သျှမ်းပြည်တောင်ပိုင်း မိုးဗြဲမြို့နယ်အတွင်း စစ်ကောင်စီဘက်မှ လက်နက်ကြီးဖြင့် ပစ်ခတ်တိုက်ခိုက်မှုကြောင့် အရပ်သားပြည်သူ ထိခိုက်သေဆုံးမှုများရှိနေကြောင်း သတင်းသိရသည်။
ယနေ့ (ဖေဖော်ဝါရီလ ၂၃) ရက်နေ့ မနက် ၈ နာရီဝန်းကျင်မှ စတင်ပြီး မိုးဗြဲအခြေစိုက် စစ်ကောင်စီ လက်အောက်ခံ အမှတ် ၄၂၂ တပ်မှ လက်နက်ကြီးဖြင့် လူနေရပ်ကွက်မြို့တွင်းဘက်သို့ အကြောင်းမဲ့ ရမ်းသမ်းပစ်ခတ်မှုကြောင့် အသက် (၇၀)ကျော် အဘိုးအို တစ်ဦး သေဆုံးပြီး၊ အသက် (၁၄)နှစ်အရွယ် အမျိုးသမီးငယ် တစ်ဦး နှင် အမျိုးသားတစ်ဦး ဒဏ်ရာရရှိကြောင်း ဒေသခံများပြောပြချက်အရ သိရသည်။
“ဒီကနေ့လည်း အစောကြီးပစ်ပါတယ်၊ PDF တွေလည်း မရှိဘဲနဲ့ လူနေရပ်ကွက်တွေဘက်ကို ရမ်းပြီးပစ်လာ လို့ ကဖုရွာက အိမ်ထဲပုန်းနေတဲ့ အသက် ၇၀ ကျော် အဖိုးအိုတစ်ဦးကို လက်နက်ကြီး မှန်သွားတယ်။ တခြား သူတွေလည်း ထိခိုက်ဒဏ်ရာရသူလည်းရှိတယ်၊ အဆောက်အအုံ ပျက်စီးမှုလည်း များတယ်” ဟု မိုးဗြဲမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ယခုရက်သတ္တပတ်အတွင်း မိုးဗြဲမြို့နယ်အတွင်းသို့ တိုက်လေယာဉ်၊ ရဟတ်ယာဉ်များအပြင် တာဝေးပစ် လက်နက်များ၊ ၁၂ဝ မမ၊ ၈ဝ မမ ကဲ့သို့သော လက်နက်များဖြင့်လည်း စစ်ကောင်စီတို့က အကြိမ်ရေများစွာ ပစ်ခတ်တိုက်ခိုက်ခဲ့ကြောင်းလည်း ဒေသခံ ပြည်သူ့ကာကွယ်ရေးတပ်ဖွဲ့ဝင်များက ပြောသည်။
“စကစတွေက အင်အားအလုံးအရင်းနဲ့ လက်နက်ကြီးနဲ့ရော ဝေဟင်ကနေ ဗုံးကြဲတိုက်နေတယ်၊ သူတို့တွေက ပြည်တွင်းစစ်အနေနဲ့ ကန့်သတ်ထားတဲ့ လက်နက်တွေ အကုန်သုံးနေတယ်၊ စကစတွေ မသုံးသေးတာ ဆိုလို့ ဓာတုလက်နက်ပစ္စည်းပဲရှိတယ်” ဟု မိုးဗြဲမြို့မှ PDF တပ်ဖွဲ့ဝင်တစ်ဦးက သျှမ်းသံတော်ဆင့် ကို ပြောသည်။
လက်ရှိရှေ့တန်း စစ်မျက်နှာပြင်တွင် စစ်ကောင်စီတပ်ဖွဲ့တို့နှင့် ရင်ဆိုင်တိုက်ခိုက်နေသော PDF များ အနေဖြင့် စစ်ကောင်စီတို့နှင့် လက်နက်အင်အားမမျှသည့်အတွက် အကူအညီများလိုအပ်နေပြီး ကူညီထောက်ပံ့ပေးကြ ရန်လည်း ပြောဆိုထားပါသည်။
မိုးဗြဲတိုက်ပွဲအတွင်း စစ်ကောင်စီတပ်သားများက ဝါရီဆူးဖလိုင်နှင့် ဝီသဲကူးကျေးရွာမှ နေအိမ်များကို မီးရှို့ခဲ့ပြီး ဝါရီဆူးဖလိုင်က ကျေးရွာသားအချို့ကိုလည်း ဖမ်းစီးပြီး လူသားဒိုင်းအဖြစ် အသုံးပြုခဲ့ကာ စစ်ကောင်စီ၏ လက်နက်ကြီးပစ်ခတ်မှုကြောင့် အရပ်သား သေဆုံးမှု ၁၀ ဦးထက်မနည်း ရှိနေကြောင်းလည်း သိရသည်။
