သျှမ်းပြည်တောင်ပိုင်း မိုင်းရှူးမြို့တွင် စစ်ကောင်စီ ကားတိုက်မှုကြောင့် သေဆုံးသွားသည့် သျှမ်းလူငယ်တစ်ဦးကို ယနေ့အထိ စစ်ကောင်စီက ပြန်လည်လျော်ကြေးပေးမှု မရှိသေးကြောင်း စုံစမ်းသိရှိရသည်။
အဆိုပါ လူငယ်ကို စစ်ကောင်စီကား ဝင်တိုက်မှုကြောင့် ဇန်နဝါရီ ၂၉ ရက်တွင် သေဆုံးသွားပြီး စစ်ကောင်စီဘက်မှ ပြန်လည်လျော်ကြေးပေးမည်ဟု ပြောဆိုသွားပြီးနောက် ယနေ့အထိ လျော်ကြေးငွေ မရရှိသေးကြောင်း သိရသည်။
“တစ်လတောင် ရှိတော့မယ်၊ သူတို့ဘက်က အဲ့ဒီ လူငယ်အတွက် ဘာထောက်ပံ့မှု လျော်ကြေးတွေ လာပေးတာ မရှိဘူး။ သူရဲ့ ဈာပနာပြီးသွားကတည်းက ဘာမှ ပြန်လာမပြောတော့ဘူး။ သူ့အမေတော့ သူ့သားကို ဆွမ်းကပ်ပေးဖို့ သူတို့နား ပိုက်ဆံရဖို့ မျော်လင့်နေသေးတယ်။ သူ့ရုပ်အလောင်း ဈာပနာတော့ ပြီးသွားပြီ” ဟု မိုင်းရှူးမြို့ ဒေသခံ အမျိုးသားတစ်ဦးက ပြောသည်။
စစ်ကောင်စီကား တိုက်ခံရပြီး သေဆုံးသွားမှုကြောင့် တာဝန်ယူမှု၊ တာဝန်ခံမှုမရှိကြောင်း၊ ယခုကဲ့သို့ ပြုလုပ်ခြင်းသည် လူ့အခွင့်အရေးကို ချိုးဖောက်မှုမြောက်ကြောင်း မိုင်းရှုးမြို့ ဒေသခံများက ပြောသည်။
“ကျနော်အနေနဲ့တော့ သူတို့ ဒီလိုလုပ်တာကတော့ လုံးဝ တရားမျှတမှုမရှိဘူး။ တကယ်လို့ သူတို့က တိုက်ပြီး ဆေးရုံကို တစ်ခါထဲခေါ်သွားရင် ဟုတ်သေးတယ်။ အခုက တိုက်ပြီးထွက်ပြေးသွားတယ်။ ပြီးတော့ သူတို့ဘက်က တာဝန်ရှိသူကလည်း ကားမောင်းတဲ့သူက အရက်မူးနေတယ်လို့ ပြောသေးတယ်။ သူတို့ဘက်က လုံးဝ တာဝန်ယူမှု တာဝန်ခံမှု ဆိုတာ မရှိဘူး” ဟု မိုင်းရှူးမြို့ ဒေသခံ အမျိုးသားက ပြောသည်။
အဆိုပါ သေဆုံးသွားသည့် အမျိုးသားလူငယ် စိုင်းနော်ခမ်း အသက် (၂၈)နှစ်သည် ၂ နှစ် အရွယ် ကလေးငယ်တစ်ဦးကျန်ရှိနေပြီး မိသားစု၏ အဓိက ဝင်ငွေ ရှာဖွေပေးနေသူတစ်ဦးလည်း ဖြစ်ကြောင်း သိရသည်။
Leave a Comments