သျှမ်းပြည်မြောက်ပိုင်း နောင်ချိုမြို့ ဘူတာရုံတွင် အမည်မသိလက်နက်ကိုင် တပ်ဖွဲ့တစ်ခုက လာရောက်ပစ်ခတ်ခဲ့ပြီး ပြည်သူ (၂) ဦး မိုင်းစထိမှန်ပြီး ဒဏ်ရာအနည်းငယ်ရရှိခဲ့ကြောင်း စုံစမ်းသိရသည်။
ယနေ့ (ဖေဖော်ဝါရီ ၂၃)ရက် မနက် ၁ နာရီ ဝန်းကျင်တွင် အမည်မသိလက်နက်ကိုင်တပ်ဖွဲ့တစ်ခုက ဘူတာရုံကို လက်နက်ကြီး၊ လက်နက်ငယ်ဖြင့် လာရောက်ပစ်ခတ်ခဲ့ကြောင်း သိရသည်။
“ဘယ်လက်နက်ကိုင် လာပစ်သွားလဲဆိုတာတော့ ကျနော်တို့ မသိဘူး။ ည ၁ နာရီလောက်မှာ လာပစ်သွားတာ။ နာရီဝက်လောက်တော့ ရှိတယ်။ ဘူတာရုံလိုင်းခန်းမှာနေတဲ့ ပြည်သူ ၂ ဦးတော့ မိုင်းစအနည်းငယ်ထိပြီး ဒဏ်ရာရရှိသွားတယ်။ ဒဏ်ရာက မစိုးရိမ်ရဘူး” ဟု နောင်ချိုမြို့ ဒေသခံ အမျိုးသားတစ်ဦးက ပြောသည်။
အဆိုပါ မိုင်းစထိမှန်ခဲ့သည့် ဒေသခံ ၂ ဦးသည် လုံခြုံရေးအမျိုးသား တစ်ဦး နှင့် လိုင်းခန်းတွင် နေထိုင်သည့် အမျိုးသမီး တစ်ဦးဖြစ်ကြောင်း အထက်ပါ အမျိုးသားက ဆိုသည်။
နောင်ချိုမြို့တွင် ညအချိန်ပစ်ခတ်မှုကြောင့် ဒေသခံများ ထိတ်လန့်ခဲ့ရပြီး စိုးရိမ်နေကြကြောင်း သိရသည်။
“ ည သန်းခေါင် ပစ်ခတ်တော့ တစ်မြို့လုံးက လန့်နိုးသွားတာ။ မအိပ်ရဲကြတော့ဘူး။ ဟိုအရင်တစ်ခေါက်ကလိုမျိုး နောင်ချိုတိုးဂိတ်မှာ ပစ်ခတ်တာမျိုး ဖြစ်မလားလို့ စိုးရိမ်မိတာ။ ညအချိန် ရုတ်တရက် ဒီလိုပစ်ခတ်မှုတွေရှိတော့ လန့်တာပေါ့။ ကြောက်လည်းကြောက်တယ်” ဟု နောင်ချိုမြို့ ဒေသခံ အမျိုးသမီးတစ်ဦးက ပြောသည်။
နောင်ချိုမြို့ ဂုတ်ထိပ်တိုက်ပွဲအပြီး ယခုကဲ့သို့ ပစ်ခတ်မှုသည် ဒုတိယအကြိမ်မြောက်ဖြစ်ကြောင်း သိရသည်။
Leave a Comments