သျှမ်းပြည်မြောက်ပိုင်း နမ့်ခမ်းမြို့တွင် စစ်ကောင်စီလက်အောက်ခံ ဝန်ထမ်းများသည် ဒေသခံများထံ အိမ်ထောင်စု မိတ္တူများ လိုက်လံကောက်ခံနေကြောင်း စုံစမ်းသိရှိရသည်။
နမ့်ခမ်းမြို့နယ်တွင်းရှိ ရပ်ကွက်၊ ကျေးရွာအသီးသီးရှိ နေအိမ်များမှ အိမ်ထောင်စု မိတ္တူ (၂)စောင်ကို သက်ဆိုင်ရာ ရပ်ကွက် စာကြည့်တိုက်များထံ လာရောက်ပေးရန် သက်ဆိုင်ရာအာဏာပိုင်များက ပြောလာကြောင်း နမ့်ခမ်းဒေသခံ အသက် ၃၀ အရွယ်ရှိ အမျိုးသားက သျှမ်းသံတော်ဆင့်ကို ပြောသည်။
“ဒီနေ့ဆိုရင် (၃)ရက်လောက် ရှိပြီ။ ဘာအကြောင်းပြချက်လဲတော့မသိဘူး။ အထက်က စာရင်းတောင်းလာတယ် လို့ပဲ ပြောတယ်။ မပေးရင် သူတို့ ဘာလာလုပ်မလဲဆိုတာ မသိနိုင်ဘူးလေ။ ပေးပြီးတော့ စိတ်ပူရတယ်။ သူတို့က ဘာပြန်လုပ်မလဲပေါ့” ဟု ၎င်းကပြောသည်။
စစ်ကောင်စီမှ အိမ်ထောင်စု မိတ္တူစာရင်း ကောက်ခံထားခြင်းနှင့် ပတ်သက်ပြီး ဒေသခံများလည်း စိုးရိမ်မှုရှိနေပြီး ဧည်သည့်စာရင်းများ၊ စစ်ကောင်စီကို တော်လှန်နေသည့် အဖွဲ့များကို စာရင်းကောက်ခံခြင်းလည်း ဖြစ်နိုင်ကြောင်း နမ့်ခမ်းဒေသခံများက မှတ်ချက်ပေး ပြောဆိုခဲ့သည်။
“သူတို့ကို တော်လှန်နေတဲ့ သူတွေကို စစ်ချင်တာလည်း ဖြစ်နိုင်တယ်။ လူအဝင်အထွက်ကို စစ်တာလည်း ဖြစ်နိုင်တယ်” ဟု နမ့်ခမ်းဒေသခံ အမျိုးသမီးတစ်ဦးကလည်း ပြောသည်။
ဇန်နဝါရီလကုန်ပိုင်းလောက်က နမ့်ခမ်းမြို့ အတွင်း စစ်ကောင်စီ ထုတ်ကုန်များကို အသုံးမပြုရန်အတွက် နမ့်ခမ်းပျောက်ကြားအဖွဲ့ က ထုတ်ပြန်ထားသည့် စာစောင်သည် လူမှုကွန်ရက် စာမျက်နှာပေါ် ပျံ့နှံ့နေသည်ကို စုံစမ်းသိရှိရသည်။
နမ့်ခမ်းမြို့ ပျောက်ကြားအဖွဲ့က ထုတ်ပြန်ထားသော်လည်း ဒေသခံတချို့က နမ့်ခမ်းမြို့ပေါ်တွင် PDF ရှိ၊ မရှိ မသေချာကြောင်း နမ့်ခမ်းဒေသခံများက ပြောဆိုကြသည်။
နမ့်ခမ်းမြို့တွင် တိုင်းရင်းသားလက်နက်ကိုင်တပ်ဖွဲ့ အများအပြားရှိသည့် ဒေသ တစ်ခုဖြစ်သည်။
Leave a Comments