သျှမ်းပြည်တောင်ပိုင်း-ကရင်နီ(ကယား) နယ်စပ် တိုက်ပွဲတွင် စစ်ကောင်စီဘက်မှ အကျအဆုံးများပြီး ယနေ့ထိ တိုက်ပွဲ ပြင်းထန်နေကြောင်း သတင်းသိရသည်။

သျှမ်း – ကယားနယ်စပ်၊ ဒီးမော့ဆိုမြို့နယ်၊ ဝီသဲကူး (မြောက်ရွာ) ကျေးရွာအနီး ဖြစ်ပွားခဲ့သည့် တိုက်ပွဲတွင် စစ်ကောင်စီဘက်မှ အရာရှိနှင့် တပ်သားအပါအဝင် ၃၀ ဝန်းကျင် သေဆုံးခဲ့ပြီး အမြောက်အမြား ဒဏ်ရာရရှိကြောင်း ဒီးမော့ဆိုမြို့နယ် ပြည်သူ့ကာကွယ်ရေးတပ်မှ ထုတ်ပြန်ထားသည်။

“မနေ့က (ဖေဖော်ဝါရီလ ၂၀) မနက် ၁၁ နာရီတွင် တိုက်ပွဲ‌တွေပြင်းထန်ခဲ့တယ်၊ အဲ့အချိန်မှာ သူတို့ဘက်က အကျအရှုံးများခဲ့တယ်၊ နောက် ညနေ ၄ နာရီလောက်မှာတော့ စကစတွေက တိုက်လေယာဉ် ၂ စင်းနဲ့ ဗုံးကြဲပြီး စစ်ကူတိုက်တယ်၊ တချို့က လေထီးနဲ့ပါ ခုန်ဆင်းလာတာ” ဟု ရှေ့တန်းမှ ပြည်သူ့ကာကွယ်ရေးတပ်သား တစ်ဦးက သျှမ်းသံတော်ဆင့်ကို ပြောသည်။

ထို့အပြင် ယမန်နေ့ ညသန်းခေါင်အချိန်တွင် စစ်ဖြစ်ပွားရာ မိုးဗြဲနှင့် ဒီးမော့ဆိုဘက်ကို စစ်ကောင်စီဘက်က လေယာဉ်များဖြင့် ထပ်မံလာရာက် ဗုံးကြဲခဲ့ကြောင်း သိရသည်။

လက်ရှိ ဖြစ်ပွားနေသည့် မိုးဗြဲနှင့် ဒီးမော့ဆိုတိုက်ပွဲတို့တွင် ပြည်သူ့ကာကွယ်ရေးတပ်-ဒီးမော့ဆို(DMO-Local PDF)၊ အလယ်ပိုင်းတိုင်း၊ လွိုင်ကော် PDF၊ KNDF နဲ့ တခြား မဟာမိတ်တပ်ပေါင်းစုများ ပူးပေါင်းပြီး စစ်ကောင်စီကို ခုခံ တိုက်ခိုက်နေကြောင်းလည်း သိရသည်။

“ဒီတိုက်ပွဲက တော်တော်ပြင်းထန်နေတယ်လို့ ပြောရမယ်၊ ကျနော်တို့ဘက်က တော်လှန်ရေးရဲဘော်တွေလည်း ထိခိုက် ဒဏ်ရာရ ကျဆုံးတာမျိုးတွေရှိတယ်၊ ဒီနေ့အထိ တိုက်ပွဲက ပြင်းထန်နေတုန်းပဲ၊ လက်နက်အင်အားချင်း မမျှတော့ တိုက်ခိုက်ရတာတော့ အားမရဘူးပေါ့၊ လက်နက်ရအောင် ပြည်သူများ ကူညီထောက်ပံ့ပေးကြပါလို့ ပြောချင်တယ်” ဟုလည်း PDF တပ်သားတစ်ဦးကလည်း ပြောပြသည်။
ဖေဖော်ဝါရီ ၁၇ ရက်မှ စတင်ကာ ကရင်နီပူးပေါင်းတပ်ဘက်မှ ၂၀ ကျော်သေဆုံးခဲ့ရပြီး အများအပြား ဒဏ်ရရှိခဲ့ကြောင်းနှင့် အထိနာသည့် စစ်ကောင်စီတပ်သားများက မိုးဗြဲမြို့နယ် ဝါရီဆူးပလိုင်ရွာ၊ ဝီတဲကူးရွာတွေကို မီးရှို့ဖျက်ဆီးခဲ့သလို လမ်းတလျှောက်လည်း မိုင်းထောင်ခြင်း၊ လက်နက်ကြီးများနဲ့ ရမ်းသမ်းပစ်ခတ်ခြင်းများ ပြုလုပ်နေကြောင်းလည်း သိရသည်။

လက်ရှိတွင် ဒေသခံပြည်သူများ ၁ သောင်းနီးပါးကလည်း စစ်ဘေးလွှတ်ရာသို့ ထွက်ပြေးတိမ်းရှောင်နေရပြီး အရေးပေါ် ကူညီကယ်ဆယ်မှုများ လိုအပ်နေကြောင်းလည်း ကူညီ ကယ်ဆယ်ရေး အဖွဲ့ဝင်များက ပြောသည်။