပြီးခဲ့သည့် မတ်လ ၄ ရက်နေ့ ညနေပိုင်းအချိန်မှာလည်း ရွာငံမြို့မှ ခံဝန်လက်မှတ်ရေးထားသည့် လူငယ် ၄ ဦးကို စစ်ကောင်စီတပ်သားတို့က လာရောက်ဖမ်းဆီးခေါ်ဆောင်သွားပြီး ယနေ့အချိန်ထိ မိသားစုဝင်များနှင့် တွေ့ခွင့်မရသေးကြောင်းလည်း သိရသည်။

“ဒီလူငယ်တွေကျ အရင်က ဆန္ဒပြတာတွေ သပိတ်တွေဦးဆောင်တာရှိတယ်၊ ဒါပေမဲ့ ခံဝန်လက်မှတ်ရေးထိုးထားပြီးသား၊ ပြီးတော့ အခုမှာလည်း ဘာလှုပ်ရှားမှုမှ မရှိတဲ့သူတွေ၊ ဘာကြောင့်ဖမ်းရသလဲမသိဘူး၊ ခုထိ မိသားစုနဲ့ အဆက်အသွယ်မရသေးဘူး”ဟု ရွာငံမြို့မှ တိမ်းရှောင်နေရသူ အမျိုးသားတစ်ဦးကလည်း သျှမ်းသံတော်ဆင့်ကို ပြောသည်။

ရွာငံမြို့အတွင်းတွင် စစ်တပ်အခြေစိုက်လှုပ်ရှားမှုမရှိသော်လည်း ၂၀၂၁ နှောင်းပိုင်းကာလမှ စတင်ကာ စစ်ကောင်စီတပ်သားများသည် သေနတ်ဖြင့် ရမ်းသမ်းပစ်ခတ်ခြင်း၊ ဒလန်သတင်းပေးမှုဖြင့် ပြည်သူများကို ဖမ်းဆီးခြင်း၊ ပြည်သူ့နေအိမ်များကို အကြောင်းရင်းမရှိ ဝင်ရောက်မွှေနှောက် စစ်ဆေးခြင်းတို့ ပြုလုပ်နေကြောင်း သိရသည်။

Leave a Comments

- Advertisement -spot_img

Latest article