သျှမ်းပြည်တောင်ပိုင်း ဖယ်ခုံမြို့နှင့် မိုးဗြဲ ကို စစ်ကောင်စီတပ်ဖွဲ့တို့က လေယာဉ်နှင့် ဗုံးကြဲတိုက်ခိုက်နေကြောင်း သတင်းသိရသည်။
ယနေ့ ဖေဖော်ဝါရီလ ၂၂ ရက်နေ့ နံနက် ၆ နာရီဝန်းကျင်အချိန်မှ စတင်ကာ အာဏာသိမ်းစစ်ကောင်စီတို့သည် ဖယ်ခုံမြို့ရှိ လွိုင်ကော် – တောင်ကြီး လမ်းမကြီးတစ်လျှောက်တွင် လက်နက်ကြီးလက်နက်ငယ်တို့ဖြင့် စတင်ပစ်ခတ်နေပြီး လက်နက်ကြီးများကြောင့် နေအိမ်များပင် တုန်ခါသွားကြောင်း ဒေသခံအမျိုးသမီး တစ်ဦးက သျှမ်းသံတော်ဆင့် ကို ပြောသည်။
“ဒီမနက် ၆ နာရီ ၁၅ မိနစ်လောက်မှာ၊ စကစတွေဘက်ကနေပစ်တဲ့ လက်နက်ကြီးလက်နက်ငယ်တွေ ပစ်တဲ့အသံ ကြားရတယ်။ အိမ်တွေပါတုန်သွားတယ်၊ အထကရှေ့မှာ ကင်းပုန်းလည်း ချထားပြီး အဲ့ဘက်သွားလာတဲ့သူကို ဖမ်းတယ် ပစ်တယ်” ဟု ဖယ်ခုံမြို့ပေါ် ပိတ်မိနေသည့် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထို့အပြင် စစ်ကောင်စီတို့သည် မြို့တွင်းနေရာအနံ့ ကင်းပုန်းများချထားပြီး လမ်းမပေါ်မြင်တွေ့သည့် ပြည်သူများကို ပစ်ခတ်ခြင်း ဖမ်းဆီးခြင်းများ ပြုလုပ်နေကြောင်းလည်း ဖယ်ခုံမြို့မှ ဒေသခံအမျိုးသမီးက ပြောသည်။
“တိုက်ပွဲပြီးသွားတော့ စကစတွေက မြို့ထဲပတ်ပြီး တစ်အိမ်တက် တစ်အိမ်ဆင်း ဖုန်းတွေ ဘာတွေ စစ်တာ မျိုးရှိတယ်၊ ပြီးတော့ မြို့အဝင်အထွက်နားရှိတဲ့ ၄၂၁ တပ်က အကာအကွယ်တွေနဲ့ စစ်ဆေးမှုတွေရှိနေလို့ ကြောက်ရတယ်၊ မြို့ကနေထွက်မရဘူး” ဟု ၎င်းက ပြောသည်။
တိုက်ပွဲသည် ဖယ်ခုံမြို့ လွယ်ပါသာဘုရားတောင်နှင့် ကုန်းဆုံဘုရားတောင်တို့တွင် တပ်စွဲထားသော တပ်မ ၅၅ လက်အောက်ခံ ကလောအခြေစိုက် ခလရ – ၇ တပ်နှင့် တိုက်ပွဲဖြစ်ပွားခြင်းဖြစ်ပြီး စစ်ကောင်စီ တို့မှ ထိခိုက်ဒဏ်ရာရသူများပြားကြောင်း ဖယ်ခုံ PDF မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“စကစ ဘက်က ၅ ယောက်ကျတယ်၊ ပြီးတော့ ထွက်ပြေးသူနဲ့ ဒဏ်ရာရသူများနေတာလည်း တွေ့ရတယ်၊ နောက်ပြီး ကျနော်တို့က သူတို့ လက်နက်ခဲယမ်းတချို့ကို ဖမ်းဆီးရမိတယ်၊ ဒီနေ့မှာ ကျနော်တို့ရဲဘော် ၃ ယောက် ဒဏ်ရာရတာကလွဲပြီး ကျဆုံးမှုမရှိဘူး” ဟု ဖယ်ခုံ PDF မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
မိုးဗြဲမြို့ ဝီသဲကူဘက်တွင်လည်း ဌာနေပြည်သူ့ကာကွယ်ရေးတပ်ဖွဲ့များနှင့် အာဏာသိမ်းစစ်ကောင်စီတပ်ဖွဲ့တို့ တိုက်ပွဲဖြစ်ပွားနေလျက်ရှိပြီး စစ်ကောင်စီတို့က လေယာဥ်ဖြင့် ဗုံးကြဲတိုက်ခိုက်သည်အထိ တိုက်ပွဲပြင်းထန်နေ ကြောင်း သတင်းသိရသည်။
