သျှမ်းပြည်တောင်ပိုင်း ပင်လောင်းမြို့နယ်အတွင်း စစ်ရှောင်လာသည့် ပြည်သူများ ကိုဗစ် – ၁၉ စစ်ဆေးမှု မရှိထားလျှင် ရွာအတွင်းသို့ ဝင်ခွင့်ပြုမည်မဟုတ်ကြောင်း စုံစမ်းသိရှိရသည်။

ကရင်နီပြည် စစ်ကောင်စီနှင့် ပြည်သူ့ကာကွယ်ရေးတပ်ဖွဲ့တို့ တိုက်ပွဲဖြစ်ပွားမှုကြောင့် တိမ်းရှောင်လာသူ (၅၀၀၀) ကျော် ရှိခဲ့ပြီး တိုက်ပွဲငြိမ်သွားသည့် မြို့နယ်တချို့မှ ပြည်သူများ နေရပ်သို့ပြန်သွားခဲ့သည်။

ထိုပြန်သွားသည့် ပြည်သူများသည် တိုက်ပွဲ ပြန်ပြင်းထန်လာမှုကြောင့် နောက်ထပ်တကြိမ် ပြန်လည် ထွက်ပြေးခဲ့ရသူများလည်းရှိကြောင်း ပင်လောင်းဒေသခံ အသက် (၃၅)နှစ်အရွယ်ရှိ အမျိုးသမီး တစ်ဦးက ပြောသည်။

“ရွာတွေမှာ ထွက်ပြေးလာကြတဲ့စစ်ရှောင်တွေက ဘယ်လိုအခက်ခဲဖြစ်လဲဆိုတော့ ကိုဗစ် – ၁၉ စစ်ဆေးပြီးတဲ့ လက်မှတ် မရှိရင် မရဘူး။ ရွာတွေမှာလဲ မလက်ခံရဲဘူး။ အရင်ကတော့ ဒီလိုမလုပ်ဘူး” ဟု ပင်လောင်းဒေသခံ အသက် (၃၂)နှစ် အမျိုးသမီး တစ်ဦးက ပြောသည်။

လက်ရှိ ထွက်ပြေးလာသည့် စစ်ရှောင်များသည် နေမကောင်းသည့် သူများရှိနေပြီး ကိုဗစ် စစ်ဆေးမှုရှိပြီးမှ ရွာကို ပေးဝင်ကြောင်း၊ များသောအားဖြင့် ရွာများက ကိုဗစ် စစ်ဆေးပြီး ပေးမဝင်တာများလည်း ရှိကြောင်း ၎င်းကပြောသည်။

ထွက်ပြေးတိမ်းရှောင်လာသည့် စစ်ရှောင်များသည် ဒီးမော့ဆိုမြို့နယ်က ဒေသခံပြည်သူများ၊ နမ့်မယ်ခုံကျေးရွာ အနီးပတ်ဝန်းကျင်က ကျေးရွာများဖြစ်ကြပြီး ၎င်းတို့သည် ပင်လောင်းမြို့နယ်ရှိ အသိမိတ်ဆွေများနေအိမ်၊ ဘုန်းကြီးကျောင်းတချို့တွင် လာရောက်ခိုလှုံကြကြောင်း သိရသည်။