သျှမ်းပြည်မြောက်ပိုင်း ကျောက်မဲမြို့နယ် ဗူးခါးနှင့် နားခေါ်ကျေးရွာကြား ရေချောင်းအနီးတွင် ယမန်နေ့ (မတ်လ ၁ )ရက် နေ့လည် ၁၁ နာရီခွဲဝန်းကျင်တွင် လူငယ်အမျိုးသား ၂ ဦး မိုင်းနင်းမိပြီး ၁ ဦး သေဆုံးသွားခဲ့ကြောင်း သတင်းသိရသည်။
ယမန်နေ့ (မတ် ၁)ရက်တွင် ကျောက်မဲမြို့ ရပ်ကွက် ၂ တွင်နေထိုင်သော လူငယ်အမျိုးသား ၃ ဦးသည် နားခေါ်နှင့် ဗူးခါးကျေးရွာကြားရှိ ရေချောင်းအနီးသို့ ငါးဖမ်းသွားစဉ် ၂ ဦး မိုင်းနင်းမိခဲ့ပြီး၊ ဒဏ်ရာရသူ ၁ ဦးကို မန္တလေးဆေးရုံသို့ ပို့ဆောင်စဉ် လမ်းတဝက်တွင် သေဆုံးသွားခဲ့ကြောင်း သိရသည်။
“နားခေါ်ရွာ အကျော် တတ်ပါခမ်းရေတံခွန် သွားတဲ့လမ်း ရေချောင်းနားမှာဖြစ်တာ၊ ရှေ့က သွားတဲ့ တစ်ယောက်က မိုင်းနင်းမိပြီး နောက်မှာ ကပ်လိုက်သွားတဲ့ တစ်ယောက်ကိုပါ ထိသွားတယ်၊ ဒဏ်ရာက တော်တော်ပြင်းတယ်။ တစ်ယောက်ကို လားရှိုးဆေးရုံကို ပို့ထားတယ်၊ နင်းမိတဲ့ တစ်ယောက်က မန္တလေးကို ပို့တာ လမ်းတဝက်မှာပဲ ဆုံးသွားတယ်” ဟု ကျောက်မဲ ကြက်ခြေနီသူနာပြုတပ်ဖွဲ့ ဒုတပ်ခွဲမှူး ဆရာမ လွေးဥမ္မာက သျှမ်းသံတော်ဆင့်ကို ပြောသည်။
မိုင်းနင်းမိမှုကြောင့် သေဆုံးသွားသူမှာ ရပ်ကွက် ၂ နေ လာဟူး (ခ) နိုင်နိုင်း အသက် (၂၀)နှစ် ဖြစ်ပြီး မိုင်းနင်းမိမှုကြောင့် ခြေထောက် နှစ်ဖက် ကြေမွဒဏ်ရာ၊ မျက်နာနှင့် ခန္ဓာကိုယ်တို့တွင်လည်း ပြင်းထန်ဒဏ်ရာ ရရှိခဲ့ကြောင်း သိရသည်။
လားရှိုးဆေးရုံသို့ ပို့ဆောင်ကုသမှု ခံယူနေသည့် လူငယ်အမျိုးသားမှာ စိုင်းအောင်မိန်း အသက် (၂၂)နှစ်ဖြစ်ပြီး ဝမ်းဗိုက်တွင် မိုင်းစနစ်ဝင် ဒဏ်ရာ ရရှိခဲ့ကြောင်း သိရသည်။
အဆိုပါ လူငယ်များ မိုင်းနင်းမိသည့် နားခေါ်၊ ဗူးခါး ကျေးရွာ အနီးသည် ပြီးခဲ့သည့် ဇန်နဝါရီလအတွင်း မြောက်ပိုင်းမဟာမိတ် တပ်ပေါင်းစု နှင့် RCSS တို့ တိုက်ပွဲ ပြင်းထန်ခဲ့သည့် နေရာများ ဖြစ်ပြီး မန္တလေး – လားရှိုး ပြည်ထောင်စုလမ်းမကြီး အနီးတွင် ဖြစ်ပွားခဲ့ကြောင်း သိရသည်။
တိုင်းရင်းသား လက်နက်ကိုင်တပ်များ တိုက်ပွဲဖြစ်ပွားခဲ့ဖူးသည့် ကျောက်မဲနှင့် သီပေါမြို့နယ် အကြားတွင် ပြီးခဲ့သည့် ဇန်နဝါရီလအတွင်းက သီပေါမြို့နယ် ကျင်သီကျေးရွာအုပ်စုအတွင်းမှ နေရပ်ပြန် စစ်ရှောင် ၂ ဦးမှာလည်း မိုင်းနင်းမိကာ ဒဏ်ရာ ရရှိခဲ့ကြောင်း သိရသည်။
Leave a Comments