သျှမ်းပြည်တောင်ပိုင်း ဖယ်ခုံမြို့နယ်အတွင်း စစ်ရှောင်များ ၆၀၀၀ ကျော်ရှိပြီး စားဝတ်နေရေး ခက်ခဲနေကြောင်း စုံစမ်းသိရှိရသည်။

စားဝတ်နေရေးခက်ခဲနေသည့် စစ်ရှောင်များသည် အများစုမှာ ကရင်နီပြည် (ကယား)မှ လာသည့် စစ်ရှောင်များဖြစ်ပြီး၊ အဆင်ပြေသည့်နေရာများတွင် တဲထိုးပြီး နေထိုင်နေရကြောင်း ဖယ်ခုံ PDF တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။

“ကျနော်တို့ စစ်တမ်းအရဆိုရင် ဖယ်ခုံမြို့နယ်ထဲမှာက စစ်ရှောင်တွေ ၆၀၀၀ လောက်ရှိတယ်။ အကုန်လုံးက တစ်ယောက်တစ်နေရာစီရှိနေကြတာပါ။ တချို့လည်း တဲထိုးပြီးတော့နေကြတယ်။ အကုန်တော့ လိုက်မကြည့်ရဘူး။ အခုလည်း စစ်ရှောင်တွေ တချို့က ဆန်၊ ဆီတွေ ကုန်နေပြီလို့ သိရတယ်။ စားဖို့သောက်ဖို့လည်း လိုလာပြီလေ” ဟု ဖယ်ခုံမြို့ PDF တပ်ဖွဲ့ဝင်တစ်ဦးက ပြောသည်။

ဖယ်ခုံမြို့နယ်အတွင်းသို့ရောက်ရှိလာသည့် စစ်ရှောင်များသည် ဘုန်ကြီးကျောင်းများ၊ ဈေးအတွင်းနှင့် တချို့ တောထဲတွင် တဲထိုးကာ နေထိုင်ကြပြီး တချို့ မှာ ဆွေမျိုးအိမ်များတွင် နေထိုင်လျက်ရှိကြောင်း၊ စစ်ရှောင်များအတွက် မိုးကာ၊ ဖျာ၊ ဆေးဝါးများ၊ စားဝတ်နေရေးအတွက် ဆန်၊ ဆီ များ လိုအပ်နေကြောင်း သိရသည်။

“တချို့က တောထဲမှာနေတော့ မိုးကာ၊ ဖျာ၊ ဆေးဝါးတွေလိုနေသေးတယ်။ တဲထိုးပြီး နေကြတဲ့သူတွေလည်း ရှိတယ်။ တချို့က ဆွေမျိုးအိမ်မှာ သွားနေတာ။ ဘုန်းကြီးကျောင်းတို့၊ ရွာအပြင်မှာတို့ သွားနေကြတာ။ စားဝတ်နေရေးအတွက်လည်း ခက်ခဲနေကြတယ်” ဟု စစ်ရှောင်များကို ကူညီပေးနေသည့် KRC က ပြောသည်။

လက်ရှိ စစ်ရှောင်များထဲတွင် ကလေးများလည်း အများအပြားရှိနေသည်။ ဖယ်ခုံ အရှေ့ဘက်ကမ်းတွင် PDF တပ်ဖွဲ့ဝင်များ ကူညီစောင့်ရှောက်ပေးထားသည့် စစ်ရှောင် ၃၀၀ ဝန်းကျင်ရှိနေကြောင်း သိရသည်။

“ကျနော်တို့ PDF အနေနဲ့ ကူညီစောင့်ရှောက်ပေးနေတာတော့ ၃၀၀ ဝန်းကျင်ရှိတယ်။ ကျနော်တို့နားမှာ ကလေးတွေလည်းများတယ်။ သူတို့အတွက်က စာသင်ပေးဖို့ အထောက်ကူတွေလိုအပ်နေတယ်။ ကျနော်တို့လည်း စာသွားသင်ပေးတာရှိတယ်” ဟု ဖယ်ခုံမြို့ အရှေ့ဘက်ကမ်း PDF တပ်ဖွဲ့ဝင်တစ်ဦးက ပြောသည်။

လက်ရှိတွင် သျှမ်းပြည်အတွင်းရှိ ဖယ်ခုံ၊ မိုးဗြဲတို့တွင် တိုက်ပွဲငြိမ်သက်သွားသော်လည်း ကရင်နီပြည် ဒီးမော့ဆိုမြို့နယ်ထဲတွင် စစ်ကောင်စီ နှင့် ပြည်သူ့ ကာကွယ်ရေးတပ်ဖွဲ့ PDF တို့ နေ့တိုင်းနီးပါး တိုက်ပွဲ ဆက်လက်ပြင်းထန်နေလျက်ရှိကြောင်း သိရသည်။

စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့တို့သည် ဖေဖော်ဝါရီလ ၁၅ ရက်နေ့ကတည်းက စပြီး တိုက်ပွဲ ဖြစ်ပွားခဲ့ကာ စစ်ကောင်စီဘက်မှ လက်နက်ကြီး၊ လက်နက်ငယ်ဖြင့် ဝင်ရောက်တိုက်ခိုက်ခဲ့သည့်အပြင် ပြည်သူများကို ဖမ်းဆီး ပစ်ခတ်သတ်ဖြတ်ခြင်း၊ နေအိမ်များကို မီးရှို့ဖျက်ဆီးခြင်းများကိုလည်း ပြုလုပ်ခဲ့ကြောင်း သိရသည်။