သျှမ်းပြည်တောင်ပိုင်း ပင်လုံမြို့နယ် ဆနင်းတောင်ကြောတွင် မြောက်ပိုင်းမဟာမိတ်တို့ ရောက်ရှိနေပြီး တိုက်ပွဲဖြစ်ပွားမည်ကို စိုးရိမ်သဖြင့် ပင်လုံမြို့ပေါ်သို့ စစ်ဘေးကြိုတင်တိမ်းရှောင်လာသူ (၁၀၀၀)ကျော် ရှိကြောင်း စုံစမ်းသိရှိရသည်။
လက်ရှိ ပင်လုံမြို့ပေါ်သို့ ထွက်ပြေးတိမ်းရှောင်လာသူ (၁၀၀၀) ကျော်သည် ပင်လုံမြို့နယ် ဆနင်းတောင်ကြောတစ်လျှောက် ဆနင်းကျေးရွာအုပ်စု၊ ပန်ဟူကျေးရွာအုပ်စု၊ နားတစ်ကျေးရွာအုပ်စု၊ ဖောင်းဆိုင်ကျေးရွာအုပ်စု၊ ဆဟောင်းကျေးရွာအုပ်စု မှ ဒေသခံများနှင့် လဲချားမြို့နယ် ဝမ်ယိမ်းကျေးရွာအုပ်စု မှ ဒေသခံများ ဖြစ်ကြောင်း သိရသည်။
“စစ်ဘေးကြိုတင်တိမ်းရှောင်လာတာ (၁၀၀၀) နဲ့ (၂၀၀၀) ကြားလောက်တော့ရှိတယ်။ အဘက်ဘက်ကတော့ လာကြတယ်။ ကိုယ့်အစီစဉ်နဲ့ကိုယ် လာကြတာဆိုတော့ စာရင်းတွေ အကုန်ကောက်လို့ မရသေးဘူး။ ရပ်ကွက်တွေထဲတော့ ပြည့်နေတာပဲ” ဟု ပင်လုံဒေသခံ အသက် (၃၀)ဝန်းကျင် အမျိုးသားတစ်ဦးက ပြောသည်။
ထွက်ပြေးတိမ်းရှာင်လာသည့် သူများသည် ဖေဖော်ဝါရီ တတိယပတ်ခန့်က ထွက်ပြေးတိမ်းရှောင်လာကြပြီး တချို့ကျေးရွာအုပ်စုများမှာ တိုက်ပွဲများ ငြိမ်သက်သွားသော်လည်း လူကြီးပိုင်းများ၊ မိခင်နှင့် ကလေးများကိုတော့ နေရပ်သို့ မခေါ်ပြန်သေးကြောင်း သိရသည်။
“တပ်ပေါင်းစုတွေ ပန်ဟူကျေးရွာအုပ်စုထဲက ကျေးရွာတွေထဲ ရောက်သွားပြီလို့ကြားတယ်။ ဆနင်းရဲ့ မြောက်ဘက်ရှိတယ်။ ထိတွေ့မှု နည်းနည်းတော့ရှိတယ်လို့ကြားတယ်။ ဒေသခံ ပြည်သူတွေကတော့ စိုးရိမ်ပြီး တိမ်းရှောင်လာတာတွေရှိတယ်” ဟု ဆနင်းဒေသခံ အမျိုးသား တစ်ဦးက ပြောသည်။
ပင်လုံမြို့ပေါ် စစ်ဘေးကြိုတင်တိမ်းရှောင်လာသည့် တချို့သည် ဆွေမျိုးမိတ်ဆွေနေအိမ်များတွင်နေထိုင်ပြီး တချို့မှာ အိမ်ငှားနေရကြောင်း သိရသည်။
လက်ရှိချိန်ထိ ပင်လုံမြို့ပေါ်တွင် စစ်ရှောင်စခန်း ဖွင့်လှစ်ခြင်း မရှိသေးပေ။
RCSS နှင့် မြောက်ပိုင်းမဟာမိတ်တို့သည် မိုင်းကိုင်မြို့နယ်အတွင်းသို့ တိုက်ပွဲပြင်းထန်ခဲ့ပြီး လဲချားမြို့နယ် နှင့် ပင်လုံမြို့နယ်ကြားရှိ ကျေးရွာတချို့ စစ်မီးကူးလာခဲ့ခြင်းဖြစ်ပြီး လက်ရှိအချိန်ထိ နှစ်ဘက်တပ် စစ်ရေးတင်းမာနေလျက်ရှိကြောင်း သိရသည်။
Leave a Comments