သျှမ်းပြည်မြောက်ပိုင်း နောင်ချိုမြို့နယ် အုမ္မသီး ကျေးရွာရှိ ဖုန်းဆိုင်တစ်ဆိုင် ယမန်နေ့ (ဖေဖော်ဝါရီ ၂၇)ရက် ည (၇)နာရီဝန်းကျင်တွင် ဓားပြတိုက်ခံရကြောင်း စုံစမ်းသိရှိရသည်။
“ဟုတ်တယ်။ အဲ့ဖုန်းဆိုင်ကလည်း ပြည်ထောင်စုလမ်းမပေါ်မှာပဲရှိတယ်။ ည ၇ နာရီဝန်းကျင်လောက်က ဓားပြတိုက်ခံလိုက်ရတာ။ ဘယ်သူကနေ လာတိုက်တာလဲတော့ မသိရဘူး” ဟု နောင်ချိုမြို့နယ် ပရဟိတ အဖွဲ့ဝင် အမျိုးသားတစ်ဦးက ပြောသည်။
အဆိုပါ ဓားပြတိုက်ခံရမှုသည် လူထိခိုက်မှု မရှိသော်လည်း ငွေကြေး နှင့် ဆိုင်တွင်းရှိ ပစ္စည်းများ ဆုံးရှုံးမှုရှိကြောင်း သိရသည်။
“လူထိခိုက်မှုတော့ မရှိဘူး။ ဆိုင်ထဲမှာရှိတဲ့ ဖုန်း (၆)လုံးနဲ့ ငွေ (၅)သိန်းလောက်ကတော့ ပါသွားတယ်” ဟု ၎င်း က ပြောသည်။
စစ်တပ်က အာဏာသိမ်းပြီးနောက်ပိုင်း ပြည်သူများ စားဝတ်နေရေးခက်ခဲလာသောကြောင့် နောင်ချိုမြို့တွင် ခိုးယူလုယက်မှု၊ ဓားပြတိုက်မှုများ ပိုမို များပြာလာမှာကို ဒေသခံများက စိုးရိမ်နေကြသည်။
“နိုင်ငံရေးလည်း မကောင်း၊ ကိုဗစ် လူနာကလည်း များတယ်။ ရှာဖွေစားသောက်ရတာလည်း ခက်တော့ သူခိုး၊ ဓားပြတွေ များလာတာပေါ့။ နောက်ဆို ဒီထက်များလာမှာကို စိုးရိမ်တယ်” ဟု နောင်ချိုမြို့ ဒေသခံ အမျိုးသမီးတစ်ဦးက ပြောသည်။
ပြီးခဲ့သည့် ဇန်နဝါရီ (၂၅)ရက်တွင်လည်း နောင်ချိုမြို့နယ် ဘန့်ဘွေးကျေးရွာတွင်ရှိသည့် ရွှေဆိုင်တစ်ဆိုင်လည်း ဓားပြတိုက်ခံခဲ့ရပြီး ငွေကြေး အများအပြား ဆုံးရှုံးသွားခဲ့ကြောင်း သိရသည်။
Leave a Comments