စစ်အာဏာသိမ်းပြီးနောက်ပိုင်း သျှမ်းပြည်အတွင်း မြို့နယ်များတွင် စစ်ကောင်စီသည် စစ်ဆေးရေးဂိတ်များကို တိုးချဲ့ဖွင့်လှစ်ပြီး ပိုက်ဆံကောက်ယူနေလျက်ရှိကြောင်း စုံစမ်းသိရှိရသည်။
အဆိုပါ ဂိတ်များသည် အာဏာသိမ်းပြီးနောက်ပိုင်း ထွက်ပေါ်လာပြီး ကားသမား၊ ကုန်တင်ကားများ၊ ခရီးသည်တင်ကားများကို မှတ်ပုံတင်၊ ယာဉ်မောင်းလိုင်စင် စသည့်တို့ကို စစ်ဆေးပြီး ငွေကောက်ခံယူ နေလျက်ရှိကြောင်း သိရသည်။
“ဒီဂိတ်တွေက အာဏာသိမ်းပြီး နောက်ပိုင်းမှာပဲ ထွက်ပေါ်လာတာ။ ကားပြေးဆွဲတဲ့ လိုင်းကားတွေဆိုရင်လည်း သူတို့တောင်းတယ်။ မှတ်ပုံတင်တွေလည်း စစ်တယ်။ ပိုက်ဆံမပေးဘူးဆိုရင်လည်း ရစ်တာတွေရှိတယ်။ အာဏာသိမ်းပြီးတော့ သူတို့ ကြိုက်သလိုလုပ်တာပေါ့” ဟု ကိုယ်တိုင်ကြုံတွေ့ရသည့် မူဆယ်ဒေသခံ အမျိုးသားတစ်ဦးက ပြောသည်။
ယခင် NLD အစိုးရလက်ထက်တွင် စစ်ဆေးရေးဂိတ်များရှိသော်လည်း ပြည်သူများဘက်မှ ပြန်ခြေပ ပြောဆိုနိုင်ခဲ့သော်လည်း လက်ရှိတွင် ပြည်သူတွေက ငြင်းပိုင်ခွင့်မရှိကြောင်း သိရသည်။
“အရင်ကတော့ လဝကလား ဘယ်ဌာနက လာစစ်ဆေးတာလည်းဆိုတာ မေးမြန်လို့ရသေးတာပေါ့။ အခု အာဏာက သူတို့ လက်ထဲ အကုန်ရောက်သွားတော့ ဘာမှပြန်ပြောလို့မရဘူး။ ကျနော်တို့ မူဆယ်ဘက်မှာဆိုရင် တရုတ်မျက်နှာပေါက်ရင် မှတ်ပုံတင်တောင်းပြီး မရှိရင် သူတို့က ယွမ် ၁၀၀ လောက်တောင်းတယ်” ဟု မူဆယ်ဒေသခံ အမျိုးသားက ဆိုသည်။
မူဆယ်မြို့နယ်တွင် နမ့်ခမ်း – မူဆယ်လမ်းကြား နမ့်ပန်ဂိတ်တွင် တစ်ခု၊ လားရှိုး – မူဆယ် လမ်းကြားတွင် တစ်ခု စစ်ဆေးပြီး ငွေကောက်ယူနေလျက်ရှိကြောင်း သိရသည်။
ထို့အပြင် သျှမ်းပြည်တောင်ပိုင်း ပင်လုံမြို့ဘက်တွင်လည်း နေ့၊ ည လမ်းသွားလာသူများကို စစ်ကောင်စီ အုပ်စုမှ ငွေကြေးကောက်ခံမှု ပြုလုပ်နေကြောင်း သိရသည်။
“အခုက အပြင်ထွက်လည်း စိတ်ပူရတယ်။ ဘယ်သွားသွား မလွတ်လပ်ဘူး။ ညအပြင်သွားရင် စစ်ကောင်စီက ပိုက်ဆံတောင်းတာခံရတယ်။ ဟိုနေ့က ပင်လုံဂိတ်မှာဆိုရင် ၃ ထောင်လောက်တောင် တောင်းတယ်။ ညအချိန်ဆိုရင် သူတို့ကို ပိုပေးရတာ။ အရေးကြီးကိစ္စမရှိရင် မထွက်တော့တာ” ဟု ပင်လုံမြို့ ဒေသခံ အမျိုးသမီးတစ်ဦးက ပြောသည်။
အလားတူ ယခုအချိန်တွင် ဒေသခံ ပြည်သူများက အပြင်ထွက်သွားလာပါက ပိုက်ဆံ ၁၀၀၀ အထက် အမြဲယူဆောင်သွားနေရကြောင်း၊ စစ်ကောင်စီတပ်များသည် မြို့ဝင်ဂိတ်တစ်ခုထဲ စစ်ဆေးမှုပြုလုပ်နေတာမဟုတ်ဘဲ လမ်းကြိုလမ်းကြားတွင် စစ်ဆေးမှု ပြုလုပ်လျက်ရှိကြောင်း သိရသည်။
“အပြင်တစ်ခါထွက်ရင် အနည်းဆုံးတော့ ပိုက်ဆံ ၁၀၀၀ ရှိရတော့မယ်။ စစ်ကောင်စီတွေက မြို့ဝင်ထွက်ဂိတ်တွေမှာဘဲ စောင့်နေတာမဟုတ်ဘူး။ ခိုလမ် နမ့်စန်ကြားဆိုရင် ၄ နေရာလောက်ရှိတယ်။ မှတ်ပုံတင်တွေကော တောင်းကြည့်တယ်။ ပိုက်ဆံလည်းတောင်းတယ်။ ၂၀၀ ပေးရင်လည်း မယူချင်ဘူး။ ၅၀၀ အထက် ပေးနေရတာ” ဟု ကားဆရာ အမျိုးသမီးတစ်ဦးက ပြောသည်။
စစ်တပ်က အာဏာသိမ်းယူပြီးနောက်ပိုင်း မြန်မာနိုင်ငံတွင် တရားဥပဒေ စိုးမိုးမှုမရှိတော့ဘဲ စစ်ကောင်စီများက ကြိုက်သလို ပြည်သူအပေါ်အုပ်ချုပ်နေသောကြောင့် ဒေသခံများက ခက်ခဲသထက် ပိုမိုခက်ခဲလာကြသည်။
