သျှမ်း- ကယားနယ်စပ် နမ့်မယ်ခုံနယ်တစ်လျှောက် စစ်ကောင်စီ အုပ်စုက ရမ်းသမ်းပစ်ခတ်မှုကြောင့် စစ်ရှောင်နေရာများမလုံခြုံကြောင်း စုံစမ်းသိရသည်။

လက်ရှိ နမ့်မယ်ခုံနယ်ကြောတစ်လျှောက်ရှိ ခိုလှုံနေသော စစ်ရှောင်များသည် တိုက်ပွဲများကို ထပ်မံကြုံရသည့် အပြင် ယခုရောက်ရှိနေသည့် နေရာတွင်လည်း စစ်ကောင်စီက ရမ်းသမ်းပစ်ခတ်နေသဖြင့် လုံခြုံမှုမရှိကြောင်း စစ်ရှောင်များကို ကူညီစောင့်ရှောက်ပေးနေသည့် ဒေသခံပြည်သူ့ကာကွယ်ရေးတပ်ဖွဲ့များထံမှ သိရသည်။

“အခုသူတို့ရောက်တဲ့နေရာကလည်း စစ်ကောင်စီတွေက လာပြီးထိုးစစ် ပစ်ခတ်နေကြတော့ သူတို့လည်း မလုံခြုံ တော့ဘူးလေ၊ အဲ့ကြောင့် သေချင်းသေရလည်းကိုယ့်နယ်ကိုယ်ယာမှာပဲ အသေခံမယ်၊ ပြန်တော့မယ် ဆိုပြီးတော့ စစ်ရှောင်တွေက ကျနော်တို့ကိုပြောလာတယ်၊ ဒါပေမဲ့ သူတို့နေရာကလည်း လုံးဝလုံခြုံမှုမရှိလို့ မပြန်ခိုင်းဘူး” ဟု စစ်ရှောင်များကို ကူညီစောင့်ရှောက် ပေးနေသည့် PDF တပ်ဖွဲ့များထံမှ သိရသည်။

စစ်ကောင်စီတပ်ဖွဲ့တို့သည် အကြမ်းဖက် နည်းလမ်းဖြင့် ဒေသခံပြည်သူ့ကာကွယ်ရေးတပ်ဖွဲ့များကို ထိုးစစ်ဆင်နေပြီး၊ ပြည့်သူ့နေအိမ်များနှင့် စစ်ရှောင်စခန်းများပါ လက်နက်ကြီးလက်နက်ငယ်တို့ဖြင့် ရမ်းသမ်းပစ်ခတ်နေမှုကြောင့် အပြစ်မဲ့ အရပ်သားပြည်သူများ အသက်အိုးအိမ်ဆုံးရှုံး နေရကြောင်း သိရသည်။

“စစ်ကောင်စီတွေက PDF တွေရှိမယ့် နေရာလို့ထင်မိရင် လက်နက်ကြီးနဲ့ လမ်းကြောင်းရှင်းပြီးမှ စစ်ကြောင်း ချီတယ်၊ အဲ့လိုလမ်းကြောင်းရှင်းတဲ့ခါမှာ ဦးတည်ရာမရှိ ရမ်းပြီးပစ်ပြီးထိချင်တဲ့သူထိ ဆိုတဲ့အနေအထားပေါ့၊ အဲ့ကြောင့် ပြည်သူတွေကလည်း ထိခိုက်ရတယ်၊ ကျဆုံးရတယ်” ဟု PDF တပ်ဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။

အာဏာသိမ်းစစ်ကောင်စီတို့သည် သျှမ်း-ကယားနယ်စပ် ဖယ်ခုံ၊ မိုးဗြဲနှင့် ဒီးမောဆိုတို့ဘက်ကို အင်အားအလုံး အရင်းနှင့် ပြင်းထန်စွာ ထိုးစစ်ဆင်နေသော်လည်း ဒေသခံပြည်သူ့ကာကွယ်ရေးတပ်ဖွဲ့များက လက်နက် အင်အား လူအင်အားမမျှသဖြင့် ပျောက်ကြားနည်းဖြင့်သာ တန်ပြန်တိုက်ခိုက်နိုင်ကြောင်း သိရသည်။

ပြီးခဲ့သည့် ၂၀၂၁ ခုနှစ် နှောင်းပိုင်းမှ ယနေ့အထိ ကရင်နီပြည်နှင့် သျှမ်းကယားနယ်စပ်မှ စစ်ရှောင်များသည် သိန်းချီရှိနေပြီး စစ်ဘေးရှောင်များအတွက် အကူအညီနှင့် ထောက်ပံ့များ လိုအပ်နေကြောင်းလည်း သိရသည်။