သျှမ်းပြည် မြောက်ပိုင်း နောင်ချိုမြို့နယ် ယနေ့ (မတ် ၂)ရက် မနက်ပိုင်းတွင် ဗြုံးကျင်းပိကာ တစ်ဦး သေဆုံးသွားကြောင်း သတင်းသိရသည်။
ယနေ့ (မတ်လ ၂)ရက် မနက် ၉ နာရီတွင် နောင်ချိုမြို့ အနောက်ဖက်ရှိ ဗြုံးတောင်တွင် အမျိုးသားတစ်ဦး ဗြုံးကျင်းပိကာ သေဆုံးသွားခဲ့ရကြောင်း ဒေသခံများထံမှ သိရသည်။
“နောင်ချိုမြို့ အနောက်ဖက် ဗြုံးတောင်မှာဖြစ်တာပါ၊ ဗြုံးကျင်း ပြိုကျပြီး သေဆုံးသွားတာလို့တော့ ပြောတယ်။ ဒီနေ့ မနက်ပိုင်းပါပဲ၊ ၉ နာရီလောက်မှာဖြစ်သွားတယ်၊ နောင်ချိုက လူမှုကူညီရေးအဖွဲ့တွေ ပူးပေါင်းပြီး သွားသယ်ပေးတယ် ” ဟု နောင်ချိုမှ ပရဟိတ အဖွဲ့ဝင် အမျိုးသားတစ်ဦးက သျှမ်းသံတော်ဆင့်ကို ပြောသည်။
ဗြုံးကျင်းပိ သေဆုံးသူသည် နောင်ချိုမြို့ ဘူတာရပ်နေ ကိုမိုးမင်းအောင် ဖြစ်ကြောင်း သိရသည်။
ဗြုံးကျင်းတူးသည့်လုပ်ငန်းသည် အလွန်အန္တရာယ်များသည့် လုပ်ငန်းဖြစ်သည့်အတွက် သတိထား သင့်ကြောင်း အထက်ပါ အမျိုးသားက ဆိုသည်။
“ဒီလို ဗြုံးကျင်း ပြိုတာက အရင်ကလည်း ဖြစ်ဖူးတယ်။ ဗြုံးကျင်းလုပ်ငန်းက အရမ်းအန္တရာယ် များတယ်လေ။ သတိထားပြီး လုပ်နေရတာ အခန့်မသင့်ရင် ဖြစ်သွားတာပဲ” ဟု ဆိုသည်။
Leave a Comments